Kalaga amana Abramu.
12
1 Yehowa abwide Abramu bunee: “Tuka mu kisi kyobe, nu munkatini mwa mibuto zobe, nu mu numba za so. Wende ku kisi kinakulolesie. 2 Nakukite kuba kilongo kinene, nu kukukasa mponga, nu nalumbie izina lyobe, nu uwe wabe ku bango mponga. 3 Nakase mponga ku babo bakukukasa mponga, nu nawakuswilila nti nkamuswilila. Muguli bilongo binsania bya kisi bikakaswa mponga.” 4 Abramu endile anga bwamubwide Yehowa, nu Loti gamozi nage. Abramu abezaga eseli na myaka makumi mutubakamo nu itano gaatukile ku Harani. 5 Abramu endile gamozi na mukazi wage Sarai, nu Loti, mwana wa mubuto wage, nu binsania bibabezaga nabyo, nu bantu babakatile ku Harani. Batukile ko buno bende ku kisi kya Kanana. Gababasile ku Kanana, 6 Abramu atingile mu kisi aaba nu ku mwino wa Sekemu, aaba nu ku muti munene wa mwalo wamanagwa More. BaKanana babezaga mu kisi mu bindi bibyo. 7 Yehowa eidolesizie ku Abramu, nu amutendile bunee: “Nkakasa kisi kikino ku kibuti kyobe.” Obakile gago kasenga ka kisansa ku Yehowa, wozo widolesizie kweli. 8 Kumbusa, atukile kuko nu endile ku mwiduko wabezaga ku lulenge lwa kuntata kwa Beteli. Akomine numba zage za hema ga kiziki kyabezaga gasamba Beteli kunsi nu Ai kuntata. Obakile gago kasenga ka kisansa ku Yehowa nu asegile ku izina lya Mukota. 9 Abramu endelede ku kisi kya ku lulenge lwa kwidume kyamanagwa Negevi.
Abramu mu Misri.
10 Mu kikyo kisi mwabezaga nzala. Ububo Abramu endile ku Misri buno eikale kuko, kubuno nzala zabezaga nkali mu kisi. 11 Gaabezaga eseli bwigi na kwingila ku Misri, abwide mukazi wage Sarai bunee: “Ungwilila tanga. Nizi buno uli mbangilwa. 12 Gawamonekeko na baMisri, nti batenda bunee: ‘Wono eli mukikulu wage,’ nti banite nu uwe nti bakusige na kalamo. 13 Nakusega kutenda buno uli mubitu wane, buno nilame nu bankitile busoga ku kabamba kobe.” 14 Gabasile Abramu mu Misri, bamonine ku wozo mukikulu buno eli mbangilwa. 15 Bakota banene ba kunsi kwa Farao bamumonine ko nu bamuganwine kuli Farao, nu Sarai atolilwe kwa Farao. 16 Farao akitide Abramu busoga ku kabamba ka Sarai. Amukasile mikoko nu ngombe nu mpene nu mpunda nu mabuti ma mpunda nu ngamia, nu bakiti, nu tulemba.
17 Tondo Yehowa asungizizie Farao nu kikanga kyage na nsambo mbibu ku kabamba ka Sarai mukazi wa Abramu. 18 Farao amanine Abramu nu amubuzizie bunee: “Kikizi kiwankitila? Kubuni ntwantendile buno eli mukazi wobe? 19 Kubuni wambwide buno wono eli mubitu wobe? Ukinsa namutolile buno abe mukazi wane. Kasi kano kaluma tola mukazi wobe, nu tukazi mu kisi kyane.” 20 Farao akakizizie bantu bage buno bamusindikizie ku mwaga wa kisi, we nu mukazi gamozi na binsania byabezaga nabyo.