Abrahamu nu Abimeleki.
20
1 Abrahamu akumukile kutuka Mamure ku kisi kikumanwa Negevi nu eikede gasamba Kadesi nu Suri. Kumbusa kwa myezi imozi, akumukile ku Gerari. 2 Mu wozo mwino atendede Sara, mukazi wage, bunee: “Eli mubitu wane.” Ububo Abimeleki, mukota wa Gerari, amutolile. 3 Tondo Kalaga atendile Abimeleki mu ndozi bunee: “Wakue ku kabamba ka mukikulu u watolile kubuno eli mukazi wa bene.” 4 Tondo Abimeleki nteiyombekile nage. Ububo atendile Kalaga bunee: “Mukota, ndi wite wozo uteli na katati? Ndi wite bantu bane gamozi na nne? 5 Ndi Abrahamu ntatendile bunee: ‘Eli mubitu wane?’ nu mukikulu, ndi ntatendede wamulume bunee: ‘Eli mubitu wane?’ Namutolile tondo nsyamenyine, nu nabukitile geteli bwagi.”
6 Nu mu ndozi zezo Kalaga amwakwide bunee: “Ee, namenya buno wakitile bubo geteli bwagi, nu ku kabamba kako nakulangile buno ntunagile. Ububo nsyazigile buno witubye kweli. 7 Kano kaluma subya mukikulu ku iba wage, kubuno eli mulengania, nu we nti akusegele nu uwe nti walame. Tondo ndi ntwaziga kumusubya kweli, nti lebelebe wakue, uwe nu bobe bansania.”
8 Lukesikesi Abimeleki amanine basunguzi bage bansania nu abasolede binsania byakitile nu bya ndozi, nu bakule boba nunse. 9 Nu Abimeleki amanine Abrahamu buno avwe lwabusio lwabo, nu amubuzizie bunee: “Buni buwatukitide? Nakwagide buni buno watulusizie katati kanene, kundi nu ku bukota bwane bunsania? Watukitide bututatunganana kukita.” 10 Nu Abimeleki abuzizie lingo Abrahamu bunee: “Kubuni wakitile bubo?”
11 Abrahamu akwide bunee: “Nitendile bunee: ‘Lebelebe tabakukua Kalaga boba gano nu banite ku kabamba ka mukikulu wane.’ 12 Nu lebelebe eli mubitu wane. Eli mwana wamukazi wa tatane, tondo ta wa mmane, nu abede mukazi wane. 13 Nu gansingile Kalaga bulazi na numba za tatane namubwide bunee: ‘Wavwama kundolesia kyelamo mu kutenda buno nili mubitu wobe.’”
14 Nu Abimeleki asubizie Sara kuli Abrahamu, nu mu nkungu zezo amukasile ngombe nu mikoko gamozi na bakiti bamulume nu bakikulu. 15 Abwide Abrahamu bunee: “Kisi kyane kinsania kili lwabusio lwobe. Ikala mukyo gawatunda.” 16 Nu abwide Sara bunee: “Nkukasa mubitu wobe byindi bya feza kanunu a kulolesia bansania beli gamozi n'inyu buno ntuli na katati. Bansania bamenye buno ntwakitile bubi.”