Abrahamu alagwa mwana wamulume.
18
1 Yehowa amonekile na Abrahamu ku miti za Mamure geikalaga ku mwingilo wa numba zage za hema ku makuluka. 2 Abrahamu atambizie meiso mage nu amonine ku bamulume basatu besemana bwigi na numba zage za hema. Gaabamonineko, Abrahamu asasizie kubasekela nu akumbaminne kubeli. 3 Abatendile bunee: “Ndi bunamutananizia, mwingile kwane nu tamutinge mukiti weinyu. 4 Nitole mazi mwoge ku magulu nu mumunwe gansina muti wono. 5 Nimutolele idia buno mubogeboge nu kumona magala, nu kumbusa munavwama kwenda lingo, ukinsa mwavule ku numba za mukiti weinyu.” Bamwakwide bunee: “Twabogaboga. Kita anga buwatenda.”
6 Abrahamu endile lubilo kuli Sara mu numba za hema, nu amubwide bunee: “Sasia kutola bilindiko bisatu bya bunga busoga nu okya tumpampa.” 7 Nu eitumine lubilo ku lusumba lwa ngombe nu atolile kyana kya ngombe kyanona nu kukikasa ku mukiti wage umozi buno akibage nu kukiyika. 8 Nu atolile nyama zezo za kyana kya ngombe nu tumpampa nu mabele magaga nu matagaga, nu akasile bibyo binsania kubeli. Gabaliaga, emenne bwigi nabo ku muti.
9 Bamubuzizie bunee: “Kuni kuli mukazi wobe Sara?”
Akwide bunee: “Eli mumo mu numba za hema.”
10 Umozi wamubeli amubwide bunee: “Lebelebe nkasubya kumuli ku nkungu zeno za mwaka wavwe, nu Sara mukazi wobe abe na mwana wamulume.”
Sara abezaga akungwilila ku lwibi lwa numba za hema zabezaga kumbusa kwage. 11 Abrahamu nu Sara babezaga bakungu nunse, nu Sara atinga nkiko za kubuta mwana. 12 Ububo Sara asekile mu mutima wage, nu eitendile bunee: “Kano kaluma ganiseli mukungu nu natinga nkiko zane za kubuta, ndi nabe na kyelele kikyo? Mukota wane nu we ese mukungu.”
13 Nkungu zezo Yehowa abuzizie Abrahamu bunee: “Kubuni Sara aseka nu kutenda bunee: ‘Ndi nabute mwana kano kaluma ganiseli mukungu?’ 14 Ndi kuli kitondo kimozi kitanavwama kukita Yehowa? Anga bunatenda, nkasubya kumuli ku nkungu zeno za mwaka ukuvwa nu Sara abute mwana wamulume.”
15 Sara akule boba nu atunine buno asekile, nu atendile bunee: ‘‘Nsyasekile.”
Tondo Yehowa atendile bunee: “Buza, wasekile.”
Abrahamu akusegela baSodoma.
16 Nu bantu bazanzukile kutuka gago nu balolile ku lulenge lwa ku Sodoma, nu Abrahamu endile nabo kubasindikizia. 17 Nkungu zezo, Yehowa atendile bunee: “Ndi nabise Abrahamu kikyo kinakite? 18 Lebelebe Abrahamu akaba kilongo kinene nu kya bwangato, nu bilongo binsania bya kisi bikakaswa mponga mweli. 19 Namusombwede buno ane bana bage nu bansania ba numba zage buno balange nzila za Yehowa nu kukita bwisanana nu bulili, buno Yehowa akitile Abrahamu kikyo kyamulagile.”
20 Nu Yehowa abwide Abrahamu bunee: “Mabingo ma Sodoma nu Gomora meli mengi nu manene, nu bwagi bwabo buli bunene nunse. 21 Ububo nkwenda ko nu kumenya ndi bubo bubakitile buli bubi nunse anga buli mabingo mabo manunguleko. Ndi tabuligo, nti namenye.”
22 Bantu bagalukile nu bendile mu nzila za ku Sodoma, tondo Abrahamu asigede kwemana lwabusio lwa Yehowa. 23 Abrahamu avule bwigi na Yehowa nu amubwide bunee: “Ndi wazikye beisanana gamozi na babi? 24 Ndi wamona bantu beisanana makumi matano mu mwino, ndi waguzikye nu kutasigilila ku kabamba ka babo makumi matano beisanana? 25 Kukita bubo kube bulazi nobe, kwita beisanana gamozi na babi nu kukitila beisanana nu babi bumozi. Ndi ngatu za kisi kinsania ntakite bwisanana?”
26 Yehowa akwide bunee: “Ndi namona bantu beisanana makumi matano mu mwino wa Sodoma, nti nsyazikye mwino unsania ku kabamba kabo.”
27 Nu Abrahamu atendile lingo bunee: “Kano kaluma nibikila na bupuka kutenda ku Mukota nu nne nsili kena, tondo mukungu nu lwito tugu. 28 Embe ku makumi matano ma beisanana kwide batano, ndi wazikye mwino unsania ku kabamba ka babo bantu batano?”
Yehowa akwide bunee: “Ndi namona makumi manazi nu batano beisanana, nti nsyazikye mwino.”
29 Lingo limbizi, Abrahamu amutendile bunee: “Ndi beisanana makumi manazi bamoneka ko?”
Yehowa akwide bunee: “Ku kabamba ka makumi manazi nsyazikye mwino.”
30 Abrahamu atendile lingo bunee: “Mukota ntongoe tanga tondo nitende lingo. Buni buwakite ndi kwamoneka ko makumi masatu?”
Nu Yehowa akwide bunee: ‘‘Nsyakite kena ndi namona makumi masatu.”
31 Abrahamu abwide bunee: “Nsigilile ku bupuka bwane kubuno nkutenda ku Mukota, tondo buni ndi kuli makumi mabili tugu?”
Yehowa akwide bunee: “Ku kabamba ka beisanana makumi mabili nsyazikye mwino.”
32 Abrahamu abwide bunee: “Ntunongelwe, nu natende limbizi lilino tugu. Buni ndi kwamoneka ko beisanana ikumi tugu?”
Yehowa amwakwide bunee: “Ku kabamba k'ikumi, nsyazikye mwino.”
33 Gaasilile kutendana na Abrahamu, Yehowa eiyendede nu Abrahamu asubizie kwage.