Yakobo enda ku Harani.
28
1 Ububo Isaka amanine Yakobo nu amukasile mponga nu kumukakizia bunee: “Ntusonge mukikulu wa baKanana. 2 Enda yiliyili ku Padani-Aramu, ku kikanga kya Betueli u isi wa nyoko, nu kusonga mukinga wa babo baLabani, mubitu wa nyoko. 3 Kalaga wa Magala Mansania a akukase mponga, nu kukwitizia aaba nu wabe kilongo kinene. 4 Akukase mponga zaakasile ku Abrahamu, uwe nu kikanga kyobe buno wiyane kisi kiguli mukyo anga mugeni, kisi kyakasile Kalaga kuli Abrahamu.” 5 Isaka asingile Yakobo ku Padani-Aramu, nu Yakobo endile ku Labani wozo wabezaga mwana wa Betueli muAramu, mubitu wa Rebeka, u nina wa Yakobo nu Esau. 6 Esau ongule musagu buno isi akasile Yakobo mponga nu kumusinga ku Padani-Aramu kusonga mukikulu wa kikyo kisi, nu mu mponga zage ku Yakobo, Isaka amukakizizie bunee: “Ntusonge mukikulu wa Kanana.” 7 Nu ongule buno Yakobo anzile isi nu nina nu endile ku Padani-Aramu. 8 Mu nkungu zezo Esau asongolede buno bakikulu ba Kanana tababezaga batananizia isi Isaka. 9 Ububo endile ku Isimaeli mwana wa Abrahamu, nu asongile mukinga wage umozi u Mahalati mubitu wa Nebayoti, nu bubo abede na bakikulu basatu.
Ndozi za Yakobo ku Beteli.
10 Yakobo atukile ku Beri-Seba nu eiyendede ku Harani. 11 Gaabasile ku kiziki kimozi, akitile ido gago kubuno busi bwabezaga buse bwida kalazi. Atolile ikozi, alibikile mwigo nu eiyombekile gago. 12 Mu kindi, abezaga na ndozi. Muzo, amonine ku kyindo kyakomwa gansi nu ntonga zakyo zabasa kwigulu nu banzelo ba Kalaga babezaga bakubakama nu kugela mukyo. 13 Gantata gakyo, Yehowa abezaga emana nu atendile bunee: “Nili Yehowa, Kalaga wa so Abrahamu nu Kalaga wa Isaka. Nkakasa, kuguli nu ku kibuti kyobe kisi kiwazombama gakyo. 14 Kibuti kyobe kikaba kyingi anga mukungu wa kisi, nu bakabalangana ku ndenge insania. Bilongo binsania bya kisi bikakaswa mponga muguli nu mu kibuti kyobe. 15 Lola, nili gamozi nobe, nu nakulange kunsania kuukwenda nu nkakusubya ku kikino kisi. Nsyakusige aaba nu ganakukitile binsania binakulagile.”
16 Gayukile Yakobo, akengede bunee: “Lebelebe Yehowa eli gano, nu nsyamenyininne nunse.” 17 Akule boba nu atendile bunee: “Kiziki kikino kili kya kwitia boba nunse. Kikino kili numba za Kalaga, kili mwingilo wa kwigulu.”
18 Yakobo ayukile mu nindunindu nu atolile ikozi lilyo lyabezaga mwigo wage nu alilindizie anga iyango nu asongolokizie makiti gantata lyo. 19 Einikile kiziki kikyo Beteli, tondo wakalazi izina lyakyo lyabezaga Luzi. 20 Nkungu zezo, Yakobo alumbide idagano bunee: “Ndi Kalaga eli na nne, nu kundanga ku lugendo lwane, nu kunkasa idia lyakuka nu nsulu za kuvwala, 21 buno nisubye bulonge bukata ku numba za tatane, nti Yehowa abe Kalaga wane. 22 Ikozi lilino linalindia kuba iyango likaba numba za Kalaga, nu ku binsania biwankasage nti nakukasage kyindi ky'ikumi.”