Kalaga akakizia Abrahamu kumukasa Isaka.
22
1 Kumbusa kwa bindi byingi Kalaga alindikile Abrahamu. Amumanine bunee: “Abrahamu.” Amwakwide bunee: “Nili gano.”
2 Nu Kalaga amubwide bunee: “Tola mwana wobe, ngomo zobe Isaka, wozo u watunda nunse nu wende nage ku kisi kya Moria. Gago umukasane kundi anga kayulo ka kugisibwa gantata ga mwiduko gunakulolesie.”
3 Mu nindunindu, Abrahamu ayukile lukesikesi, anzile bulangeti bwage ga mpunda zage buno eikale gazo. Atolile bakiti bage babili nu mwana wage Isaka. Atile misali za kayulo ka kugisibwa nu endile ku kiziki kyamubwide Kalaga. 4 Ku kindi kya bisatu, atambizie meiso mage nu amonine ku kiziki tondo kyabezaga bulazi nage. 5 Abwide bakiti bage bunee: “Sigalazi gano na mpunda, nu nne nu musikila twende kuko kukumbamina, nu kumbusa twasubye kumuli.”
6 Abrahamu atolile misali za kugisia kayulo nu azikasile ku Isaka, nu we ekile keiya nu mwene, nu bobabili bendile gamozi. 7 Isaka abwide isi bunee: “Tatane?”
Abrahamu akwide bunee: “Ee, nili gano, mwana wane.”
Isaka abwide bunee: “Tuli na keiya nu misali gano, tondo kuni kuli kyana kya mukoko kya kisansa kya kugisibwa?”
8 Abrahamu akwide bunee: “Mwana wane, Kalaga wenyene eikase kyana kya mukoko kya kisansa kya kugisibwa.” Nu bobabili bendaga gamozi.
9 Gababasile ku kiziki kyamubwide Kalaga, Abrahamu obakile kasenga ka kayulo nu alongekile misali gako. Akandile mwana wage Isaka nu amubikile ga misali gantata ga kasenga. 10 Nu alambizie kuboko nu kukata mwene buno asese mwana wage, 11 tondo iyuki lya mwanzelo wa Yehowa lyatukile kwigulu likumumana bunee: “Abrahamu, Abrahamu.”
Nu akwide bunee: “Nili gano.”
12 Amukakizizie bunee: “Ntubike kuboko ku mwana! Ntumukitile kena. Kano kaluma nizi buno ukukua Kalaga boba, kubuno ntwanimine mwana wobe wa ngomo.”
13 Abrahamu atambizie meiso nu amonine ku kilimba kya mukoko kumbusa kwage, wakatwa ku muti na mega. Endile ko nu akatile kilimba kya mukoko nu agukasenne kisansa kya kugisibwa ku Kalaga mu kiziki kya mwana wage. 14 Abrahamu einikile kikyo kiziki Yehowa Akase, a nu aaba nu lelo bantu bakutenda bunee: “Ga mwiduko wa Yehowa akakasa.”
15 Mwanzelo wa Yehowa amanine Abrahamu limbizi lya mabili kutuka kwigulu. 16 Amubwide bunee: “Nne Yehowa nkulumbila ku izina lyane buno kubuno wakitile bubo nu kutanima mwana wobe, 17 ububo lebelebe nkakukasa mponga nu kwitizia kibuti kyobe buno maganzo makyo makaba anga maganzo ma nkeninkeni za kwigulu nu anga maganzo ma misege za mitili za bitatenge. Kibuti kyobe kikeiyana miino za beiti babo, 18 nu mu kibuti kyobe babilongo bansania ba kisi bakakaswa mponga, kubuno wanzile iyuki lyane.” 19 Abrahamu asubizie ku bakiti bage, nu bobansania basubizie kwabo ku Beri-Seba, kwikalaga Abrahamu.
Ibuta lya Nahori.
20 Kumbusa kwa nkungu ndazi, Abrahamu asambalidwe bunee: “Nahori muto wobe nu Milka mukazi wage babutile bana.” 21 Meina mabo meli Uzi, u nkula, nu Buzi, Kemueli uli isi wa Aramu, 22 Kesedi, Hazo, Pildasi, Idilafu, nu Betueli. 23 Betueli abutile Rebeka. Babano u basikila kinana babutile Nahori muto wa Abrahamu na mukazi wage Milka. 24 Kalemba ka Nahori, wamanagwa Reuma, abutile bana. Meina mabo meli Teba, Gahamu, Tahasi, nu Maka.