Abramu onia Loti.
14
1 Mu bindi bya Amurafeli, mukota wa Sinari, nu Arioki, mukota wa Elasari, nu Kedori-Laomeri, mukota wa Elamu, nu Tidali, mukota wa Goimu, 2 bakitile bita na Bera mukota wa Sodoma, nu Birsa, mukota wa Gomora, nu Sinabu, mukota wa Adima, nu Semeberi, mukota wa Zeboimu, nu mukota wa Bela u Zoari. 3 Babano bansania bakundamenne ku kibitabita kya Sidimu, u Kitatenge kya Munkange. 4 Bakitilaga Kedori-Laomeri myaka ikumi nu ibili, tondo ku mwaka w'ikumi nu isatu bamugunine. 5 Mu mwaka w'ikumi nu inazi, Kedori-Laomeri avule gamozi na bakota babezaga nage, nu beitile baRefaimu mu Asteroti-Karnaimu, nu baZuzi mu Hamu, nu baEmi mu Save-Kiriataimu, 6 nu baHori ku mwiduko wa Seiri ku mwaga wa Eli-Parani guli bwigi na kalula. 7 Basubizie nu bavule ku Eni-Misipati u Kadesi. Beitile kisi kinsania kya Amaleki, nu baAmori beikalaga ku Hazazoni-Tamari. 8 Bakota ba Sodoma nu Gomora nu Adima nu Zeboimu nu Bela, u Zoari, bendile kwikalila bita mu kibitabita kya Sidimu. 9 Babano bakota banazi, Kedori-Laomeri, mukota wa Elamu, nu Tidali, mukota wa Goimu, nu Amurafeli, mukota wa Sinari, nu Arioki, mukota wa Elasari, beitenne na batano. 10 Kibitabita kya Sidimu kyabezaga kiyala na mizinga za kabulimbo, nu bakota ba Sodoma nu Gomora, batinine nu bagwede muzo. Babo basigede batinine ku mwiduko. 11 Babo bakota banazi banyagile binsania bya Sodoma nu Gomora, nu idia lyabo linsania nu bendile. 12 Bakatile Loti, muyukulu wa Abramu nu bikulo byage binsania, kubuno abezaga mu Sodoma.
13 Muntu umozi abagulusukile nu atinine nu kusambalila Abramu muEbrania. Abramu eikalaga ku miti za Mamure, u muAmori, mubuto wa Eskoli nu Aneri. Babo basatu babezaga bilemba bya Abramu. 14 Gongule Abramu buno muyukulu wage akatwa ku bukobe, asondelezizie bakambi bage nkama isatu, ikumi nu kinana, babutilwe nu kukuzibwa mu numba zage. Ayangile babo bakota batano ku Dani. 15 Mu kindi, abeganizie bakiti bage, we nu bakiti bage, nu alwanine nabo mu kindi, nu kubakinda. Abayangile aaba nu ku Hoba guli ku lulenge lwa kwikazi lwa Damasiki, 16 nu atolile binsania bibakatile. Asubizie na Loti muyukulu wage nu binsania byage, nu bakikulu nu bango bansania bakatilwe.
Melekisedeki akasa Abramu mponga.
17 Gasubizie Abramu ku bita bya kukinda Kedori-Laomeri nu bakota babezaga nage, mukota wa Sodoma avule kweli kumumonako ku kibitabita kya Save, u kibitabita kya mukota. 18 Nu Melkisedeki, mukota wa Salemu avule na tumpampa nu mazi ma biguma. Abezaga sankoga wa Kalaga Wasakama Nunse, 19 nu akasile Abramu mponga. Atendile bunee: “Kalaga Wasakama Nunse wabumbile igulu nu kisi akase Abramu mponga. 20 Kalaga Wasakama Nunse wakukasile beiti bobe ku maboko mobe aganunwe.” Nu Abramu amukasile kyindi ky'ikumi kya binsania.
21 Mukota wa Sodoma abwide Abramu bunee: “Nkase bantu, nu uwe utole bikulo binsania.”
22 Abramu amwakwide bunee: “Nalambizie kuboko kwane ku Yehowa, Kalaga Wasakama Nunse, Mubumbi w'igulu nu kisi nu kumulumbila kilumbilo, 23 buno nsyakate kinsania kyobe aba nu musinge aba muzigi wa kisalapata, unavwa kutenda bunee: ‘Nagumizie Abramu.’ 24 Nitabizie kutola idia lyaliaga bakiti nu kyindi kya babo bendile na nne, u Aneri, Askoli nu Mamure. Batole byindi byabo.”