30
1 Gamonine Rakeli buno ntabutile mwana aba umozi na Yakobo, abede na lugi ku iselenzi, nu abwide Yakobo bunee: “Mpe bana. Ndi tabubo, nti nakua.” 2 Yakobo amongedwe nu amwakwide bunee: “Ndi nili Kalaga utakuziga wabuta bana?”
3 Nu Rakeli amwakwide bunee: “Lola mukiti wane Biliha. Iyombeke nage buno ambutile mwana, nibe na bana nu nne mweli.” 4 Ububo amukasile mukiti wage Biliha buno abe mukazi wage. Yakobo eiyombekile nage, 5 nu ekile iyimi nu abutile mwana wamulume. 6 Nu Rakeli atendile bunee: “Kalaga ambingizie nu ongule isego lyane nu kunkasa mwana wamulume.” Ku kabamba kako amwinikile Dani. 7 Biliha, mukiti wa Rakeli, ekile iyimi lingo limbizi, nu abutile mwana wa babili, musikila. 8 Kumbusa kwa kubutwa kwa mwana wozo, Rakeli atendile bunee: “Nabede n'iyali na zezine nu nakindile.” Ububo einikile wozo mwana Nafutali.
9 Gamonine Lea buno ntakubuta lingo, atolile mukiti wage nu amukasile ku Yakobo buno abe mukazi wage. 10 Zilpa mukiti wa Lea abutide Yakobo mwana wamulume, 11 nu Lea atendile bunee: “Bunene bukizi!” Nu einikile mwana wozo Gadi. 12 Zilpa abutile ungo mwana wamulume, 13 nu Lea atendile bunee: “Nili na kyelele! Kubuno bamukazi bammane buno nkubogaboga.” Ububo amwinikile Aseri.
14 Mu bindi bya kutubula ngano, Rubeni endile ku isoa nu amonine biyikanwa bimozi byamanagwa dudai mu isoa, nu abikalile nu kwenda nabyo ku nina Lea. Rakeli abwide Lea bunee: “Mpe ku dudai za mwana wobe, ndi bwakutananizia.”
15 Tondo Lea amwakwide bunee: “Ndi tabwakuka kuguli kuntikya iba wane? Ndi ukutunda kuntikya nu dudai za mwana wane?”
Rakeli amubwide bunee: “Ndi wankasa ku dudai za mwana wobe nti Yakobo eiyombeke nobe lelo.”
16 Ububo gasubizie Yakobo ku numba kutuka ku isoa mwigolo lya busi, Lea endile kutendana nage nu amubwide bunee: “Wiyombeke na nne lelo kubuno naligile dudai za mwana wane.” Ububo Yakobo eiyombekile na Lea mu kikyo kindi.
17 Kalaga ongule isego lya Lea, nu Lea ekile iyimi nu abutile na Yakobo musikila wa batano. 18 Nu Lea atendile bunee: “Kalaga ankasile lukalilo kubuno nakasenne mukiti wane ku iba wane.” Ububo einikile mwana wozo Isakari. 19 Lea ekile lingo iyimi nu abutile musikila wa mutuba. 20 Nkungu zezo Lea atendile bunee: “Kalaga ankasa lukaso lusoga. Kano kaluma iba wane anankutya kubuno namubutila basikila mutuba.” Ububo amwinikile Zebuluni. 21 Kumbusa abutile mukinga winikilwe Dina. 22 Nu Kalaga akengede Rakeli. Ongule masego mage nu amukasile kubuta. 23 Ekile iyimi nu abutile musikila. Atendile bunee: “Kalaga atikizye nsoni zane.” 24 Einikile mwana Yosefu, nu atendile lingo bunee: “Yehowa antalikile ungo mwana.”
Mikoko za Yakobo zetila.
25 Kumbusa kwa kubutwa kwa Yosefu, Yakobo abwide Labani bunee: “Nsige nisubye ku kisi kyane. 26 Mpe bakazi bane nu bana, babo banakitilaga mulimo kwobe nu nende kwane. Wizi milimo insania zinakukitilaga.”
27 Tondo Labani amwakwide bunee: “Ndi wankwila kyombo ikala gano, nkukusega. Nkusongolola buno Yehowa ankasile mponga ku kabamba kobe. 28 Mbule lukalilo lwobe, nakuligelo.”
29 Yakobo akwide bunee: “Wizi buni bunakukitide nu bwitilide lusumba lwobe. 30 Lusumba lwobe lwabezagile lukeke nti nsivwa, tondo kano kaluma luseli lunene nu Yehowa akukasile mponga nunse ku kabamba kane. Kano kaluma nkungu nkizi nu nne zinikakitila kikanga kyane?”
31 Labani amubuzizie bunee: “Nakukase kikizi?”
Yakobo akwide bunee: “Ntwankase kena. Tondo ndi witabizia kukita anga bunkutenda, nti nitabizia kwikala nobe. 32 Lelo, nitikye ku lusumba lwobe, mukoko na mukoko guli na matondoki aba bitondi, nu byana bya mikoko byili byina, nu mpene insania zili na matondoki. Zezo zibe lukalilo lwane. 33 Bulili bwane bukandongekela mu bindi bikavwa, gawalole ku lukalilo lwane; mpene insania ziteli na matondoki aba mikoko ziteli zina nti zaganzwe buno nazibile.”
34 Labani abwide Yakobo bunee: “Nitabizia. Bube anga buwatendile.” 35 Busi bubo Labani atikizye bilimba bya mpene binsania byabezaga na matondoki aba milili, nu mabuti ma mpene mansania mabezaga na matondoki aba milili zenga, nu byana bya mikoko byina nu abikasile binsania ku bana bage. 36 Asingile bana bage na bituganwa bibyo lugendo lwa bindi bisatu kubilekanukya na Yakobo, tondo Yakobo asigede kuko nu kulanga lusumba lwa Labani lwasigede.
37 Yakobo akatile ntabi mbisi za miti za mulubna, nu mulozi nu mwaramoni, nu akitile milili zenga muzo. 38 Azibikile insania mu migezi za kunusia mikoko buno mpene nu mikoko zizimoneko gazanue mazi. 39 Mabuti mabede na meimi mu nkungu za kunua mazi ku migezi bwigi na ntabi, nu mabutile byana byili na matondoki nu milili zenga. 40 Yakobo alekanukizye byana bya mikoko nu abikile zezo zabezaga na milili gamozi, zezo zabezaga zina mu lusumba lwa Labani. Bubo u bwalekanukizye lusumba lwage na lwa Labani. 41 Gekaga mabuti ma mikoko meimi, Yakobo abikaga ntabi zezo na milili zenga ku migezi buno mabuti manene meke meimi bwigi na ntabi, 42 tondo ndi mabuti mabezaga masosu, ntabikile ntabi zezo ku migezi. Mu bubo, mikoko misosu zabezaga za Labani, tondo zezo minene nu za magala zabezaga za Yakobo. 43 Mu kukitaga bubo, Yakobo abede mugumi na lusumba lunene nu mingi za mpene nu za mikoko, nu abede na bakiti bamulume nu bakiti bakikulu beingi nu lingo abede na ngamia nu mpunda ningi.