Kumonesibwa, kamenyikilo ky'idagano.
17
1 Gabezaga Abramu eseli na myaka makumi mubula nu mubula, Yehowa eidolesizie kweli nu amutendile bunee: “Nili Kalaga wa magala mansania. Tabanga lwabusio lwane nu isanana mu kalamo kobe. 2 Nkukokomeka idagano lyane nobe nu kwitizia kibuti kyobe.” 3 Abramu amukumbaminne, nu Kalaga amubwide lingo bunee: 4 “Idagano lyane kuguli lili buno wabe isi wa bilongo byingi. 5 Ntwamanwe lingo Abramu,a tondo izina lyobe liseli Abrahamu,b kubuno nakukite kuba isi wa bilongo byingi. 6 Nkakwitizia nu nkakukasa bana beingi, nu bamozi bakaba bakota. 7 Nu nkukokomeka idagano lyane buno lili lya milyalya n'uwe nu kibuti kyobe mu nugi zikavwa, buno nili Kalaga wobe nu wa kibuti kyobe kumbusa kwobe. 8 Uli mugeni mu kisi kya Kanana, tondo nakukase kyo kinsania buno kikaba kyobe nu ky'ibuta lyobe aaba nu ku milyalya, nu Nne nkaba Kalaga weinyu.” 9 Nu Kalaga abwide lingo Abrahamu bunee: “Kitondo kyobe nu ky'ibuta lyobe kili buno mulange idagano lyane mu bibuti byabo. 10 Idagano lyane limwatunganana kulanga lili bunee: ‘Mumonesie bana bansania bamulume. 11 Mumonesie bana bamulume, nu kumonesibwa kwabe kalolesio k'idagano ganisamba na beinyuwe. 12 Ku kindi kya kinana kumbusa kwa kubutwa kwa bana beinyu bamulume, nti mwabamonesia, babo babutwa kumuli nu bageni bamwakunza na bikulo, buno babe mu numba zeinyu. 13 Ndi babutwa kumuli nti bamonesibwe; ndi bakunzwa na bikulo byeinyu nti bamonesibwe.’ Lilino lili idagano lyane mu mibili zeinyu, nu likaba idagano lya milyalya. 14 Wamulume unsania utamonesibwa, nti aseswe ku bantu bage kubuno ntalangile idagano lyane.”
15 Ku Sarai, Kalaga abwide Abrahamu bunee: “Ntumane lingo mukazi wobe buno Sarai, kubuno izina lyage liseli Sara. c 16 Nkamukasa mponga nu lebelebe akakubutila mwana wamulume. Nkamukasa mponga buno abe nina wa bilongo, nu munkatini mwa bana bage mukaba bamozi bakaba bakota.”
17 Abrahamu agwede bukukama gansi nu asekile nu atendile mu mutima wage bunee: “Ndi wozo uli na myaka lukama abute mwana wamulume? Ndi Sara abute mwana geeseli na myaka makumi mubula?” 18 Nu Abrahamu asegile Kalaga bunee: “Isimaeli alame mu mponga zobe!”
19 Tondo Kalaga amwakwide: “Ee, tondo Sara mukazi wobe akubutile mwana wamulume, nu wamwinike Isaka. d Nkalumbila idagano lyane nage buno lili lya milyalya kweli nu ku kibuti kyage. 20 Ku kitondo kya Isimaeli nakungule, nu nkamukasa mponga. Nkamwitizia nu akaba na bana beingi, u ibuta linene. Abe isi wa bangati ikumi nu babili, nu nkamukitila buno abe kilongo kinene. 21 Tondo idagano lyane lili ku Isaka wabutwe na Sara ku nkungu zeno mu mwaka wavwe.” 22 Gaasilile kutenda na Abrahamu, Kalaga amusigile.
23 Mu bubo busi, Abrahamu endile na Isimaeli nu bamulume bansania ba mu numba zage, babo babutilwe muzo gamozi na babo bakunzilwe na bikulo, nu abamonesizie anga bwamubwide Kalaga. 24 Abrahamu abezaga eseli na myaka makumi mubula nu mubula gaamonesizibwe, 25 nu Isimaeli abezaga eseli na myaka ikumi nu isatu. 26 Abrahamu nu mwana wage Isimaeli bamonesizibwe bobabili mu busi bumozi, 27 nu bamulume bansania ba mu numba zage, u babo babutilwe muzo nu babo bakunzile Abrahamu na bikulo byage, bamonesizibwe gamozi nage.