Bwagi bwa baSodoma.
19
1 Banzelo babili babasile ku mwino wa Sodoma mwigolo, nu Loti abezaga eikala ku isula lya mwino. Gaabamonineko, azanzukile nu akumbaminne lwabusio lwabo. 2 Ababwide bunee: “Batatane, vwazi ku numba za mukiti weinyu nu mwingile muzo. Munavwama koga ku magulu nu kwiyombeka mu kindi nu mu nindunindu munavwama kwenda.” Bakwide bunee: “Kilo, twiyombeke kuno ku mulungu.”
3 Loti nteitabizizie; abakakizizie bubibu nu bendile kwage nu kwingila mu numba zage. Abayikide idia, kokia tumpampa tutagaga, nu balide.
4 Gababezaga tabeiyombeka, bamulume ba mwino wa Sodoma bavule ku numba za Loti, 5 nu bamumanine. Babwide Loti bunee: “Kuni kuli bamulume bavwaga ku numba zobe lelo. Babasie kutuli buno tubamenye.”
6 Loti abasile mu numba kutendana nabo nu eigede lwibi kumbusa kwage. 7 Ababwide bunee: “Beida bane, kilo. Tamukite kitondo kikino kibi. 8 Lolazi, nili na bakinga babili beli bikumi, nimutolelebo nu mwakite nabo anga bumukutunda. Tondo tamukite kena ku bamulume babili babano, kubuno bavule kundi buno balangwe mu numba zane.”
9 Bamwakwide bunee: “Tutukile mu nzila!” Batendile lingo bunee: “Wono avule kweitu anga mugeni, nu kano kaluma akutunda kuba ngatu. Twakukitile bubi kubatinga.” Bamusindikile nu bagelekile kwata lwibi. 10 Tondo bamulume babezaga munda mwa numba balambizie maboko nu babulutile Loti mu numba nu beigede lwibi. 11 Nu bazibile meiso ma babo bakulu nu basikila babezaga kumbuga buno tabamone lwibi.
12 Babo bamulume babili babwide Loti bunee: “Ndi uli na bango kuno ku mwino, bakinga aba basikila, aba batenzia, aba unsania uli wobe? Batikye mu mwino wono, 13 kubuno tukuzikya mwino unsania. Mabingo ma bantu bago meli manene lwabusio lwa Yehowa. Ububo Yehowa atusingile kuguzikya.”
14 Loti endile ku batenzia bage basongile bakinga bage nu abatendile bunee: “Sasiazi kutuka mu mwino wono kubuno Yehowa es'azikyago.” Tondo batenzia bage bakengede buno abakitilaga nguza.
15 Lukesikesi mu nindunindu, banzelo basindikile Loti. Babwide bunee: “Zanzuka, tola mukazi wobe nu bakinga bobe babili beli gano buno tamuzikibwe mu mwino gatwaguzikye.”
16 Nu gaabezaga akuzingazinga, babo bantu bamukatile ku kuboko, we nu mukazi wage nu bakinga bage babili; bamusondelezizie lubilo kutuka mu mwino kubuno Yehowa amukwilide kyombo.
17 Gabamubasizie mu mwino, umozi wa babo babili atendile bunee: “Tinazi, mulange tulamo tweinyu. Tamulole kumbusa, nu tamulindile mu kibitabita. Tinazi ku miduko, munakivwa kukua.”
18 Tondo Loti ababwide bunee: “Kilo, nkumusega, bakota bane. 19 Mwatukwilide kyombo kinene nu mwatukasile mponga nunse kutulanga mu kalamo. Tondo nsikuvwama kutina ku miduko, wono muziko gunavwa kunkata nu kunita. 20 Tamukumona. Gago geli mwino mukeke nu guli bwigi buno tunatinina mugo. Itabiziazi buno tutinine ko. Taguli mwino mukeke? Nu gago nalange kalamo kane.”
21 Mwanzelo amwakwide bunee: “Ee, buli busoga. Nitabizia buno utine ko, nu nsyazikye wozo mwino mukeke u watendile. 22 Tondo tina ko lubilo, kubuno nsinavwama kukita kena ndi ntubasa ko.” Ukinsa wozo mwino wamaninwe Zoari kubuno wabezaga mukeke.
23 Nkungu zabasile Loti ku Zoari, kisongo kya busi kyamonekile, 24 nu nkungu zezo Yehowa alokezye keiya kutuka kwigulu gantata ga Sodoma nu Gomora. 25 Bubo u bwazikizye zezo miino nu kibitabita kinsania, gamozi na bantu bansania beikede ko nu binsania byasile mu kikyo kisi. 26 Mukazi wa Loti alolile kumbusa nu agalukile iyango lya munkange.
27 Lukesikesi, Abrahamu ayukile kwenda ku kiziki kyemanaga gakyo lwabusio lwa Yehowa. 28 Alolile ku Sodoma nu Gomora nu ku kibitabita kinsania, nu amonine ku muuki mwingi nunse, u muuki w'iyambi lya keiya kanene. 29 Gazikizye Kalaga miino za kibitabita, akengede Abrahamu nu atikizye Loti ku muziko wazikizye miino zalamaga mu Loti.
Kulinga kwa baMoabu nu baAmoni.
30 Loti akule boba kwikala mu Zoari. Ububo atukile mo na bakinga bage babili, nu akumukile ku mwiduko, nu eikede mu kalimba. 31 Busi bumozi, nkula za bakinga zatendile muto wage bunee: “Tateiswe eli mukungu nu takuli wamulume wa kutusonga anga buli misako za bantu ba kisi. 32 Tunusie tateiswe maku nu kumukatia namo nu kwiyombeka nage nu kweka meimi buno tulange ibuta lya tateiswe.” 33 Mu kikyo kindi, bamunusizie maku nu nkula eiyombekile nage tondo ntamenyine nkungu ziiyombekile aba zaayukile.
34 Nindunindu nkula atendile ku muto wage bunee: “Mu kindi niyombekile na tateiswe. Tumunusie lingo maku lelo mwigolo, nu uwe wiyombeke nage buno tweke meimi nu kukasa tateiswe kibuti.” 35 Ububo banusizie isibo maku mwigolo lya busi bubo; akatilwe na maku nu mukinga wage wa babili eiyombekile nage, tondo Loti ntamenyine nkungu ziiyombekede aba zaayukide. 36 Ububo bakinga babili ba Loti bekile meimi n'isibo. 37 Nkula zabutile mwana wamulume nu amwinikile Moabu. Wozo Moabu abede isi wa baMoabu aaba nu lelo. 38 Mukinga wa babili abutile mwana wamulume, nu amwinikile Beni-Ami, nu we eli isi wa baAmoni aaba nu lelo.