Kubutwa kwa Isaka.
21
1 Kalaga Yehowa akasile Sara mponga, nu amukitide bubo bwamulagile. 2 Sara ekile iyimi nu abutide Abrahamu mwana wamulume mu bukungu bwage, ku nkungu zamulagile Kalaga. 3 Abrahamu einikile mwana wamubutide Sara Isaka. 4 Gabezaga mwana eseli na bindi kinana Abrahamu amumonesizie anga bwamukakizizie Kalaga. 5 Abrahamu abezaga eseli na myaka lukama gabutilwe Isaka. 6 Sara atendile bunee: “Kalaga ansekizie, nu bansania bakungwa musagu wono banaseka gamozi na nne.” 7 Atendile lingo bunee: “Nazi wavwamine kubula Abrahamu bunee: ‘Sara akamomia bana?’ Tondo namubutide mwana mu bukungu bwage.”
Hagari nu Isimaeli beimbibwa.
8 Isaka akulile nu agilile mabele, nu busi bubo bwa kumenka kumoma lingo Abrahamu akitile kisagulo kinene. 9 Tondo Sara gaamonine Isimaeli, musikila wabutide Abrahamu Hagari Mumisri, akulundula Isaka 10 abwide Abrahamu bunee: “Imbia wozo mukobe mukikulu nu musikila wage, kubuno mwana wamulume wa wozo mukobe ntanaba mwiyani wobe gamozi na mwana wane Isaka, aba kakeke.” 11 Kabede kabebe kanene kuli Abrahamu kubuno Isimaeli nu we lingo abezaga mwana wage.
12 Tondo Kalaga abwide Abrahamu bunee: “Ntube na kabebe ku kabamba ka musikila nu mukobe Hagari. Ungwilila Sara. Ukite anga bwakutenda kubuno mu Isaka u mwabe ibuta lyobe. 13 Nkakita buno mwana wa mukobe nu we lingo akaba kilongo; kubuno eli mwana wobe.”
14 Lukesikesi Abrahamu akasile Hagari idia nu mazi mu idega lya kikoba kya nyama, nu amwimbizie gamozi na mwana wage. Hagari endile n'idia nu mazi ga bituli nu mwana nu batimbiletimbile mu kalula ka Beri-Seba. 15 Gasilile mazi, Hagari asigile mwana gansina muti mukeke, 16 nu wenyene endile kwikala butunganana nago bwigi ku mabusu lukama gabasamba na mwana nu atendile bunee: “Nsimone ku kukua mwana wane.” Geikede butunganana nage, musikila amine magu nu kulila.
17 Kalaga ongule ku idilo lya musikila, nu mwanzelo wa Kalaga amanine Hagari kutukila kwigulu nu amubwide bunee: “Hagari, kikizi? Ntukue boba, kubuno Kalaga ongule ku idilo lya musikila ga kiziki kyeli gakyo. 18 Wende go nu kumukata g'ikoko lyage nu kumuzanzukya kubuno nkamukitila kuba kilongo kinene.” 19 Kalaga azibwide meiso ma Hagari nu amonine ku kanuabalongo. Endile kuko nu atagile mazi mu idega lyage kulizazia nu anusizie musikila mo. 20 Kalaga abezaga na musikila gaakulaga, nu alamaga mu kalula, nu abede ndasa. 21 Alamaga mu kalula ka Parani, nu nina amutolide mukikulu mu Misri.
Idagano gasamba Abrahamu nu Abimeleki.
22 Mu bindi bibyo, Abimeleki nu Fikoli musondelezia wa bakoloboyo bage, batendile ku Abrahamu bunee: “Kalaga eli gamozi nobe mu binsania byukukita. 23 Kano kaluma, ndumbilile gano lwabusio lwa Kalaga buno ntwankitile bwengelezi, aba nne aba nu bana bane aba nu kibuti kyane. Nkue kyombo nu ku babo ba kisi kiguli mukyo mugeni, anga bunakukwilide kyombo.”
24 Abrahamu amwakwide bunee: “Nkulumbila.”
25 Nu Abrahamu azugide Abimeleki ku kitondo kya kanuabalongo kanyagile bakiti ba Abimeleki. 26 Tondo Abimeleki atendile bunee: “Nsizi banazi bakitile bubo. Ntwantendile aaba nu lelo, nu lelo u bunungwa ku kikyo kitondo.”
27 Ububo Abrahamu atolile mikoko nu ngombe zimozi nu azikasile ku Abimeleki, nu bobabili bakitile malonga. 28 Abrahamu alekanukizye byana mutubakamo bya mikoko za mabuti na lusumba lwa mikoko zage, 29 nu Abimeleki amubuzizie bunee: “Bwisulilwa bukizi ku bibino byana mutubakamo bya mikoko biwalekanukizye na lusumba?”
30 Abrahamu akwide bunee: “Kata bibino byana mutubakamo bya mikoko binakukasa buno bibe kalolesio buno nombile kanuabalongo kakano.” 31 Ububo beinikile kiziki kikyo Beri-Seba, kubuno gago u gabalumbilenne bobabili.
32 Kumbusa kwa kukita malonga ku Beri-Seba, Abimeleki nu Fikoli musondelezia wa bakoloboyo bage, basubizie kwabo ku kisi kya baFilistini. 33 Abrahamu ayikile muti wamanagwa mukwaju kuko ku Beri-Seba, nu asegile ku izina lya Yehowa ko, u Kalaga wa Milyalya. 34 Nu Abrahamu eikalaga bindi byingi nunse mu kisi kya baFilistini.