Yakobo asekelana na Esau.
33
1 Yakobo alambwide meiso nu amonine ku kuvwa Esau na bantu nkama inazi. Ku bubo abeganizie bana ku Lea, Rakeli nu bakiti babo babili. 2 Asingile bakiti na bana babo lwabusio lwa bango, nu Lea nu bana bage munkatini nu Rakeli nu mwana wage Yosefu kumbusa. 3 Nu we wenyene endile lwabusio lwa bansania nu gaabasile bwigi n'iselenzi akumbaminne lwabusio lwage mambizi mutubakamo. 4 Tondo Esau eitumine lubilo kumusekela, nu amutingizie maboko g'ikosi nu kumumuma ku matama. Nu bobabili balilile. 5 Gaagebilegebile, amonine ku bakikulu nu bana nu abuzizie bunee: “Ba nazi babano beli nobe?” Yakobo akwide bunee: “Babano beli bana bakasile Kalaga ku mukiti wobe mu mponga.” 6 Nu bakiti bakundile na bana babo nu kukumbama lwabusio lwa Esau. 7 Kumbusa kwa babo, Lea akundile na bana bage nu kukumbama, nu kumbusa kwabo Rakeli nu Yosefu bakundile nu kukumbama ku Esau.
8 Esau abuzizie bunee: “Bwisulilwa bukizi bwa bibyo bibombo binakulumenne nabyo mu nzila?”
Yakobo akwide bunee: “Tatane, nabisingile buno nimone mponga ku meiso ma mukota wane.”
9 Tondo Esau akwide bunee: “Muto wane, nili na byakuka. Sigala na byobe nu kubilanga.”
10 Yakobo abwide bunee: “Kilo, tatane nkukusega. Ndi namona mponga zobe, itabizia kukata lukaso luluno lunakukasa. Kubuno kundi kumonana nobe meiso ku meiso kuli anga kumonana na Kalaga meiso ku meiso, kubuno wansekede busoga. 11 Ndi bwakutananizia, itabizia kukata lukaso lunasingile kuguli, kubuno Kalaga ankwilide kyombo nu kunkasa mponga, nu nili na byakuka.” Kubuno Yakobo eizizizie kutendatenda, Esau eitabizizie nu atolile lukaso lulo ku maboko ma Yakobo.
12 Kumbusa Esau atendile bunee: “Twendazi mu nzila gamozi. Namusondelezie.”
13 Tondo Yakobo akwide bunee: “Mukota wane eizi buno bana beli basosu nu natunganana kulanga mabuti ma mikoko nu ma ngombe meli na byana bikumoma. Ndi tukumenzia lubilo aba busi bumozi tugu, nti lusumba lunsania lwakue. 14 Ububo wendage lwabusio nu nne nendage bukebuke anga bwavwama bituganwa byingi byane, nu anga bukuvwama kwenda bana bane, aaba nu ganabase ku mukota wane ku Seiri.”
15 Esau abwide bunee: “Busoga, tondo itabizia buno nisige bamozi ba bantu bane nobe.”
Tondo Yakobo akwide bunee: “U buni bubo? Mukota wane, nkwile kyombo tugu.” 16 Nu mu bubo busi Esau alingile lugendo lwa kusubya ku Seiri, u kisi kyage, 17 nu Yakobo endile ku Sukoti, nu eiyobakide hema zage nu za bantu bage nu kobaka mikumba za bituganwa byage. Ukinsa kikyo kiziki kyinikilwe Sukoti.
18 Gaasubanizie kutuka ku Padani-Aramu, abasile bulonge bukata ku mwino wa Sekemu mu kisi kya Kanana, nu obakile ido lyage bwigi na wozo mwino. 19 Akunzile kiziki kyobakile ido ku baHamori ba mwino wa Sekemu ku byindi lukama bya feza. 20 Nu gago, obakile kasenga ka kayulo nu akeinikile Eli-Elohe-Israeli. a