Isaka nu Abimeleki.
26
1 Kwabede lingo limbizi nzala nkali mu kisi, kumbusa kwa zezo za bindi bya Abrahamu, nu Isaka endile ku Gerari, mwino wa Abimeleki mukota wa baFilistini. 2 Mukota Kalaga eidolesizie kuli Isaka nu amubwide bunee: “Ntugele ku Misri. Ikala mu kisi kikino anga bunkukukakizia. 3 Ikala mu kisi kikino bindi bimozi, nu nikale gamozi nobe nu kukukasa mponga. Kubuno nkakukasa bisi bya bilongo bibino binsania, kuguli nu ku kibuti kyobe nu nkalindia idagano lyane linakitile na so Abrahamu. 4 Nkitizia kibuti kyobe buno kibe anga nkeninkeni z'igulu ku maganzo, nu nkakakasa bisi binsania nu mu ibuta lyobe nti bilongo binsania bya kisi bikakaswa mponga, 5 kubuno so Abrahamu ananzile nu kulanga makakizio nu milembe zane zinsania.” 6 Nu Isaka eikalaga mu Gerari. 7 Bantu ba kisi kikyo gababuzizie Isaka ku mukikulu wage, abakwide bunee: “Eli mubitu wane,” kubuno akule boba kutenda bunee: “Eli mukikulu wane.” Akengede buno banamwita ku kabamba ka Rebeka kubuno abezaga mbangilwa nunse. 8 Gatingile bindi, Abimeleki mukota wa baFilistina, amonine, gaalolile g'idilisa lya numba zage, Isaka nu Rebeka bakukita mulele. 9 Ububo Abimeleki amanine Isaka nu amubwide bunee: “Lebelebe eli mukikulu wobe. Kubuni watendile bunee: ‘Eli mubitu wane?’”
Isaka amwakwide bunee: “Kubuno nakengede buno bananita ku kabamba kage.”
10 Nu Abimeleki amubwide bunee: “Kubuni watukitide bubo? Umozi ku bamulume aneiyombekile na mukazi wobe nu unatulusizizie katati.”
11 Ububo Abimeleki akakizizie bantu bage bansania bunee: “Unsania wasunage muntu wono aba mukazi wage, nti eitwe.”
12 Isaka ayikile mbuto mu isoa, nu mwaka wozo atubwide mambizi lukama, kubuno Yehowa amukasile mponga. 13 Abede mugumi, nu bikulo byage byitilide aaba nu gaabede mugumi nunse. 14 BaFilistini babezaga na lugi kweli kubuno abezaga na bakiti beingi nu bibombo nu lusumba lunene nunse. 15 Ku kabamba kako baFilistini beiyazizie tunuabalongo tunsania tumbile bakiti ba Abrahamu mu bindi byage; bakandile tunuabalongo na bilongo.
16 Abimeleki akakizizie Isaka bunee: “Tuka mu kisi kyeitu, kubuno wabede na magala kututinga.” 17 Ububo Isaka atukile gago nu kukumuka, kwikala mu kibitabita kya Gerari. 18 Isaka ombile lingo tunuabalongo tumbile isi Abrahamu, twazibile baFilistini kumbusa kwa lukuo lwa Abrahamu. Isaka atuumbile lingo nu kutwinika meina matwinikile isi.
19 Bakiti ba Isaka bombile lingo kanuabalongo mu kikyo kibitabita nu bamonine mazi muko. 20 Tondo balangi ba mikoko ba mwino wa Gerari basakile na balangi ba mikoko ba Isaka nu batendile bunee: “Mazi meli meitu tugu.” Ububo Isaka einikile kanuabalongo kako Ezeki, a kubuno basakile nage.
21 Bakiti ba Isaka bombile kango kanuabalongo, nu balangi ba Gerari basakile lingo nabo ku kako, nu Isaka akeinikile Sitina. b 22 Akumukile ku kingo kiziki nu ombile kango kanuabalongo. Ku kako takwabezaga nsake. Ububo akeinikile Rehoboti. c Atendile bunee: “Kano kaluma Yehowa atukasile lubanda lwakuka buno tutubule mulo.”
23 Isaka akumukile lingo nu endile ku Beri-Seba. 24 Mu kikyo kindi, Yehowa eidolesizie kuli Isaka nu amubwide bunee: “Nili Kalaga wa so Abrahamu. Ntukue boba, kubuno nili gamozi nobe. Nkakukasa mponga nu kwitizia maganzo m'ibuta lyobe ku kabamba ka mukiti wane Abrahamu.” 25 Isaka amobakide kasenga ka makozi ma kayulo mu kikyo kiziki nu asegile Yehowa mu izina lyage. Gago akomine numba zage za hema, nu bakiti bage bombile kango kanuabalongo.
26 Abimeleki atukile Gerari na Ahuzati musunguzi wage, nu Fikoli musondelezia wa bakoloboyo bage, nu bavule ku Isaka. 27 Isaka ababuzizie bunee: “Kubuni mwavule kutabanga kwane nu muli na lusombo kundi, nu mwampumbizie mu kisi kyeinyu?”
28 Bamwakwide bunee: “Kano kaluma twamenya buno Yehowa eli nobe, nu twatendile bunee: ‘Tulumbilane gatusamba, gasamba uwe nu iswe,’ nu tukite idagano, 29 buno ntwatukitile bubi anga bututakukitide, tondo twakukitide busoga kankanka nu kukusinga mu bubobelelo. Tukumenya kano kaluma buno Yehowa akukasile mponga.” 30 Isaka abakitide kisagulo nu balide nu kunua. 31 Bayukile lukesikesi, babo bamulume balagenne idagano, nu kumbusa Isaka abasindikizizie nu bendile mu bubobelelo.
32 Mu bubo busi bakiti ba Isaka bavule nu kumusolela kitondo kya kanuabalongo kabombile. Bamubwide bunee: “Twamonine mazi.” 33 Akeinikile Siba, d u kinsa wozo mwino wamanagwa Beri-Seba aaba nu lelo.