Kukua kwa Abrahamu.
25
1 Abrahamu asongile ungo mukikulu winikilwe Ketura. 2 Abutile Zimurani, Yokisani, Medani, Midiani, Isibaki nu Sua. 3 Yokisani abutile Seba nu Dedani, nu bana baDedani babezaga baAsuri, baLetusi nu baLeumi. 4 Bana ba Midiani u Efa, Eferi, Hanoki, Abida nu Eldaa. Babo bansania babezaga mu ibuta lya Ketura. 5 Abrahamu akasile Isaka ntiko zage zinsania. 6 Akasile bana ba tulemba twage nkaso gaabezaga eikili alama nu abasingile ku kisi kya kuntata kukutukaga kisongo kya busi, bulazi na mwana wage Isaka.
7 Bindi binsania bya Abrahamu byabezaga myaka lukama, makumi mutubakamo nu itano. 8 Abrahamu alekenne mu bukungu bwage nunse, gaabezaga na myaka mingi nunse. 9 Nu bana bage, Isaka nu Isimaeli, bamuyikile mu kalimba ka Makipela bwigi na mwino wa Mamure, u kalimba kabezaga mu isoa lya Efuroni mwana wa Zohari muHiti, 10 isoa lyakunzile Abrahamu wenyene ku baHiti, gago u gayikilwe Abrahamu nu Sara mukazi wage. 11 Kumbusa kwa lukuo lwa Abrahamu, Kalaga akasile Isaka mponga nu Isaka eikalaga bwigi na kanuabalongo ka Beri-Lahai-roi.
Bana ba Isimaeli.
12 Kikino kili kibuti kya bana ba Isimaeli wabutilwe na Hagari, mukiti wa Sara. 13 Meina ma bana ba Isimaeli anga bubabutilwe meli Nebayoti u nkula zage, Kedari, Adibeli, Mibusami, 14 Misima, Duma, Masa, 15 Hadadi, Tema, Yeturi, Nafisi nu Kedema. 16 Babano u bana ba Isimaeli, na meina mabo, ku miino zabo, nu ku malo mabo, u bakota ikumi nu babili mu bilongo byabo. 17 Isimaeli abezaga na myaka lukama, makumi masatu nu mutubakamo gaalekenne. 18 Bana bage beikalaga mu kisi gasamba Havila na Suri, bwigi na mwaga wa Misri, mu nzila zikwenda ku kisi kya Asuria, nu babezaga na bwiti gabasamba na mibuto zabo zinsania.
Kubutwa kwa Yakobo nu Esau.
19 Kikino kili kibuti kya Isaka mwana wa Abrahamu. 20 Isaka abezaga na myaka makumi manazi gaasongile Rebeka mukinga wa Betueli nu mubitu wa Labani. Betueli abezaga muAramu, wa kisi kya Padani-Aramu, nu Labani abezaga nu we muAramu. 21 Isaka asegile ku Yehowa ku kabamba ka mukazi wage Rebeka kubuno abezaga mugumba; nu Yehowa ongule masego mage nu Rebeka mukazi wage ekile iyimi. 22 Abezaga na maasa, nu bana beikulungulaga mu nda zage, nu eibuzizie bunee: “Kubuni kikino kyabasa kundi?” Ububo abuzizie Yehowa mu masego, 23 nu Yehowa amwakwide bunee:
“Bana babili beli munda zobe,
nu bilongo bibili byalekanukibwe muguli.
Kilongo kimozi kikaba kinene kutinga kingo,
nu nkula akakitila muto wage.”
24 Gakukile nkungu zage za kubuta, abutile maasa ma bamulume. 25 Nkula abezaga wakisimana nu mubili wage wabezaga anga nsulu za myoza. Ububo einikilwe Esau. a 26 Kumbusa muto wage abutilwe, akata ku kasindilo ka Esau. Ububo bamwinikile Yakobo. b Isaka abezaga na myaka makumi mutuba ku nkungu zababutile Rebeka.
27 Bana bakulile, nu Esau abede nkongosoli nsoga za menge ma kwikala mu kalula, tondo Yakobo abede muntu wa bubobelelo, nu eikalaga bwigi na numba kankanka. 28 Isaka atundile Esau kubuno aliaga misuna za nyama za mu lubanda z'ikulukyo lyage, tondo Rebeka atundile Yakobo.
29 Busi bumozi Yakobo abezaga akuyika lusalu lwa kasimbo kakisimana, nu Esau asubizie kutuka mu lubanda nu akutwa nunse. 30 Abwide Yakobo bunee: “Nakutwa nunse. Nkase ku lusalu lulo lwakisimana.” Ububo bantu bamwinikile Edomu.
31 Yakobo akwide bunee: “Mpe tanga bwangato bwobe bwa nkula.”
32 Esau amwakwide bunee: “Ntukumona buno nili bwigi na kukua? Bwangato bwa nkula buli na mutali mukizi kundi?”