Yakobo asubya ku Beteli.
35
1 Mu nkungu zezo Kalaga abwide Yakobo bunee: “Enda ku Beteli nu ikala kuko, obaka kasenga ka kayulo kundi gago ganidolesezie kuguli gawatinaga solonzi Esau.” 2 Ukinsa Yakobo abwide bansania ba numba zage, babo bansania babezaga gamozi nage bunee: “Tikyazi nkisi ngeni zimuli nazo, nu mwiyengie nu kugalukya nsulu zeinyu. 3 Nu kumbusa twendazi kubakama ku Beteli, gago ganobakide Kalaga kasenga ka kayulo. Eli Kalaga wanungule mu busi bwa kabebe kane nu wendile na nne kunsania kunendaga.” 4 Ububo bakasile Yakobo nkisi ngeni zabo insania nu malebo mabo ma matuzi, nu Yakobo aziyikile zinsania gansina muti wa mwalo guli ku Sekemu. 5 Kumbusa kwa kukita bubo, Yakobo alingile lugendo lwa kwenda ku Beteli, nu boba bwa Kalaga bwavule ku bantu, ukinsa tabayangile bana baYakobo. 6 Yakobo gamozi na bantu bage bansania babasile ku mwino Luzi, u Beteli, mu kisi kya Kanana. 7 Gago, obakide Kalaga kasenga ka kayulo, nu einikile kiziki kikyo Eli-Beteli, a kubuno gago u geidolesizie Kalaga kweli gaatinaga mubuto wage. 8 Debora, mulezi wakitilaga Rebeka, akule nu bamuyikile gansina muti wa mwalo wabezaga ku lulenge lwa kunsi ku Beteli. Bantu beinikile mwalo wozo bunee: “Mwalo wa kulila,” aba Aloni-Bakuti.
9 Kumbusa kwa kutuka ku Padani-Aramu nu kusubania kwa Yakobo ku Beteli, Kalaga eidolesizie lingo ku Yakobo nu amukasile mponga. 10 Kalaga amubwide bunee: “Izina lyobe lili Yakobo, tondo ntwamanwe lingo Yakobo. Izina lyobe liseli Israeli.” Bubo u bwinikilwe Israeli. 11 Nu Kalaga amubwide bunee: “Nne nili Kalaga wa Magala Mansania. b Witilile nu kuba mwingi. Wabute kilongo, ee, kilongo kinene, nu ukaba isi wa bakota. 12 Nakukase kisi kinakasile ku Abrahamu nu ku Isaka, nu nkakikasa ku ibuta lyobe.” 13 Nu Kalaga atukile kweli ga kiziki kyamutendaga. 14 Yakobo eimikile ikozi anga iyango lya kukengelezia gago gamutendaga Kalaga nu asongolezie maku nu mwambo galyo. 15 Einikile kiziki kikyo Beteli.
Lukuo lwa Rakeli nu lwa Isaka.
16 Yakobo atukile ku Beteli kwenda ku isi. Gababezaga mu nzila tabebasa ku Efurata, Rakeli asimukidwe nu abikile gansi. Kubuta kwabede kubibu kweli na lubaba lukali. 17 Gabezaga lubaba lwatinga bukali, musana amubwide bunee: “Ntukue boba, kubuno wabuta ungo musikila.” 18 Gaabezaga es'alekana, kubuno abezaga mukuzi, einikile mwana “Benoni,” c nu alekenne, tondo isi amwinikile “Benjamina.” d
19 Bubo u bwalekenne Rakeli mu nzila za kwenda ku Efurata, u Betelehemu. 20 Ga nsinda zage, Yakobo eimikile iyango, nu lili gago ga nsinda za Rakeli aaba nu lelo. 21 Yakobo endile lingo, nu akomine numba zage za hema kutinga numba za byindo zamanwa Ederi.
22 Geikalaga mu kikyo kisi, Rubeni eiyombekile na Biliha u kalemba k'isi, nu Israeli ongule ku wozo musagu wa mulondo.
Yakobo abezaga na bana bamulume ikumi nu babili. 23 Bana ba Lea u Rubeni, nkula za Yakobo, Simeoni, Lawi, Yuda, Isakari, nu Zebuluni. 24 Bana ba Rakeli u Yosefu nu Benjamina. 25 Bana ba Biliha, mukiti wa Rakeli u Dani nu Nafutali. 26 Bana ba Zilpa, mukiti wa Lea, u Gadi nu Aseri. Babano beli bana ba Yakobo baabutile gaabezaga ku Padani-Aramu.