Sara akua nu kuyikwa.
23
1 Sara alamine myaka lukama makumi mabili nu mutubakamo. 2 Nu akule mu mwino wa Kiriati-Arba, u Hebroni, mu kisi kya Kanana. Abrahamu amulilide. 3 Kumbusa Abrahamu azanzukile lwabusio lwa mukuzi wage nu abwide baHiti bunee: 4 “Nili mugeni nu mutingi munkatini mweinyu. Nkasazi kiziki kya nsinda buno niyike mukuzi wane.”
5 BaHiti bamwakwide bunee: 6 “Tateiswe, tungwilile. Uwe uli munene munkatini mweitu. Sombola nsinda nsoga munkatini mwa zeitu insania nu yika mukuzi wobe muzo. Takuli umozi unakwima nsinda buno uyike mukuzi.”
7 Abrahamu akumbaminne ku bantu ba kisi, u baHiti, 8 nu ababwide bunee: “Ndi mwitabizia buno niyike mukuzi wane, ungwililazi nu kunsegela ku Efuroni wa Zohari, 9 buno ankunzie kalimba a ka Makipela keli mu kuzinda ku isoa lyage. Nsegele buno ankunzie ko ku bukunza bwako, nu nayike mukuzi wane.”
10 Efuroni muHiti eikalaga gamozi na babezaga ko ku mwingilo wa mwino, nu akwide Abrahamu bunee: 11 “Kilo, tatane. Nnungwilile, nakukasa isoa gamozi na kalimba keli mo. Nakukasa bibyo ku meiso ma bantu bane. Yika mukuzi wobe mu kako kalimba.”
12 Lingo limbizi Abrahamu akumbaminne ku bantu, 13 nu atendile Efuroni lwabusio lwabo bunee: “Ndi bwakutananizia, nnungwilile. Nkaliga bukunza bw'isoa. Unitabizie buno niyike mukuzi wane mu kalimba.”
14 Efuroni akwide Abrahamu bunee: 15 “Ee Tatane, nnungwilile. Bukunza bw'isoa buli byindi nkama inazi bya feza, b tondo buli bukizi gatusamba? Yika mukuzi wobe muko.”
16 Abrahamu eitabizizie bukunza bwatendile Efuroni, nu amukasile anga bwalindikile bakunzi, byindi nkama inazi bya feza, anga bwatendile Efuroni lwabusio lwa bantu bage.
17 Ububo Abrahamu akunzile isoa lilyo lyabezaga lya Efuroni gamozi na binsania byabezaga mulyo, miti nu kalimba, nu bantu bamenyine buno isoa lya Makipela liseli lya Abrahamu. 18 Alikunzile lwabusio lwa baHiti nu lwa bantu bansania batingaga ku mwingilo wa mwino. 19 Kumbusa kwa kulikunza ayikile Sara mukazi wage mu kalimba kabezaga mu isoa lya Makipela bwigi na mwino wa Mamure u mwino wa Hebroni mu kisi kya Kanana. 20 Ububo isoa gamozi na kalimba lyakasilwe ku Abrahamu na baHiti nu lyabede nsinda.