Hagari nu Isimaeli.
16
1 Sarai, mukazi wa Abramu, ntamubutide mwana, tondo abezaga na mukinga muMisri, mukiti wage, winikilwe Hagari. 2 Ububo atendile Abramu bunee: “Yehowa ambikile mugumba. Enda wiyombeke na mukiti wane. Embe anambutila bana.” Abramu eitabizizie bubo bwatendile Sarai. 3 Gabezaga Abramu es'akukya myaka ikumi mu kisi kya Kanana, Sarai amukasile mukiti wage Hagari, muMisri, buno abe mukazi wage. 4 Eiyombekile nage, nu Hagari ekile iyimi. Gamenyine Hagari buno eka iyimi, eikotizie nu abengile Sarai mukota wage.
5 Nu Sarai abwide Abramu bunee: “Keli kabamba kobe buno Hagari ambenga. Nakukasile mukiti wane buno abe mukazi wobe, nu kano kaluma ambenga kubuno amenya buno eka iyimi. Yehowa asombole gatusamba, ndi uli na katati aba nne.”
6 Abramu amwakwide bunee: “Ndi nteli mukiti wobe? Ndi ntukumwangata? Mukitile anga buukutunda.” Nu Sarai akitide Hagari kyango, ububo Hagari atinine.
7 Mwanzelo wa Mukota Kalaga amonine Hagari bwigi na kanuabalongo mu kalula keli bwigi na nzila zenda ku Suri, 8 nu abwide Hagari bunee: “Hagari, mukiti wa Sarai, kuni ku ukutuka nu kuni ku ukwenda?”
Akwide bunee: “Nkutina Sarai mukota wane.”
9 Nu mwanzelo wa Mukota Kalaga amubwide bunee: “Subya ku mukota wobe nu wibotye kweli.” 10 Mwanzelo atendile lingo bunee: “Nkitizia ibuta lyobe buno bantu tabanavwama kuliganza. 11 Uli n'iyimi, nu wabute mwana wamulume. Wamwinike Isimaeli, kubuno Yehowa ongule ku lubaba lwobe. 12 Mwana akaba anga mpunda za mu kalula; maboko mage mabe makali ku bansania, nu maboko ma bansania mabe makali kweli. Akalama mu bwiti ku mibuto zage zinsania.”
13 Hagari einikile Yehowa watendile nage bunee: “Uli Kalaga ukummona.” a Ububo atendile bunee: “Namonine ku wozo wammonako.” 14 Ububo kanuabalongo kako kakumanwa Beri-Lahai-Roi. b Keli gasamba Kadesi nu Beredi.