Yosefu nu mukazi wa Potifari.
39
1 Nu Yosefu ekilwe ku Misri. Potifari, mukiti munene nu musondelezia wa bakoloboyo ba Farao, akunzile Yosefu ku baIsimaeli bavule nage ku Misri. 2 Yehowa abezaga gamozi na Yosefu, nu abede muntu wa bubobelelo. Eikalaga mu numba za mukota wage Potifari. 3 Gamonine mukota wozo buno Yosefu akitaga binsania busoga nu kwitila mu binsania byakitaga, kubuno Yehowa abezaga gamozi na Yosefu mu binsania byakitaga, 4 akasile Yosefu mponga, nu amubikile mukiti munene ku mulimo wage mu kumukasa bwangato ku binsania bya mu numba zage nu kumukasa binsania byabezaga nabyo. 5 Kutukila nkungu za kumukasa bwangato ku numba zage nu ku binsania byabezaga nabyo, Yehowa akasile Potifari nu ba mu numba zage mponga ku kabamba ka Yosefu. Akasile mponga ku binsania bya mu numba nu ku bya mu isoa. 6 Ukinsa abikile binsania ku bwangato bwa Yosefu, nu ntakengede bingo binsania byabezaga nabyo, tugu idia lyaliaga. Yosefu abezaga musoga nu mbangilwa, 7 nu kumbusa kwa bindi bimozi, mukikulu wa Potifari alolile Yosefu, nu amubwide bunee: “Wiyombeke na nne.” 8 Yosefu ntazigile. Abwide mukikulu wa Potifari bunee: “Kubuno nili mwangati wa binsania, mukota wane nteli na katati kamozi mu numba. 9 Takuli ungo mu numba zeno uli munene kuntinga, nu mukota wane ntanimine kena, tondo uwe tugu kubuno uli mukazi wage. Buni bunakite bwagi bunene anga bubo nu kwagila Kalaga?” 10 Wozo mukikulu atendaga bubo kuli Yosefu na busi na busi, tondo Yosefu ntazigile kumungwa aba kuba gamozi nage.
11 Busi bumozi Yosefu eingide mu numba kukita mulimo wage, nu takwabezaga ungo mukiti muzo gamozi nage, tugu mukazi wa Potifari. 12 Wozo mukikulu akatile ku nsulu za Yosefu nu amubwide bunee: “Vwa twiyombeke gamozi,” tondo amusigide nsulu zage nu eitumine lubilo kumbuga. 13 Gamonine mukikulu buno asigile nsulu zage nu eitumine lubilo kutuka mu numba, 14 amanine bakiti bage ba numba, nu ababwide bunee: “Tamukumona. MuEbrania wono atolilwe gano kutunyega. Avule gano kwiyombeka na nne, tondo nalalukile. 15 Gongule kulaluka kwane, ansigide nsulu zage nu eitumine lubilo kumbuga.”
16 Asigede na nsulu za Yosefu aaba nu kuvwa kw'iba wage. 17 Mu zezo nkungu, amusolede wozo musagu bunee: “Mukiti wozo muEbrania u watolile avule kunnyega. 18 Tondo ganalalukile kumana mukasia, kitangalabesi eitumine lubilo kumbuga nu ansigide nsulu zage.”
19 Gongule mukota wa Yosefu musagu wamusolede mukikulu wage bunee: “Mukiti wobe ankitide bubuno,” ongedwe nunse Yosefu. 20 Akatile Yosefu nu amubikile mu kikando kyakukanda bakandwa ba mukota munene. Bindi binsania byabezaga Yosefu mu kikyo kikando, 21 Yehowa abezaga nage. Amukasile mponga ku meiso ma mulangi wa kikando buno amukwile kyombo. 22 Ububo mulangi wa kikando abikile bakandwa bansania mu maboko ma Yosefu nu kinsania kyakitagwa mo u wakikitaga. 23 Mulangi wa kikando ntamenyine kena aba ntalolile ku kimozi kyabezaga ku maboko ma Yosefu, kubuno Yehowa abezaga gamozi nage nu amukasile busoga mu binsania byakitile.