Isaka akasa Yakobo mponga.
27
1 Isaka abede mukungu nu abezaga kyuku. Amanine Esau, nkula zage, nu amubwide bunee: “Mwana wane.” Akwide bunee: “Nili gano.”
2 Isaka amukakizizie bunee: “Nili mukungu nu nsizi busi bwane bwa kulekana. 3 Ububo lelo tola bunkanda a nu misungu zobe, nu unendele mu kalula kunitila nyama. 4 Nnyikile idia anga bunatunda nu kundusizia lyo nilie buno nikukase mponga nsikua.”
5 Nkungu zezo, Rebeka ongwililaga gatendaga Isaka ku mwana wage Esau. Gendile Esau kutenga nyama, 6 Rebeka atendile Yakobo mwana wage bunee: “Lola, nungule gatendile so ku Esau solonzi bunee: 7 ‘Ntengele nyama nu kuniyikila misuna anga bunatunda, buno nikukase mponga lwabusio lwa Yehowa nti nsikua.’ 8 Mwana wane, nnungwilile nunse nu kita anga bunkukukakizia. 9 Enda ku kibombo kya mpene nu ntolele byana bibili byazo buno niyike misuna anga bukutunda so, misuna misoga nunse, 10 nu uwe wende nazo nu kulisia so buno akukase mponga nti nteikua.”
11 Yakobo akwide nina bunee: “Tondo zezine eli na kikoba anga nsulu za myoza, tondo nsili bubo. 12 Buni ndi tatane eitubya kundi? Nti namoneke buno namukita bwengelezi nu kundusizia kiswililo nu ta mponga lingo.”
13 Nina amubwide bunee: “Mwana wane, kiswililo kibe kundi. Kita tugu anga bunatenda. Enda kuntolela byo.” 14 Ububo Yakobo endile nu abitolile nu avule nabyo ku nina. Nina abiyikile anga lukita lwatundile Isaka, ku kusonda kusoga nunse. 15 Nu Rebeka akatile nsulu nsoga za Esau nkula zage, nu avwalikizie Yakobo zo. 16 Nu akukide maboko ma Yakobo nu ikosi lyage na kikoba kya mpene. 17 Kumbusa kwa kukita bubo akasile mu maboko ma Yakobo, mwana wage, misuna misoga gamozi na kampampa kaakitile.
18 Yakobo endile kuli isi nu amubwide bunee: “Tatane.”
Isaka amwakwide bunee: “Ee, nili gano. Uwe nazi?”
19 Yakobo akwide isi bunee: “Nili Esau nkula zobe. Nakitile anga buwankakizizie. Ndi bwakutananizia, zanzuka, ikala ku kasenga nu lia ku nyama zinatengile buno unkase mponga zobe.”
20 Isaka abuzizie mwana wage bunee: “Buni buwazita yiliyili?”
Yakobo akwide bunee: “Mukota Kalaga wobe ampede mponga.”
21 Nu Isaka abwide Yakobo bunee: “Mwana wane, nkunde buno nitubye kuguli buno nimenye ndi lebelebe uli mwana wane Esau, aba kilo.”
22 Yakobo akundile isi Isaka, eitubizie kweli nu kutenda bunee: “Iyuki lili lya Yakobo tondo maboko meli ma Esau.” 23 Ntamumenyine kubuno abezaga na kikoba kya mpene ku maboko mage nu mabezaga anga mamo ma Esau. Ububo Isaka akasile Yakobo mponga. 24 Tondo amubuzizie lingo bunee: “Lebelebe ndi uli mwana wane Esau?”
Nu akwide bunee: “Nili we.”
25 Nkungu zezo amubwide bunee: “Mwana wane, ndusizie nyama ziwitile buno nilie nu kukukasa mponga zane.” Yakobo azilusizie kuli isi gamozi na mazi ma biguma. 26 Kumbusa kwa kulia, isi Isaka amutendile bunee: “Mwana wane, vwa kuno nu kummuma ku matama.” 27 Gaamumumaga, Isaka ongule nsunu za nsulu zage nu amukasile mponga. Atendile bunee: “Nsunu za mwana wane zili anga nsunu za kalula kakaswa mponga na Kalaga. 28 Kalaga akukase mame ma kwigulu nu bikulo bya kisi, nu mbuto ningi nu mazi ma biguma meingi. 29 Ba bilongo bakukitile, nu bantu bakakukumbamina. Ukangata mibuto zobe, nu bana bamulume ba nyoko bakakukumbamina. Babo bakuswilile, nti baswililwe, nu babo bakukase mponga, nti bakaswe mponga.”
Esau asega mponga ku isi.
30 Kumbusa kwa Isaka kukasa mponga ku Yakobo, nu Yakobo kutuka lwabusio lw'isi, Esau iselenzi wa Yakobo, abasile kutuka ku itenga lya nyama. 31 Ayikile nu we nyama nsoga nu avule nazo kuli isi. Abwide isi bunee: “Tatane, zanzuka, ikala ga meza nu kulia nyama zinatengile buno unkase mponga zobe.”
32 Isaka, isi, amubuzizie bunee: “Uwe nazi?”
Esau akwide bunee: “Nili mwana wobe, nkula zobe Esau.”
33 Isaka alingile kugilimina nu abuzizie bunee: “Su, nazi wozo watengile nyama nu kundisiazo? Nalide nti ntuvwa nkungu nkeke tugu, nu namukasile mponga, nu lebelebe akakaswa mponga.”
34 Gongule moki m'isi, Esau alilile na kabebe nunse, nu abwide isi bunee: “Tatane, mpe mponga nu nne!”
35 Tondo akwide bunee: “Muto wobe avule na bwengelezi nu atolile mponga zobe.”
36 Esau abwide bunee: “Ndi nteinikilwe busoga n'izina lya Yakobo? Anengelela mambizi mabili. Akatile bwangato bwane bwa nkula, nu kano kaluma akata mponga zane.” Kumbusa kwa kutenda bubo, abuzizie bunee: “Ndi ntuli na mponga za kunkasa, aba zinaba nkeke?”
37 Isaka akwide Esau bunee: “Lola, namubikile mwangati kuguli, nu namukasile mibuto zage zinsania buno babe bakiti bage. Namukasile mbuto ningi nu mazi ma biguma meingi. Mwana wane, nikukitile lingo buni?”
38 Esau akwide isi bunee: “Ee Tatane, ndi zezo mponga emozi u ziguli nazo? Tatane, nkase mponga nu nne.” Nu Esau alilile n'iyuki inene.
39 Isaka, isi, amwakwide bunee: “Kiziki kyobe kikaba kisi kiteli na munago, geteli mbula za kwigulu nu masoa masoga. 40 Ukalama mu magala ma bupanga bwobe nu ukakitila muto wobe. Nu mu nkungu za kwiyonia kwobe nti watikye kisanga kya bwangato bwage kuguli.”
41 Esau asombile Yakobo kubuno isi akasile Yakobo mponga. Akengede mu mutima wage bunee: “Bindi bya kulilila tatane bili bwigi, nu mubyo nti nite Yakobo muto wane.”
42 Tondo gongule Rebeka ku makengelo ma Esau, nkula zage, asingile kumana malibilo mage Yakobo, nu amubwide bunee: “Solonzi Esau akwisuba kuguli mu kukwita. 43 Ububo kita anga bunkukukakizia. Mwana wane, tina ku mubitu wane Labani ku Harani. 44 Ikala nage bindi bimozi aaba nu bongoa bwa solonzi bwasila. 45 Gasile bongoa bwage, nti nakusingile mugenzi buno usubye kuno. Kubuni niziminwe n'inyu babili mu busi bumozi tugu?”
46 Nu Rebeka abwide Isaka bunee: “Nakutwa na kalamo kane ku kabamba ka bakikulu babili ba Esau, babo beli baHiti. Ndi Yakobo asonga mukinga wa kisi kikino, wa baHiti anga babano, nti kalamo kane keli na mutali mukizi?”