Dina nu Sekemu.
34
1 Dina, mukinga wa Lea waabutide Yakobo, endile busi bumozi kutabangila bakinga nu bakikulu ba mu kikyo kisi. 2 Sekemu abezaga musikila wa Hamori muHivi, wabezaga mukota wa kilongo kikyo. Gamonine Sekemu ku Dina, amukatile nu eitalikide kweli. 3 Amonine buno Dina eli mbangilwa, amutundile nunse, nu atendile nage moki mabota. 4 Atendile ku isi bunee: “Nsongele mukinga wono.” 5 Yakobo ongule musagu wa kwitalikilwa kwa Dina, mukinga wage. Bana bage bamulume balangaga mikoko nu bituganwa byage mu kalula ka masoa ma kulisia bituganwa. Ububo ntatendile kena aaba nu kusubania kwabo ku numba. 6 Hamori, isi wa Sekemu, atabangile kutendana na Yakobo, 7 mu nkungu zabasile bana ba Yakobo kutuka ku kalula, bongule ku musagu wa mubitu wabo nu babede na kabebe nu bongoa bukali, kubuno Sekemu akitile kya nsoni mu Israeli, kwitalikila ku mukinga wa Yakobo, kitondo kitatunganana kuba. 8 Hamori ababwide bunee: “Mwana wane Sekemu akutunda kusonga mukinga weinyu. Itabiziazi kumusongia kweli. 9 Tusongelanazi; tukasazi bakinga beinyu buno tubasonge, nu inyuwe songazi bakinga beitu. 10 Mwavwame kwikala munkatini mweitu. Kisi kyeitu kili lwabusio lweinyu. Ikalazi mukyo, nu mwende mukyo anga bumukutunda, mukite mulimo weinyu nu kobaka mazumba meinyu.”
11 Nu Sekemu abwide isi nu babitu ba Dina bunee: “Nkwilazi kyombo nu namukase kinsania kimwantenda. 12 Ndi mwantenda bikulo byingi nunse nti namukase byo. Natunda kusonga mukinga wono tugu.”
13 Bana ba Yakobo bamwakwide mu bwengelezi kubuno eitalikide ku Dina, mubitu wabo. Babwide Sekemu nu Hamori isi bunee: 14 “Tabwakulungana buno tusongie mukinga weitu ku unsania utamonesizibwe. Kukita bubo buli nsoni kutuli. 15 Tondo tuneitabizia ndi mwakita kitondo kikino tugu. Mwatunganana kuba anga butuli, kumonesia bamulume beinyu bansania. 16 Kumbusa kwa kukita bubo, nti twitabizia kusongana na bakinga beinyu nu inyuwe na bakinga beitu. 17 Tondo ndi tamwitabizia kumonesia bamulume bansania, nti twatole mukinga weitu nu twiyendele.”
18 Moki mamano mabezaga masoga ku Sekemu nu Hamori, 19 nu musikila wabezaga ntundu mu kikanga ky'isi asasizie kukita anga bubatendile, kubuno abogilebogile na mukinga wa Yakobo. 20 Ububo Hamori nu Sekemu bendile ku lusu lwabezaga bwigi na mwingilo wa mwino wabo kutendana na bantu ba mwino. 21 Bababwide bunee: “Bantu babo beli beida beitu. Beikale mu kilongo kyeitu nu kukita mulimo mukyo. Kisi kili kinene kutuli nu kubeli gamozi. Tunavwama kusonga bakinga babo, nu bo basongane na bakinga beitu. 22 Tugu beitabizia kwikala n'iswe nu kuba kilongo kimozi ndi twitabizia kumonesia bamulume beitu bansania, anga bubamonesizibwe. 23 Ndi bikulo byabo nu bituganwa byabo tabinaba byeitu? Twitabiziazi tugu ikakizio lyabo buno beikale munkatini mweitu.” 24 Bantu bansania ba mwino wozo beitabizizie moki matendile Hamori nu Sekemu nu bamulume bansania ba mwino bamonesizibwe.
25 Ku busi bubo bw'isatu, kumbusa kwa kumonesibwa, gababezaga bansania beikili na mbabazio, bana babili ba Yakobo, Simeoni nu Lawi, batolile myene zabo za nganda nu bendile mu mwino. Takwabezaga wampa wa kubakengelela bungo, nu beitile bamulume bansania. 26 Beitile Hamori nu Sekemu mwana wage na myene zabo za nganda, nu batolile Dina nu kumutikya mu numba za Sekemu, nu bendile kwabo. 27 Bamulume bansania ba Yakobo bavule ku mwino ku bitumba bya babo beitilwe, nu banyagile binsania bya mu mwino mwitalikidwe mubitu wabo. 28 Batolile bituganwa binsania bya mwino, mikoko nu mpene nu ngombe nu mpunda, nu ntiko insania za bantu ba mwino; binsania byabezaga mu mwino aba mu masoa mabo. 29 Bendile na ntiko zabo insania nu bakikulu babo bansania nu bana bansania, kunyaga binsania bya numba na numba.
30 Yakobo abwide Simeoni nu Lawi bunee: “Mwandubikania nu kundusizia lukumu lubi ku beiya kisi, baKanana nu baPerizi. Tuli bakeke nunse nu ndi beitabizania kukundamana ku bita kutuli, nne nu bansania ba numba zane nti twazikibwe.”
31 Tondo bamwakwide bunee: “Ndi buli busoga bubakitide mubitu weitu anga kitazi?”