Kulekanuka kwa Abramu na Loti.
13
1 Ububo Abramu atukile ku Misri nu endile ku Negevi, we nu mukazi wage, na binsania byage nu Loti gamozi nage. 2 Abramu abezaga mugumi nunse wa bituganwa, nu feza nu olo. 3 Atingile mu Negevi nu kubasa ku Beteli, kobaka lingo kuko kobakile mu lutangi gasamba Beteli nu Ai. 4 Mu kiziki kitangi kyobakile kasenga ka kisansa, gago, Abramu akumbaminne Yehowa. 5 Loti, wendaga na Abramu, abezaga na bibombo bya ngombe nu bya mikoko (nu bya mpene) nu numba zage za hema. 6 Kisi takyabezaga kyakuka kubeli buno beikale gamozi, kubuno bikulo byabo byabezaga byingi. Ububo tabavwamine kwikala gamozi. 7 Kwabezaga nsake gasamba balangi ba bituganwa bya Abramu nu balangi ba bituganwa bya Loti. Mu bindi bibyo, baKanana nu baPerizi beikede mu kisi kikyo.
8 Abramu abwide Loti bunee: “Gatusamba tagabe nsake aba na bakiti beitu, kubuno tuli mibuto. 9 Ndi kisi kinsania takili lwabusio lwobe? Tulekanuke. Ndi wenda ku seikazi, nti nende ku seidume; nu ndi wenda ku seidume, nti nende ku seikazi.”
10 Loti atambizie meiso mage nu amonine ku kibitabita kya Yordani buno kyabezaga na mwaso kunsania anga isoa lya Yehowa, anga kisi kya Misri mu kwenda mu nzila za Zoari. (Kwabezaga bubo nti Yehowa nteizikya Sodoma nu Gomora.) 11 Ububo Loti asombwede kibitabita kya Yordani nu endile ku lulenge lwa kuntata. Bubo u bubalekanukile. 12 Abramu eikede ku kisi kya Kanana, nu Loti eikede bwigi na miino za kibitabita. Eigizie numba zage za hema bwigi na Sodoma. 13 Bantu ba Sodoma babezaga babi nunse, nu bagide Yehowa.
14 Galekanukile Abramu na Loti, Yehowa abwide Abramu bunee: “Tambia meiso ku ndenge insania za kisi, 15 kubuno kisi kikino kinsania kyukumona kukyo, nakukase kyo, uwe nu ibuta lyobe aaba nu ku milyalya. 16 Nu kibuti kyobe kikaba anga mukungu wa kisi. Ndi muntu anaganza mukungu wa kisi, kasi kibuti kyobe kinaganzwa. 17 Zanzuka, wende kutambula kisi, bungulu bwakyo nu bulazi bwakyo, kubuno nakukasa kyo.” 18 Abramu eigizie numba zage za hema, avule kwabezaga miti za kizila za Mamure, nu eikede ko bwigi na mwino wa Hebroni, nu gago obakide Yehowa kasenga ka kisansa.