Abrahamu alondela Isaka mukikulu.
24
1 Abrahamu abezaga mukulu nunse, nu Yehowa amukasile mponga mu binsania byakitile. 2 Atendile mwangati wa bakiti bage, wozo wabezaga munene ku binsania byage, bunee: “Bika kuboko kwobe kunsi kwa kilumbu kyane. a 3 Nkutunda undumbile mu Yehowa, Kalaga w'igulu nu wa kisi, buno ntulondele mwana wane mukikulu munkatini mwa bakinga ba baKanana, bankwikalaga nabo. 4 Tondo wende ku kisi kyane nu ku mibuto zane, kutola mukikulu buno abe mukazi wa mwana wane Isaka.” 5 Mukiti amubuzizie bunee: “Ndi mukikulu ntaziga kuvwa na nne ku kino kisi, ndi nti nende na mwana wobe ku kisi kikyo kiwatukile kukyo?”
6 Abrahamu amwakwide bunee: “Widange buno ntwende ko na mwana wane. 7 Yehowa, Kalaga w'igulu, antikizye mu numba za tatane nu mu kisi kyane, antendile nu kundumbila bunee: ‘Nkakasa kisi kikino ku bana bobe,’ wenyene akasinga mwanzelo wage lwabusio lwobe buno kuko u kuukatolela mwana wane mukikulu. 8 Aba mukikulu ntaziga kuvwa nobe kuno, nti wakandulwa ku idagano lilino. Tondo ntwende ko na mwana wane.” 9 Ububo wozo mukiti abikile kuboko kwage kunsi kwa kilumbu kya Abrahamu nu amulumbilide ku kitondo kikino.
10 Nu mukiti atolile ngamia ikumi mu ngamia za Abrahamu nu bimozi bya ntiko zage bya nkita nsoga, nu endile. Atukile kwenda ku Aram-Naharamu, b nu abasile ku mwino wa Nahori. 11 Umuzizie ngamia bwigi na kanuabalongo kabezaga ku isula lya mwino. Zabezaga nkungu z'igolo za bakikulu kutaga mazi. 12 Asegile bunee: “Yehowa, Kalaga wa mukota wane Abrahamu, mpe mponga zobe lelo, nu kua kyombo ku Abrahamu, mukota wane. 13 Ntukumona, nemana ku kakano kanuabalongo, nu bakinga bakuvwa kutaga mazi. 14 Mpe mponga buno mukinga u nabuzagie bunee: ‘Mpe mazi ma kunua, ndi watunda,’ nu anakule bunee: ‘Nua, nu nanusie ngamia zobe,’ nti abe mukikulu u wasombolede mukiti wobe Isaka. Ku kalolesio kako, namenye buno wakwilide mukota wane kyombo.”
15 Abezaga ntesila kusega, Rebeka avule n'idega ga kituli kyage. Abezaga mukinga wa Betueli, wabezaga musikila wa Milka, u mukazi wa Nahori muto wa Abrahamu. 16 Mukinga abezaga mbangilwa nu kikumi kitemenya wamulume. Akumbile ku kanuabalongo nu eizazizie idega lyage nu kusubya. 17 Mukiti wa Abrahamu asasizie kwenda kuli Rebeka nu amusegile bunee: “Mpe mazi ma kunua makeke meli mu idega lyobe.”
18 Rebeka akwide bunee: “Tatane, nua,” nu agezizie idega na maboko mage nu amunusizie mazi.
19 Kumbusa kwa kumunusia, amubwide bunee: “Nitagile ngamia zobe mazi nuzo aaba nu gazasile kunua.” 20 Nu atulungwide idega lyage mu mugezi wa kunusia nyama, nu asasizie lingo ku kanuabalongo kutaga mango mazi. Anusizie ngamia insania. 21 Mukiti ntatendile iyuki limozi nkungu zezo insania, tondo alolile ku mukinga nu kwibuzia ndi Yehowa amukasile mponga mu lugendo lwage.
22 Gasilile ngamia kunua mazi, mukiti wa Abrahamu atolile kimpini kya olo kya mwembe, kya buzitu bwa shekeli c ikumi nu mikotola ibili za maboko, nu abikasile ku Rebeka. 23 Nu amubuzizie bunee: “Uli mukinga wa nazi? Nsolele ndi kuli kiziki kya kwiyombeka mu numba za so? Nu kyakuka ku ngamia?”
24 Amwakwide bunee: “Nili mukinga wa Betueli, mwana wa Nahori nu Milka.” 25 Nu lingo atendile bunee: “Tuli na nsolu zakama zakuka za kukasa ngamia zobe, nu kuli busio bwa bageni bwa kwiyombeka tulo.”
26 Muntu akumbamide Yehowa, 27 nu atendile bunee: “Yehowa aganunwe, Kalaga wa mukota wane Abrahamu, ntalekede mponga zage nu bulili bwage ku mukota wane. Ku kitondo kyane, Yehowa ansondelezia mu lugendo buno nibasile ku numba za mubuto wa Abrahamu, mukota wane.”
28 Mukinga eitumine lubilo kuli nina kumubula bibyo bitondo. 29 Rebeka abezaga na mubitu wamanagwa Labani, nu we eitumine lubilo ku kanuabalongo kwabezaga wamulume. 30 Gaamonine ku kimpini kya mwembe nu mikotola ku maboko, nu gongule ku bitondo binsania bya mubitu wage Rebeka, atendile bunee: “Bubuno u bwantendile muntu,” Labani endile ku wozo wamulume nu amumonine ko emana bwigi na kanuabalongo gamozi na ngamia zage. 31 Nu amubwide bunee: “Uwe wakaswa mponga na Yehowa, vwa kweitu. Kubuni wemana gambuga? Nakulongekede busio mu numba, nu kiziki kya ngamia.”
32 Ububo muntu endile nage kwage, nu bakanwine bikagi ga ngamia nu bazilisizie bisugu byakama byakuka kuzo. Bakasile mazi ma koga ku mukiti wa Abrahamu nu ku bamulume babezaga nage buno boge ku magulu. 33 Kumbusa kwa koga, bamukasile idia, tondo atendile bunee: ‘‘Nsyalie lwabusio nsitenda kikyo kinatunganana kutenda.”
Labani akwide bunee: “Tubule kyo.”
34 Nu atendile bunee: “Nili mukiti wa Abrahamu. 35 Yehowa akasile mukota wane mponga nunse nu eseli mugumi. Amukasile mikoko nu ngombe, nu feza nu olo, nu ngamia nu mpunda, nu bakiti beingi bamulume nu bakinga. 36 Sara, mukazi wa mukota wane, amubutide mwana mu bukungu bwage, nu mukota wane Abrahamu amukasile binsania byage. 37 Nu mukota wane andumbizizie idagano, nu antendile bunee: ‘Ntulongekele mwana wane isonga na mukinga wa baKanana, babo ba kisi kinkwikala mukyo, 38 tondo wende ku kikanga kya tatane, ku kikanga kyane, nu kulongekela mwana wane isonga na mukinga wabo.’ 39 Nu nabuzizie mukota wane bunee: ‘Buni bunakite ndi mukinga ntaziga kusubya na nne?’ 40 Anakwide bunee: ‘Yehowa wozo u nkwanzaga bindi binsania akasinga mwanzelo wage lwabusio lwobe buno ukite anga bunatunda, nu watolele mwana wane ko mukikulu wa kikanga kyane nu wa kikanga kya tatane. 41 Ububo wakandulwe mu idagano lyane ndi wabasa ku kikanga kyane, nu ndi tabakukasa mukinga umozi, nti wakandulwe mu idagano lyane.’
42 Ganabasile lelo ku kanuabalongo, nasegile bunee: ‘Ee Yehowa, Kalaga wa mukota wane Abrahamu, ndi watunda, nkitile lelo buno nikite kikyo kinavule kukita. 43 Ntukumona? Nili gano ku kanuabalongo. Ndi mukinga umozi avwa kutaga mazi, nu namubuzie bunee: “Ndi bwakutananizia, mpe mazi ma kunua ku idega lyobe,” 44 nu anakula bunee: “Nua mazi mamano, nu lingo natagile ngamia zobe mazi,” we nti u wabe wozo wasombwede Mukota Kalaga buno abe mukikulu wa mwana wa mukota wane Abrahamu.’ 45 Ganabezaga nsisila kusega mu mutima, Rebeka avule n'idega lyage ga kituli kyage, nu atagile mazi ku kanuabalongo nu kutuka ko. Nkungu zezo namusegile bunee: ‘Mpe mazi ma kunua, ndi watunda.’ 46 Agezizie lubilo idega ku maboko nu kwakula bunee: ‘Nua, nu lingo natagile ngamia zobe mazi.’ Ububo nanune mazi, nu anusizie ngamia kumbusa. 47 Namubuzizie bunee: ‘Uli mukinga wa nazi?’ Nu akwide bunee: ‘Nili mukinga wa Betueli, u mwana wa Nahori nu wa Milka.’ Nu namukasile kimpini ku mwembe nu mikotola ku maboko, 48 nu nakumbamide Yehowa, nu kuganuna Yehowa, Kalaga wa mukota wane Abrahamu wansondelezizie mu nzila nsoga buno nitole mukinga wa mubuto wa mukota wane ku kabamba ka mwana wage. 49 Kano kaluma, ndi mwakwila mukota wane kyombo mu bulili, nti mwambula bubo, nu ndi tabubo, nti mwambula buno nigaluke ku seidume aba ku seikazi.”
50 Kumbusa Labani nu Betueli bamwakwide bunee: “Kikino kikutuka ku Yehowa. Tatunavwama kutenda kena, aba busoga aba bubi. 51 Rebeka eli gano; mutole nu kusubya nu abe mukikulu wa mwana wa mukota wobe anga bwabwide Yehowa.” 52 Gongule mukiti wa Abrahamu ku kikyo kibatendile, akumbile mazu gansi lwabusio lwa Yehowa, 53 nu kumbusa, abasizie bintu bya malebo, bya feza nu bya olo nu nsulu nu abikasile ku Rebeka. Lingo akasile nina nu mubitu wage nkaso za bukunza bunene.
54 Kumbusa kwa kukita bubo mukiti wa Abrahamu nu bamulume babezaga gamozi nage balide nu banune, nu beiyombekile kuko mu numba za Betueli nu Labani. Gabayukile mu nindunindu abwide Betueli nu Labani bunee: “Nsindikiziazi mu nzila buno nisubye ku mukota wane.”
55 Tondo mubitu wa Rebeka nu nina batendile bunee: “Ziga buno mukinga weitu asigale n'iswe izinga limozi aba bindi ikumi, nu kumbusa nti ende nobe.”
56 Tondo abakwide bunee: “Tabusoga kunkanda gano. Mukota Kalaga atukitide busoga mu lugendo lweitu. Nsigazi nisubye ku mukota wane.”
57 Nu batendile bunee: “Tumane mukinga wenyene kumenya makengelo mage.” 58 Ububo bamanine Rebeka nu kumubuzia bunee: “Ndi watunda kwenda na wamulume wono?”
Akwide bunee: “Ee, natunda kwenda.”
59 Ububo beitabizizie nu bamusingile gamozi na wozo wabezaga mulezi wage, buno bende na mukiti wa Abrahamu nu bantu bavule nage. 60 Nu bakasile Rebeka mponga nu kumubula bunee:
“Mubitu weitu, witile nu kuba nina wa tununu twa bantu.
Babo b'ibuta lyobe bakinde beiti mu miino zabo.”
61 Rebeka nu bakiti bage bakanine byabo nu babakamine ga ngamia zabo nu bendile na mukiti wa Abrahamu. Bo bansania balingile lugendo.
62 Isaka atukile ku Beri-Lahai-roi kubuno eikalaga mu Negevi. 63 Mwigolo lya busi bumozi, atabangile mu isoa kukengela, nu atambizie meiso, nu amonine ku ngamia zikuvwa. 64 Rebeka nu we atambizie meiso mage nu amonine ku Isaka. Agelile gansi ku ngamia zage, 65 nu abuzizie mukiti wa Abrahamu bunee: “Nazi wozo wamulume mu isoa wavwa kutuli?”
Wozo mukiti amwakwide bunee: “We eli mukota wane.” Ububo Rebeka atolile nsulu zage nu eikukidezo ku meiso.