Numba nnene za byindo za Babeli.
11
1 Kisi kinsania kyabezaga na mutendezi umozi nu moki masusanania. 2 Gendile bantu kuntata, bamonine kiziki kyabota mu kisi kya Sinari, nu beikede kuko. 3 Batendenne bunee: “Vwazi, tukitazi mabiliki nu kumagisia nunse na keiya.” Nu babezaga na mabiliki ku kiziki kya makozi, nu kabulimbo ku kiziki kya mpemba. 4 Batendile bunee: “Tobakazi mwino nu numba nnene za byindo byika ntonga kwigulu, buno tulumbe mu kisi nu tatubalangane mu kisi kinsania.” 5 Yehowa agelile buno amone ku mwino nu byindo binene byobakaga bantu. 6 Nu Yehowa abwide bunee: “Ntukumona, babano bantu beli ba kilongo kimozi na mutendezi umozi. Balinga kino kitondo, nu bubuno u bubalinga kukita. Kano kaluma tabanananibwa mu kinsania kibakutunda kukita. 7 Su, tukumbazi kugalukya mutendezi wabo bubatanungwana lingo.” 8 Ububo Yehowa ababalanganizie ga kisi kinsania nu bamenkile kobaka wozo mwino. 9 Ku kabamba kako mwino wamaninwe Babeli, kubuno gago u gagalukizye Yehowa mitendezi ga kisi kinsania, nu kutukila gago Yehowa abalanganizie bantu mu kisi kinsania.
Bibuti bya Semu.
10 Bibino u bibuti bya Semu: Semu abezaga eseli na myaka lukama gaabutile Aripakisadi, myaka ibili kumbusa kwa mwiyalo. 11 Semu alamine myaka nkama itano kumbusa kwa kubuta Aripakisadi, nu abutile bango bana, basikila nu bakinga.
12 Gabezaga Aripakisadi eseli na myaka makumi masatu nu itano, abutile Sela. 13 Aripakisadi alamine myaka nkama inazi nu isatu kumbusa kwa kubuta Sela, nu abutile bango bana, basikila nu bakinga.
14 Sela abezaga eseli na myaka makumi masatu gaabutile Eberi. 15 Sela alamine myaka nkama inazi nu isatu kumbusa kwa kubuta Eberi, nu abutile bango bana, basikila nu bakinga.
16 Eberi abezaga eseli na myaka makumi masatu nu inazi gaabutile Pelegi. 17 Eberi alamine myaka nkama inazi nu makumi masatu kumbusa kwa kubuta Pelegi, nu abutile bango bana, basikila nu bakinga.
18 Pelegi abezaga eseli na myaka makumi masatu gaabutile Reu. 19 Pelegi alamine myaka nkama ibili nu mubula kumbusa kwa kubuta Reu, nu abutile bango bana, basikila nu bakinga.
20 Reu abezaga eseli na myaka makumi masatu nu ibili gaabutile Serugu. 21 Reu alamine myaka nkama ibili nu mutubakamo kumbusa kwa kubuta Serugu, nu abutile bango bana, basikila nu bakinga.
22 Serugu abezaga eseli na myaka makumi masatu gaabutile Nahori. 23 Serugu alamine myaka nkama ibili kumbusa kwa kubuta Nahori, nu abutile bango bana, basikila nu bakinga.
24 Nahori abezaga eseli na myaka makumi mabili nu mubula gaabutile Tera. 25 Nahori alamine myaka lukama ikumi nu mubula kumbusa kwa kubuta Tera, nu abutile bango bana, basikila nu bakinga.
26 Tera abezaga eseli na myaka makumi mutubakamo gaabutile Abramu, Nahori nu Harani.
Bibuti bya Tera.
27 Bibino u bibuti bya Tera: Tera abutile Abramu, Nahori nu Harani. Harani abutile Loti. 28 Harani akule lwabusio lw'isi Tera ku kisi kyabutilwe mukyo, u mwino wa Uri ku kisi kya baKaldea. 29 Abramu nu Nahori basongile. Abramu asongile Sarai, nu Nahori asongile Milka wabezaga mukinga wa Harani, isi wa Isika. 30 Sarai abezaga mugumba, ntabezaga na mwana.
31 Tera atolile mwana wage Abramu, nu Loti u mwana wa Harani, muyukulu wage, nu mukamwana wage Sarai, u mukazi wa Abramu. Batukile bobansania mu mwino wa Uri ku kisi kya baKaldea, buno bende mu kisi kya Kanana. Nu gababasile ku mwino wa Harani, beikede ko. 32 Tera alamine myaka nkama ibili nu itano, nu akule mu Harani.