Mibuto za Yosefu zenda ku Misri.
42
1 Gongule Yakobo buno mu Misri mwabezaga idia, abwide bana bage bunee: “Buni bumukulolana? 2 Nungule buno mu Misri muli idia. Endazi kuko nu kutukunzila nkindi kutulanga buno tatukue.” 3 Ububo mibuto ikumi za Yosefu zendile kukunza idia ku Misri, 4 tondo Yakobo ntasingile Benjamina, muto wa Yosefu, gamozi nabo, kubuno akule boba buno kitondo kibi kinamubasila. 5 Bana ba Israeli bavule mu musanganano wavule kuli Yosefu kukunza idia kubuno nzala zabezaga mu kisi kya Kanana. 6 Yosefu, mukota wa kisi kya Misri, akunzagia idia ku babo bavwaga. Gavule mibuto zage, bakumbaminne lwabusio lwage nu kwikya malanga gansi. 7 Mu nkungu zamonine Yosefu ku mibuto zage, abamenyine, tondo abakitide anga bageni, nu atendile moki makali kubeli. Ababuzizie bunee: “Mwatukile kuni?”
Bamwakwide bunee: “Twatukile ku kisi kya Kanana kukunza idia.”
8 Yosefu amenyine mibuto zage, tondo tabamumenyine. 9 Nu akengede ndozi zakesizie nazo ku kabamba kabo nu ababwide bunee: “Muli batambuzi. Mwavule gano kutambula kisi kyeitu kumenya kuni kuli biziki biteli na magala mukyo.”
10 Bakwide bunee: “Kilo, mukota weitu. Iswe tuli bakiti bobe nu twavule gano kukunza idia. 11 Iswe bansania tuli bana ba muntu umozi, nu tuli bantu ba bulili. Tatuli batambuzi.”
12 Abatendile lingo bunee: “Kilo, mwavule ku kisi kyeitu kumenya kuni kuli busosu bweitu.”
13 Tondo bamwakwide lingo bunee: “Iswe bakiti bobe, tuli ikumi nu babili, bana ba muntu umozi ukwikalaga mu kisi kya Kanana. Umozi asigede na tateiswe, nu ungo umozi nteligo lingo, akule.”
14 Yosefu ababwide lingo bunee: “Namutendabo lingo, buli anga bunatendile, ‘Muli batambuzi.’ 15 Nkumulindika n'idindiko lilino bunee: ‘Anga bukulama Farao, tamukatuka ga kiziki kikino aaba nu wozo muto weinyu avwa gano. 16 Musombole umozi munkatini mweinyu nu kumusinga kutola wozo muto weinyu nu bango balangwe gano mu kikando, buno moki meinyu malindikwe kumenya ndi meli bulili aba buza. Ndi mwatenda buza, anga bukulama Farao, nti lebelebe muli batambuzi.’” 17 Nu abakandile mu kikando bindi bisatu.
18 Ku kindi kya bisatu, Yosefu ababwide bunee: “Kitazi bubuno buno mulame, kubuno nkukua Kalaga boba. 19 Ndi muli bantu ba bulili, zigazi buno umozi wa kumuli asigale muno mu kikando nu bango bansania bende n'idia ku bikanga byeinyu. 20 Tondo mwatunganana kusubania na muto weinyu kundi buno nimenye moki ndi meli ma bulili, nu nti tamwakue tondo mwalame.”
Ukinsa bakitile anga bwatendile. 21 Batendenne bunee: “Lebelebe tukusungibwa ku kabamba ka mubuto weitu. Twamonine ku kabebe ka mutima wage gaatusegaga kyombo, tondo tatwazigile kumungwilila. Ukinsa kabebe kakano kabasa kutuli.”
22 Rubeni abazugide bunee: “Ndi nsyamubwide kutagila wozo mwana tondo tamwazigile kunnungwilila. Kano kaluma bwatunganana twasungibwa ku kabamba ka lukuo lwage.”
23 Yosefu ongwaga nu kusongolola bibatendaga tondo tabamenyine kubuno atendaga nabo na mwisuzi. 24 Yosefu abasigile nkungu nkeke buno alile. Kumbusa kwa kulila, gaavwamine kutenda busoga, abavwilide lingo nu asombwede Simeoni nu amukandile lwabusio lwabo.
Mibuto za Yosefu zasubya ku Kanana.
25 Yosefu akakizizie bakiti bage kwizazia nsago za mibuto zage n'idia nu kubika feza zabo mu nsago gamozi n'idia, nu kubakasa idia lya lugendo lwa kusubania. Kumbusa kwa kukita bubo, 26 mibuto zage zabikile nsago ga mpunda zabo nu beiyendede. 27 Ku ido lyabo itangi, umozi kubeli akandwide nsago zage buno alisie mpunda zage nu amonine ku feza zage gantata idia. 28 Abwide mibuto zage bunee: “Feza zane zasubizibwe kundi! Zili mumo mu nsago zane!” Mitima zabo zazangilezangile; balolenne nu batendenne bunee: “Buni bwatukitide Kalaga?”
29 Gababasile kuli isibo Yakobo mu kisi kya Kanana, bamubwide binsania bibakitidwe mu lugendo lwabo. 30 Bamubwide bunee: “Muntu uli mukota wa kisi kinsania atutendile bubibu nu atukitide anga batambuzi mu kisi kyage. 31 Tondo twamubwide bunee: ‘Tatuli batambuzi. Tuli bantu ba bulili. 32 Twabezaga ikumi nu babili, bana ba muntu umozi u tateiswe. Umozi nteligo lingo, nu malibilo eli lelo gamozi na tateiswe mu kisi kya Kanana.’ 33 Nu wozo mukota wa kisi atutendile bunee: ‘Namenye ndi muli bantu ba bulili n'idindiko lilino: Sigazi umozi wa mumuli gano gane nu bango nti benda n'idia ku bikanga byeinyu. 34 Tondo subaniazi na malibilo meinyu kundi, nimenye buno tamuli batambuzi. Ndi mwakita bubo, nti namenye lebelebe buno tamuli batambuzi, nu inyuwe munavwama kutabanga mu kisi.’”
35 Mu nkungu za kutikya idia mu nsago, mu nsago za muntu na muntu mwasangilwe kibombo kya feza. Gabamonine kuzo bobansania, nu isibo gamozi, bakule boba nunse. 36 Isibo ababwide bunee: “Mwantikizye bana bane! Yosefu nteligo lingo, nu Simeoni nu we nteli go lingo, nu kano kaluma mukutunda kuntikya Benjamina. Bibino binsania bikunita.”
37 Nu Rubeni akwide isi bunee: “Ndi nsyasubania nage gano, wite bana bane babili bamulume. Mubike ku maboko mane nimulange nu nkasubania nage kuguli.”
38 Tondo atendile bunee: “Malibilo mane ntanenda n'inyu! Iselenzi akule, nu asigala wenyenenyene. Embe akue mu nzila. Nu ndi bubo, nti kabebe kanite. Nili mukungu, nu kabebe kako kanite nunsania.”