Yakobo atina nu kusiga Labani.
31
1 Yakobo ongule byatendaga bana ba Labani bunee: “Yakobo eibile binsania byabezaga na tateiswe, nu akatile bikulo bibino binsania ku ntiko zabezaga na tateiswe.” 2 Yakobo amenyine buno kilungi kya Labani kyagaluka nu ntamutundile anga bwamutundaga mu kulinga. 3 Mu nkungu zezo Yehowa abwide Yakobo bunee: “Subania ku kisi kya baso nu ku mibuto zobe, nu Nne nabe gamozi nobe.” 4 Ububo Yakobo asingile mugenzi kuli Rakeli nu Lea buno bavwe mu kalula kwabezaga lusumba lwage. 5 Gababasile, ababwide bunee: “Namona buno lutundo lwa soinyuwe taluli kundi lingo anga bulwabezaga mu kulinga, tondo Kalaga wa tatane abezaga na nne. 6 Mwizi buno nakitilaga soinyuwe na magala mane mansania, 7 tondo soinyuwe anengelede mu kugalukya lukalilo lwane mambizi ikumi. Tondo Kalaga ntazigile buno ankitile bubi. 8 Gatendile soinyuwe bunee: ‘Lukalilo lwobe luli byana bya mikoko byili na matondoki,’ nti mabuti mansania mabutile byana na matondoki. Gaatendile bunee: ‘Byana byili na milili byili lukalilo lwobe,’ nti mabuti mansania mabutile byana na milili. 9 Bubo, Kalaga atikizye mikoko ku soinyuwe nu ankasile zo.
10 Nu mu nkungu zabezaga bilimba bya mpene bakububa mabuti, namonine mu ndozi, bilimba bya mpene byabubaga lusumba, byabezaga na matondoki nu milili. 11 Mwanzelo wa Kalaga antendile mu ndozi bunee: ‘Yakobo.’ Nakwide bunee: ‘Nili gano.’ 12 Nu ambwide bunee: ‘Lola, bilimba binsania bikububa mabuti bili na matondoki nu milili kubuno namonine ku binsania byakukitide Labani. 13 Nili Kalaga wa Beteli, gago gawasongolokizie mwambo g'ikozi, nu wankitide kilumbilo. Kano kaluma tuka kitangalabesi mu kisi kikino, kusubya ku kisi kyobe.’”
14 Rakeli nu Lea bamwakwide bunee: “Ndi tuli lingo na kena aba ka kwiyana mu numba za tateiswe? 15 Ndi ntakukengela buno tuli anga bageni tugu? Ntatukunzisizie tugu, tondo alide isigi linsania liwatikizye. 16 Lebelebe bikulo binsania byatikizye Kalaga ku tateiswe bili byeitu nu bya bana beitu. Ukinsa kita anga bwakutenda Kalaga.”
17 Kumbusa kwa kutenda nabo, Yakobo azanzukile nu abikile bana gamozi na bakikulu bage ga ngamia, 18 nu asingile bituganwa byage binsania, kusubania ku isi Isaka mu kisi kya Kanana. Endile na binsania byakatile mu Padani-Aramu. 19 Labani endile ku lusumba lwage lwa mikoko kwalula myoza zazo. Mu nkungu zezo, Rakeli eibile nkisi z'isi. 20 Yakobo engelede isibyala Labani mu Aramu, kubuno ntamulagile. 21 Bubo u bwongolokile Yakobo mu lumbisombiso. Atinine na binsania byabezaga byage, nu asokile Luuzi Furati, nu endile mu nzila zenda ku mwiduko wa Gileadi.
Labani ayanga Yakobo.
22 Ku kindi kya bisatu, Labani ongule musagu wa kutina kwa Yakobo. 23 Labani amanine mibuto zage nu ayangile Yakobo lugendo lwa bindi mutuba, nu ku busi bwa mutubakamo amusangile ku mwiduko wa Gileadi. 24 Mu kindi kikyo, Kalaga eidolesizie ku Labani mu ndozi, nu amubwide bunee: “Widange. Ntutende ku Yakobo kitondo kisoga aba kitondo kibi.” 25 Yakobo abezaga mu ido lyage gamusangile Labani, nu Labani abezaga n'ido lyage ku ungo mwiduko, tondo bwigi n'ido lya Yakobo, mu kisi kya Gileadi.
26 Mu nindunindu, Labani abwide Yakobo bunee: “Kikizi kiwakitile? Kubuni wanengelede nu kuvwa na bakinga bane anga bakatwa mu bita? 27 Kubuni watinine ku lumbisombiso nu kunengelela? Kubuni ntwankengelezizie? Ninakusigile kwenda mu kyelele nu mu mbogimbogi, kwimba na ngoma nu bindanda. 28 Ntwazigile nalaga bayukulu bane nu bakinga bane, aba kubatenda bunee: ‘Mwende busoga.’ Wakitile anga kikongolo. 29 Nili na bwangato kukukitila bubi, tondo mu kindi Kalaga wa so antendile bunee: ‘Widange. Ntutende ku Yakobo kitondo kisoga aba kitondo kibi.’ 30 Wongolokile nu watinine kubuno uli na malima ma kusubania kuli so. Kubuni wibile nkisi zane?”
31 Yakobo akwide Labani bunee: “Nakule boba kubuno nakengede buno wantikye bakinga bobe ku magala. 32 Tondo ndi wamona unsania uli na nkisi zobe, nti akue. Lwabusio lwa mibuto zeitu, lola uwenyene ndi kuno kuli kimozi kyobe ku byane. Ndi wamona ku kimozi kyobe, nti wenda nakyo.” Tondo Yakobo ntamenyine buno Rakeli eibile nkisi z'isi.
33 Labani alondile mu numba za hema za Yakobo, nu za Lea, nu za bakiti babili bakikulu, nu ntamonine ku zage. Kumbusa kwa kubasa mu numba za hema za Lea, eingide mu numba za hema za Rakeli. 34 Rakeli atolile nkisi za Labani nu azibikile mu nsulu za kwikala ga ngamia, nu eikalide kuzo. Labani alondile mu binsania bya numba, nu ntamonine ku kena. 35 Rakeli atendile isi bunee: “Tatane, ntunongelwe kubuno nsyemane lwabusio lwobe, kubuno nili na lusambo lwa mwezi.” Ububo Labani alondile tondo ntamonine nkisi zage.
36 Yakobo ongedwe Labani nu asakile nage. Atendile bunee: “Buni bunakwagide? Bwagi bwane buli bukizi buno wanyangile? 37 Ndi wamonine kyampa kyobe gawalondile mu binsania byane? Wamonine kikizi kyobe? Kibike gano lwabusio lwa mibuto zobe nu zane, nu basese mulondo gatusamba. 38 Nikede nobe myaka makumi mabili. Mpene nu mikoko zobe tazabikile gansi bulia, nu nsyalide bilimba byobe bya mikoko. 39 Nsyaganzile zezo zeitilwe na nyama nkali zili zobe, tondo naganzile zili zane nu naziminwe nazo. Tondo wabuzizie nikusubizie mikoko aba mpene zibilwe mu musi aba mu kindi. 40 Nabezaga anga bubuno: busi na busi muzuzo wankindaga nu mu kindi nakule na mpego nu nsyavwamine kwiyombeka. 41 Kwabezaga bubo zezo myaka makumi mabili zinakukitide. Nakukitide myaka ikumi nu inazi buno nisonge bakinga bobe, nu myaka mutuba ku lusumba lwa mikoko nu mpene, nu wagalukizye nkalilo zane mambizi ikumi. 42 Songo Kalaga wa tatane, Kalaga wa Abrahamu nu wa Isaka, a ntabezaga gamozi na nne, songo wansingile geteli kena. Tondo Kalaga amonine ku mbabazio zane nu ku milimo zinakitile, nu mu kindi akuzugide.”
43 Labani akwide Yakobo bunee: “Bakikulu bobe beli bakinga bane, nu bana bobe beli bayukulu bane, nu lusumba luli lwane. Binsania biwamona bili byane. Tondo lelo nikite buni ku bakinga bane nu bana bababutile? 44 Ukinsa kano kaluma tukite idagano gatusamba, nu libe bulongeki gatusamba.”
45 Ububo Yakobo eimikile ikozi anga iyango. 46 Akakizizie mibuto zage kutola makozi nu kumakungika ku lilyo lyimikile. Ububo bakungikile makozi, nu balide gago ga kitulu kyamo. 47 Labani einikile makozi Yegari-Sahaduta, b tondo Yakobo ameinikile Galedi. c. 48 Labani abwide bunee: “Iyango lilino lili bulongeki gatusamba.” Ububo bantu balyinikile Galedi. 49 Lyinikilwe lingo Misipa, d kubuno atendile bunee: “Yehowa alange gatusamba nkungu zitwalekanuke. 50 Ndi wakita bubi ku bakinga bane, aba ndi wasonga bango bakikulu, nu takuli umozi wa kunsambalila musagu wozo, nti buli busoga kukengela buno Kalaga eli mulongeki gatusamba nobe. 51 Gano geli makozi manakungikile, nu gano geli iyango linalindizie gatusamba. 52 Makozi mamano nu iyango lilino bili bulongeki buno nsyatinge makozi kukukitila bubi nu ntwatinge ku lulenge lwane kunkitila bubi. 53 Kalaga wa Abrahamu nu Kalaga wa Nahori, u Kalaga w'isi, asese mulondo guli gatusamba.” Ububo Yakobo alumbide idagano lilino ku izina lya Kalaga e wa Isaka isi. 54 Akitile kayulo nu abuzizie mibuto zage kulia ku kisagulo kyakitile. Kumbusa kwa kulia beiyombekile tulo mu kindi kikyo. 55 Lukesikesi, Labani alagenne na bana bage nu bakinga bage, nu kubakasa mponga; abasigile, nu asubizie kwage.