Yuda nu Tamari.
38
1 Mu bindi bibyo, Yuda asigile mibuto zage, nu endile kwikala na Hira, muntu wa ku Adulamu. 2 Kuko, Yuda amonine ku mukikulu umozi, mukinga wa muKanana wamanagwa Sua. Yuda asongile mukikulu wozo nu eiyombekile nage. 3 Ekile iyimi nu kubuta mwana wamulume wamanagwa Eri. 4 Lingo ekile iyimi, nu abutile ungo mwana wamulume, nu amwinikile Onani. 5 Abutile ungo mwana wamulume wa basatu, nu amwinikile Sela. Yuda abezaga eseli mu Kezibu gabutilwe mwana wa basatu. 6 Yuda alongekede Eri, nkula zage, isonga na mukinga wamanagwa Tamari, 7 tondo Eri, nkula za Yuda, abezaga mubi ku Yehowa, nu Yehowa amwitile. 8 Yuda abwide Onani bunee: “Songa mutokali wobe buno ubute mwana mu izina lya solonzi.” 9 Tondo Onani amenyine buno mwana ntabe wage, nu mambizi manse meiyombekaga na mutokali wage, akubulaga gansi buno ntabute mwana. 10 Bubo bwakitile bwabezaga bubi nunse ku Yehowa nu We amwitile. 11 Mu nkungu zezo, Yuda abwide Tamari bunee: “Subania ku numba za so, nu kwidanga musigala aaba nu gakakula mwana wane Sela.” Akengede buno embe akue anga bwakule mibuto zage. Ububo Tamari endile kwikala mu numba z'isi.
12 Kumbusa kwa bindi byingi, mukazi wa Yuda, wozo mukinga wa Sua, akule. Gasilile Yuda kulilila mukazi wage, endile ku Timuna kwasesaga bakiti bage myoza za mikoko, nu mwida wage Hira wa ku Adulamu, abezaga gamozi nage. 13 Tamari asambalidwe bunee: “Sobyala akwenda ku Timuna kusesia myoza za mikoko zage.” 14 Eikungwide nsulu zage za musigala nu eivwalikizie engo nsulu nu kwikukila na kitambala ku meiso mage buno abisame Yuda. Eikede ga mwingilo wa Enaimu guli mu nzila za kwenda ku Timuna. Amonine buno Sela akula, nu ntesongwa nage.
15 Gaamumonine ko, Yuda akengede buno eli kitazi, kubuno abezaga na kitambala ku meiso mage. 16 Ntamenyine buno eli mukamwana wage, nu amubuzizie buno eiyombeke nage nu Tamari amwakwide bunee: “Wankase kikizi?”
17 Yuda amulagile bunee: “Nakusingile kyana kya mpene zane.”
Tamari akwide bunee: “Ee, busoga, tondo mpe mwima aaba nu gawansingile kyo.”
18 Yuda amubuzizie bunee: “Nikukase mwima mukizi?”
Akwide bunee: “Kakengelezio kobe nu musinge wobe gamozi na musumbo wobe.” Yuda amukasile byo, nu beiyombekile gamozi. Tamari ekile iyimi, 19 nu endile ku numba z'isi, nu kutikya kitambala nu nsulu za kitazi, nu avwalile nsulu zage za musigala.
20 Mu nkungu zezo, Yuda amusingide kyana kya mpene, nu akisingile na mwida wage Hira, muAdulamu, buno atole mwima waakasile ku mukikulu. Hira ntamonine ku mukikulu. 21 Abuzizie bantu beikalaga ku kiziki kikyo bunee: “Kuni kuli kitazi kyabezaga ku ntungo za nzila za Enaimu?”
Bamwakwide bunee: “Tagabezaga kitazi gano.”
22 Asubizie kwabezaga Yuda nu kumutenda bunee: ‘‘Nsyamumonine ko. Lingo bantu beikalaga gago bantenda bunee: ‘Tagabezaga kitazi gano.’”
23 Nu Yuda akwide bunee: “Asigale na mwima weli nago, banavwa kutuseka. Lebelebe namusingide kyana kikino kya mpene, tondo ntwamumonine ko.”
24 Bwigi na myezi isatu kumbusa kwa kitondo kikyo, Yuda asambalidwe bunee: “Mukamwana wobe Tamari akitile butazi, nu eka iyimi.”
Yuda abwide bunee: “Bamubasie nu kumugisia.”
25 Gabamubasagia kumbuga, atendile ku isibyala bunee: “Nyene bintu bibino binili nabyo u wanekezie iyimi. Lola kubyo, ndi wizi nazi nyene kakengelezio nu musinge nu musumbo wono?” 26 Yuda abimenyine nu abwide bunee: “We eli wisanana kuntinga kubuno nsyamusongizie ku mwana wane Sela.” Nu nteiyombekile lingo nage aba limbizi limozi.
27 Gakukile nkungu zage za kubuta, mu nda zage mwabezaga maasa ma basikila. 28 Gaabezaga es'abuta, umozi abasizie kuboko kwage, nu musana akandile muzigi wakisimana ku kuboko nu abwide bunee: “Wono eli nkula.” 29 Tondo abulutile kuboko mu nda za nina nu ungo musikila abutilwe tanga. Musana abwide bunee: “Monga mukizi u wakita?” Nu amwinikile Perezi. 30 Kumbusa muto wage abutilwe wozo wabezaga na muzigi wakisimana ku kuboko nu einikilwe Zera.