Yakobo alongeka byage kusekela Esau.
32
1 Yakobo endile lingo mu nzila zage nu amonine ku banzelo ba Kalaga nu bamusekede. 2 Atendile bunee: “Gano geli ido lya Kalaga,” nu inikile kiziki kikyo Mahanaimu. a 3 Yakobo asingile migenzi lwabusio lwage ku Esau iselenzi, gaabezaga mu kisi kya Seiri, u kalula ka Edomu. 4 Abakakizizie kutenda bunee: “Nne Yakobo u mukiti wobe, nikalaga na Labani nu nasigede nage aaba nu bindi bibino. 5 Nili na bakiti bamulume nu bakiti bakikulu, nu lingo nili na bituganwa nu mpunda, nu mpene nu mikoko. Kano kaluma nkusinga musagu wono ku mukota wane buno nimone ku kyombo nu mponga zobe.”
6 Gasubizie migenzi kuli Yakobo, bamubwide bunee: “Twendile ku solonzi Esau, nu eseli mu nzila za kuvwa kukusekela, nu eli na bantu nkama inazi gamozi nage.” 7 Yakobo akule boba nunse. Abeganizie bantu nu nyama zage, mikoko nu ngombe nu ngamia, ku bibombo bibili. 8 Akengede ndi Esau alinga kwitana na kibombo kimozi, nti kingo kyavwama kutina.
9 Mu nkungu zezo Yakobo asegile bunee: “Kalaga wa tatane Abrahamu nu wa tatane Isaka, ee Yehowa, wantendile bunee: ‘Subania ku kisi kyobe nu ku mibuto zobe nu nakukitile binsania busoga.’ 10 Nsyakuka mponga nu kyombo kiwankitila, nne mukiti wobe. Ganendile nu kusoka Yordani, nabezaga na kati kane tugu, tondo kano kaluma nili na bibombo bibili. 11 Nakusega kunonia ku kuboko kwa zezine Esau, kubuno nakua boba buno avwa nu kwitana na nne, nu bana gamozi na baninabo nu banili nabo. 12 Tondo wandagile bunee: ‘Nakite buno ube busoga nu kwitizia bana bobe buno maganzo mabo mabe anga misege za kitatenge zitanavwama kuganzwa.’”
13 Asegaga kindi kinsania nu mu nindunindu, asombwede mu byage binsania, lukaso lwa kukasa Esau iselenzi, 14 mabuti ma mpene nkama ibili nu bilimba bya mpene makumi mabili, mabuti ma mikoko nkama ibili nu bilimba bya mikoko makumi mabili, 15 nu mabuti ma ngamia makumi masatu makumomia, gamozi na byana byamo nu mabuti ma ngombe makumi manazi nu balume ba ngombe ikumi, nu mabuti ma mpunda makumi mabili nu byana byazo ikumi. 16 Azibeganizie ku bibombo bya lukita na lukita, nu abikasile ku balangi, na kibombo na kibombo wakyo, nu abwide babo balangi bunee: “Endazi lwabusio lwane, nu sigazi mpapa gasamba kibombo na kibombo.” 17 Nu akakizizie mutangi bunee: “Kungwa wakulumana na zezine Esau nu akubuzia bunee: ‘Uli mukiti wa nazi? Nu kuni ku ukwenda? Nu bituganwa bibino bili bya muntu mukizi?’ 18 Nti wamubula bunee: ‘Bituganwa bibino bili bya mukiti wobe Yakobo, nu akubisinga kuguli mukota Esau anga lukaso, nu Yakobo wenyene akuvwa kumbusa kwane.’” 19 Akakizizie mulangi wa kibombo na kibombo anga bwakakizizie mulangi wa kibombo kitangi. Ababwide bunee: “Tendazi moki mamo ku Esau gamwakulumane nage.” 20 Lebelebe mwatunganana kutenda kweli bunee: “Yakobo wenyene akuvwa kumbusa kweitu.” Akengede bunee: “Nimubibye nu kumubobelezia na nkaso zeno, nu ganakulumane nage, nti ansigilile ku bwagi bunamukitide.” 21 Yakobo asingile nkaso lwabusio lwage, kibombo na kibombo, tondo wenyene asigede mu ido kindi kikyo.
22 Mu kikyo kindi, Yakobo ayukile nu ayukizie bakazi bage babili nu bilemba byage bibili nu bana bamulume bage ikumi nu umozi, nu asokile luuzi Yaboki. 23 Kumbusa kwa kusokya babo bantu bansania, Yakobo asokezie bituganwa byage binsania nu bintu byage binsania. 24 Nu Yakobo abezaga wenyenenyene tugu ku mutili wa luuzi, nu muntu alwanine nage aaba nu kukya kwa busi. 25 Gamonine wozo muntu buno ntavwama kukinda Yakobo, amulibwide mu lutungi nu lutungi lwage lwagenyukile gaalwanine nage. 26 Wozo muntu abwide bunee: “Nsige niyendele kubuno busi bwakya.”
Yakobo akwide bunee: ‘‘Nsyakusige ndi ntwankasa mponga.”
27 Nu wozo muntu amubuzizie bunee: “Izina lyobe nazi?”
Amwakwide bunee: “Yakobo.”
28 Nu wozo amwakwide bunee: “Izina lyobe talyabe lingo Yakobo, b tondo libe Israeli, c kubuno walwanine na Kalaga nu na bantu nu wakindile.”
29 Yakobo amubuzizie bunee: “Izina lyobe nazi?”
Tondo akwide bunee: “Kubuni wambuzia izina lyane?” Nu wozo muntu akasile Yakobo mponga. 30 Yakobo einikile kiziki kikyo Penueli, kubuno atendile bunee: “Namonana na Kalaga meiso ku meiso nu nsyakua tondo nona.” 31 Mu kusanuka kwa busi, Yakobo atingile Penueli, nu akililaga ku kabamba ka lutungi lwage. 32 Aaba nu lelo baIsraeli tabakuliaga muki wa lutungi lwa nyama kubuno Yakobo alibwidwe na Kalaga ku lutungi lwage.