Yosefu nu mibuto zage.
Yosefu abezaga musikila wa myaka ikumi nu mutubakamo, nu alangaga mikoko nu mpene z'isi. Bakasia bage babezaga basikila ba tulemba tw'isi, u bana ba Biliha nu ba Zilpa. Yosefu asambalaga misagu mibi zabo ku isi.
3 Yakobo atundile Yosefu kutinga bango basikila bage, kubuno Yosefu abutilwe mu bukungu bwage. Yakobo akitide Yosefu ikoti lya nsulu nsoga nunse, z'idangi isoga. 4 Gamonine mibuto zage buno isi itilide kumutunda bamusombile nu tabavwamine kutendana nage moki mabota tondo makali.
5 Yosefu akesizie ndozi kindi kimozi, nu azilagwide ku mibuto zage, tondo bamusombile lingo kutinga ku kabamba ka ndozi. 6 Ababwide bunee: “Ungwililazi ndozi zane. 7 Mu ndozi, namonine tukukanda mikanda za mbuto munkatini mw'isoa. Kitangalabesi, mukanda wane wemanine kima nu mikanda zeinyu zatimbile nu kukumbama lwabusio lwago.”
8 Mibuto zage zamwakwide bunee: “Ndi ukutunda kutwangata? Ndi ukatwangata lebelebe?” Nu batalikide lingo kumusomba ku kabamba ka ndozi zage nu ka moki mage.
9 Lingo Yosefu akesizie ndozi, nu azilagwide ku mibuto zage. Abwide bunee: “Ungwililazi. Nakesizie na zengo ndozi. Muzo, kisongo kya busi nu mwezi nu nkeninkeni ikumi nu lumozi zankumbaminaga.” 10 Alagwide zezo ndozi ku isi, nu isi amuzugide bunee: “Ndozi nkizi zeno? Nyoko nu mibuto zobe nu nne, ndi lebelebe twavwe kuguli nu kukukumbamina?” 11 Mibuto zage zabezaga na lugi kweli tondo isi alangaga bitondo bibyo mu mutima wage.
Yosefu akunzibwa nu kwekwa ku Misri.
12 Mibuto za Yosefu bendile ku isoa lyabo lyabezaga bwigi na mwino wa Sekemu, kulisia bituganwa by'isibo mulyo. 13 Yakobo abwide Yosefu bunee: “Wizi buno mibuto zobe zikulisia mikoko bwigi na mwino wa Sekemu. Nkutunda kukusinga kubeli.”
Akwide bunee: “Busoga. Nili kayikayika kwenda.”
14 Ububo Yakobo amubwide bunee: “Enda umone ndi binsania bya mibuto zobe nu bya mikoko bili busoga, nu kusubania kundi nu kwenda ku Sekemu.”
16 Yosefu akwide bunee: “Nkulonda mibuto zane. Ndi unavwama kumbula kuni kubendile kulisia bituganwa byabo?”
17 Wozo wamulume amwakwide bunee: “Batukile gano. Nungule gabatendile bunee: ‘Twende ku Dotani.’” Ububo, Yosefu abayangile nu abasangile ku Dotani.
18 Bamumonine ko gaabezaga eikili bulazi nabo, nu lwabusio ntebasa bwigi nabo, bakalile kakungu ka kumwita. 19 Batendenne bunee: “Tamukumona? Nyene ndozi avwa. 20 Tukite buni? Tumwite, nu kwisa kitumba kyage mu kanuabalongo kamozi nu kutenda buno nyama nkali zamulile nu tumone buni bwabe ndozi zage.”
21 Rubeni ongule moki mabo, nu agelekile kumwonia mu maboko mabo. Atendile bunee: “Tatumwite! 22 Tumwise tugu mu wono muzinga guteli na mazi gano mu kalula, tondo tatumwite.” Rubeni atendile bubo kubuno akengede kumwonia, kumutikya mu muzinga nu kumusubania ku isi. 23 Gabasile Yosefu ku mibuto zage, bamutikizye ikoti lyage lya malebo lyabezaga nalyo, 24 bamukatile nu kumwisa mu muzinga gutabezaga na mazi.
25 Gababezaga bese balia, bamonine kitangalabesi baIsimaeli bakuvwa na ngamia zabo, batukaga ku Gileadi bakwenda ku Misri na bulago nu aliga nu ngenge buno bazikunzie ku Misri. 26 Yuda abwide mibuto zage bunee: “Mutali mukizi kutuli ndi twita mubuto weitu nu kubisa kitondo kikyo? 27 Vwazi, tumukunzie ku baIsimaeli nu tatubike maboko meitu kweli. Lebelebe eli mubuto weitu, wa kikanga kyeitu.” Mibuto zitabizizie, 28 nu gatingile baMidiani bamozi, mibuto za Yosefu zamutikizye mu muzinga nu bamukunzizie ku baIsimaeli ku bukunza bwa byindi makumi mabili bya feza. a BaIsimaeli bendile na Yosefu ku Misri.
29 Rubeni asubanizie ku muzinga, nu amonine buno Yosefu ntabezaga mo lingo. Ku kabebe kage, atile nsulu zage. 30 Asubanizie kuli mibuto nu alilile bunee: “Musikila nteli ko, buni bunikita?”
31 Nu beitile mpene nu batutikile nsulu za Yosefu mu mikila za mpene. 32 Bendile na nsulu za Yosefu kuli isibo nu bamubwide bunee: “Twakunzile zo mu nzila. Ndi nsulu zeno zili za mwana wobe?” 33 Azimenyine nu atendile bunee: “Ee, zili zage. Nyama nkali zamwitile. Mwana wane Yosefu alibwa.” 34 Yakobo atile nsulu zage ku kabebe kage, nu eivwalikizie ikunino. Alilide mwana wage bindi byingi. 35 Bango bana bage bamulume nu bakinga bavule kumubibya, tondo ntazigile kubibibwa. Atendile bunee: “Nkayikwa mu nsinda zane nikililila mwana wane.” Ububo Yakobo eizizizie akulilila mwana wage Yosefu.
36 Mu bindi bibyo, baMidiani babasile ku Misri na Yosefu, nu bamukunzizie ku Potifari, u musondelezia wa bakoloboyo ba numba za Farao.