Kalaga alumbila Abramu kilumbilo
15
1 Kumbusa kwa bibino bitondo, iyuki lya Yehowa lyabaside Abramu mu kalolesio, lyatendile bunee: “Abramu, ntukue boba, kubuno nili ngabo zobe, nu lukalilo lwobe lwabe lunene nunse.” 2 Tondo Abramu akwide bunee: “Ee Yehowa, Mwiya Bwangato Bunsania, wankase lukalilo lukizi? Nsili na mwana nu mwiyani wane eli Eliezeri wa Damasiki.” 3 Nu Abramu abwide lingo bunee: “Ntwankasile mwana, ta umozi, ububo mukobe wa mu numba zane eli mwiyani wane.”
4 Nu Yehowa amwakwide bunee: “Wono muntu ntabe mwiyani wobe, tondo mwana u gukabuta abe mwiyani wobe.” 5 Amubasizie kumbuga nu amubwide bunee: “Lola kwigulu, nu kuganza nkeninkeni ndi wavwama. Ukaba na kibuti anga maganzo mazo.”
6 Abramu akatizizie Yehowa, nu Yehowa amutekwide buno eisanana.
7 Amubwide lingo bunee: “Nne nili Yehowa wakutikizye mu kisi kya Uri wa baKaldea, kukukasa kisi kikino buno ukiyane.”
8 Tondo Abramu akwide bunee: “Ee Yehowa, Mwiya Bwangato Bunsania, buni buninamenya buno nakiyane?”
9 Ububo Yehowa amubwide bunee: “Ntolele ibuti lya ngombe lya myaka isatu nu ibuti lya mpene za myaka isatu nu mulume wa kilimba kya mukoko wa myaka isatu nu nkulimba nu kilinga.” 10 Abramu atolile zizo nyama insania nu azatile bibe bibili nu abibikile kibe ku kibe butunganana, tondo tuzoni ntatubagile. 11 Gapengile ndiu ku bitumba, Abramu azipumbizie.
12 Mu kwida kwa busi, Abramu eiyombekile tulo, nu mwizi nu kapilo kakwitia boba kamukatile. 13 Muko, Yehowa amubwide bunee: “Lebelebe menya buno kibuti kyobe kikaba kigeni mu kisi kiteli kyage, nu bakaba bakobe mukyo nu kubabazibwa myaka nkama inazi. 14 Tondo, nkasungia bantu ba kikyo kisi bakabakitila anga bakobe, nu kumbusa, bakatuka ko na ntiko ningi. 15 Tondo uwe, ukenda ku baso mu bubobelelo nu kuyikwa mu bukungu bwobe. 16 Mu kibuti kya binazi, nti kibuti kyobe kikasubya gano lingo kubuno bwagi bwa baAmori tabukuka.”
17 Gabede busi bwagoba nu kapilo kakuka kunsania, nyungu za muuki mwingi nu kasuku ka ndembelela nnene byamonekile ko, nu byatingile gasamba bibe bya nyama. 18 Mu kindi kikyo, Yehowa alagile Abramu idagano. Amubwide bunee: “Nkukasa ku kibuti kyobe kisi kikino kutukila luuzi lwa Misri aaba nu ku luuzi lunene lwa Furati, 19 u bilongo bya baKeni, nu baKenizi, nu baKadimoni, 20 nu baHiti, nu baPerizi, nu baRefaimu, 21 nu baKanana nu baGirgasi nu baYebusi.”