Yakobo abasa ku numba za Labani.
29
1 Yakobo endile aaba nu kubasa ku kisi kya bantu bamanagwa babo ba kukutukaga kisongo kya busi. 2 Alolile nu amonine ku kanuabalongo kabezaga mu isoa lya kulisia mikoko, nu bibombo bisatu bya mikoko byabunda bwigi na kanuabalongo kubuno gago u ganusagia balangi mikoko. Kwabezaga ikozi lyakakukilaga, nu lyabezaga inene. 3 Gabezaga bibombo binsania byakundamanaga gago, balangi batikagia ikozi anga kyuki kya kanuabalongo kunusia mikoko, nu kumbusa nti balisubya lingo. 4 Yakobo abuzizie balangi ba mikoko bunee: “Mibuto zane, muli bantu ba kuni?”
Bamwakwide bunee: “Tuli ba ku Harani.”
5 Ababuzizie lingo bunee: “Ndi mwizi Labani, muyukulu wa Nahori?”
Bakwide bunee: “Ee, tumwizi.”
6 Nu Yakobo ababuzizie bunee: “Ndi eli na magala?”
Bakwide bunee: “Ee, eli na magala nu ntukumona mukinga wage Rakeli es'avwa na mikoko zage.”
7 Yakobo abakwide bunee: “Lolazi, busi tabwida, tazili nkungu za kukundamania mikoko. Busoga kuzinusia nu kuzisondelezia lingo ku kiziki kya kuzilisizia.”
8 Tondo bakwide bunee: “Tatunavwama aaba nu gakundamane bibombo binsania gano nu twatikye ikozi ku kanuabalongo. Ububo twanusie mikoko.”
9 Gaabezaga eki atenda nabo, Rakeli abasile na kibombo kya mikoko ky'isi kubuno abezaga mulangi wa mikoko. 10 Nkungu zamonine Yakobo ku Rakeli mukinga wa Labani wabezaga mubitu wa nina nu ku mikoko za Labani, endile ku ikozi nu kulikumbia ku kanuabalongo, nu anusizie mikoko z'iselenzi. 11-12 Yakobo abwide Rakeli buno eli mubuto w'isi u mwana wa Rebeka, nu amumumine ku matama nu alingile kulila. Ububo Rakeli eitumine lubilo kusolela isi.
13 Nkungu zongule Labani ku musagu wa Yakobo, u mwana wa mubitu wage, kitangalabesi eitumine lubilo kumusekela. Amwagatile nu kumuma ku matama nu endile nage kwage, nu mu numba Yakobo amusolede binsania. 14 Labani amubwide bunee: “Lebelebe uli musolo wane.”
Yakobo asonga Lea nu Rakeli.
Nu Yakobo eikede na Labani mwezi umozi, 15 Labani amubwide bunee: “Uli mubuto weitu, tondo tabuli busoga kunkitila bulia geteli lukalilo. Mbule lukalilo lwobe.”
16 Labani abezaga na bakinga babili. Izina lya nkula lyabezaga Lea, nu lya muto wage lyabezaga Rakeli. 17 Lea abezaga na meiso matamba, tondo Rakeli abezaga musoga nu mbangilwa nunse. 18 Yakobo atundile nunse Rakeli, nu abwide Labani bunee: “Nkakukitila myaka mutubakamo buno nisonge mukinga wobe Rakeli.”
19 Labani akwide bunee: “Ee, busoga. Buli busoga buno nimusongie kuguli kutinga kumusongia ku ungo wamulume. Ikala na nne.” 20 Ububo Yakobo akitide Labani myaka mutubakamo buno asonge Rakeli, tondo myaka zezo zamonekile kweli buno bindi bikeke, ta byingi ku kabamba ka lutundo lwabezaga nalo kweli.
21 Kumbusa kwa myaka mutubakamo Yakobo atendile ku Labani bunee: “Nkungu zakuka. Mpe mukikulu wane, nkutunda kumusonga.” 22 Nu Labani abakitide kisagulo ky'isonga nu asegile bantu bansania ba mwino kuvwa kukyo. 23 Mu kikyo kindi, atolile mukinga wage Lea nu amukasile ku Yakobo, nu we eiyombekile nage. 24 Labani akasile mukinga wage Lea mukiti wamanagwa Zilpa buno abe mukiti wage. 25 Mu nindunindu, Yakobo amonine kasi buno abezaga Lea! Ububo atendile ku Labani bunee: “Buni buwankitide? Nakukitilaga ku kabamba ka Rakeli. Kubuni wanengelela?”
26 Labani akwide bunee: “Ku kisi kyeitu, taluli lukita lweitu kusongia mukinga wa babili lwabusio lw'iselenzi ntesongwa. 27 Sililizia izinga ly'isonga lya mukinga wono, nu kumbusa twakukase muto wage buno abe mukazi wobe ku ingo myaka mutubakamo za mulimo.”
28 Yakobo eitabizizie nu asililizizie izinga lya Lea, nu kumbusa Labani amukasile Rakeli buno abe mukazi wage. 29 Labani akasile mukinga wage Rakeli mukiti wamanagwa Biliha buno abe mukiti wage. 30 Yakobo eiyombekile na Rakeli nu atundile Rakeli kutinga Lea. Akitide Labani ingo myaka mutubakamo.
Yakobo abuta bana.
31 Gamonine Yehowa buno Lea agilwa; amukasile ibuta, tondo Rakeli abezaga mugumba. 32 Lea ekile iyimi nu abutile mwana wamulume. Atendile bunee: “Yehowa amonine ku kabebe kane, nu kano kaluma iba wane anantunda.” Einikile mwana Rubeni. 33 Lingo limbizi ekile iyimi nu abutile ungo mwana wamulume nu atendile bunee: “Yehowa ankasile musikila wono gamozi na nkula, kubuno amenyine buno nasombwa.” Amwinikile Simeoni. 34 Lingo ekile iyimi nu abutile mwana wamulume wa basatu. Atendile bunee: “Kano kaluma mu luluno, iba wane alandane na nne kubuno namubutila bana basatu bamulume.” Nu amwinikile Lawi. 35 Lingo ekile iyimi nu abutile ungo mwana wamulume, wa banazi, nu atendile bunee: “Lilino limbizi, nkuganuna Yehowa.” Amwinikile Yuda, nu amenkile kubuta.