Kita kana masadia mombarasai kasusa bo kapari ewa Kristus mboto
4
Kristus mboto nombarasai kasusa bo kapari ri korona tempo Iꞌa ri dunia eꞌi. Jadi etumo sabana komi woꞌu kana mompakaroo raramu ala masadia rapandasa ewa Iꞌa. Sabana isema-sema to nombarasai kasusa bo kapari ri korona mboto daꞌa mana mowia silaka.
2 Jadi tempo kita danatuwu ri bengo nu dunia eꞌi kita kana matuwu mantuki dota nu Alatala, neꞌe mana mantuki dota rara manusia to najaꞌa.
3 Sabana naganamo loga komi nantuki pokainggu-pokainggu tau daꞌa nangginjani Alatala. Bopia komi aga natuwu ante pokainggu to natantoru, komi aga nantuki dota rara to najaꞌa, komi nabiasa nalangu-langu, komi nasiromu nanggoni mpebasa bo nanginu-nginu tule, pade komi nompakoni pue-pue ntanina ante akala to nompakarunggu rara.
4 Tapi weꞌi-weꞌi natekaja roa-roa komi sabana komi mana madota mantuki ira mompebasa mowia kajaꞌana. Pade ira nanguli sinjaꞌi komi.
5 Tapi kana marata tempona ira mompangaku powia ira to najaꞌa etu ri ngayo Alatala, sabana nasadiamo Iꞌa mombatangara pura-pura tau, nabeloka to danatuwu, nabeloka to namatemo.
6 Etu sampe Kareba Belo nipatolele woꞌu ka tau-tau to namatemo. Patujuna ala naupa ira nisuku bo koro ira namatemo ewa nabiasa ante manusia, wayo ira mamala matuwu mabelo nantuki dota nu Alatala.
Topomparasaya kana matuwu mosaongu rara bo mositulungi
7 Namosumo kaopu nu dunia. Jadi etu sampe komi kana manoto bo mainga ala komi mamala mosambaya.
8 Tapi to neliu nggapokona komi kana mpuꞌu-mpuꞌu mosipotowe sambaꞌa bo sambaꞌa. Sabana ane kita mompotowe roata kita daꞌa mompariara ntaꞌi sala ira to nadea ri jaꞌita.
9 Komi kana majole mantarima torata riara njapomu ante daꞌa mongua-ngua.
10 Kita sambaꞌa bo sambaꞌa niwai ka pompakule nggari jaꞌi Alatala. Jadi kita kana mompake pompakule etu ala mantulungi roa-roata mantarima rasi bo belo nggari jaꞌi Alatala.
11 Jonjona, isema-sema to niwai ka pompakule manggeni Tesa nu Alatala kana motesa ewa tau to niposumba Alatala mboto. Isema-sema to niwai ka pompakule mantulungi tau ntanina kana mantulungi ante karoso to niwai Alatala ka iꞌa. Pakemo pompakule-pompakule etu ala riara nuapa-nuapa to majadi Alatala ratoiya bo rabila nggari powia Yesus Kristus ri tatongo komi etu. Iꞌamo to nakuasa bo masipato ratoiya bo rabila sampe ri kasae-saena. Amin!
Nasana mpuꞌu tau nipandasa sabana nomparasaya Kristus
12 Sampesuwu-sampesuwu to nipotoweku, neꞌe komi matekaja mombarasai pepandasa to napaꞌi mpuꞌu ewa apu to neliu nggapane to narata mombauji pomparasaya komi. Neꞌe rapekiri to nirasai komi etu sangele nontani nggari biasa.
13 Tapi komi kana madamba-damba sabana komi namala mombarasai kasusa bo kapari ewa to nirasai Kristus mboto. Ante iwetu, mabete mpuꞌu kadamba nu rara komi tempo kabete kuasa bo kagaya Kristus to nipogumaa rapopokita ka pura-pura manusia.
14 Masana mpuꞌumo komi ane komi rasalaraka ntau sabana komi nompangaku sanga Kristus. Sabana ane etu majadi Nosa Nagasa nu Alatala to nipogumaa kana matekita riara nggatuwu komi.
15 Aga neꞌe sampe maria nggari tatongo komi to rapandasa sabana iꞌa nepatesi bara nangangga bara nowia kajaꞌana atau nombagalo urusa tau ntanina.
16 Tapi ane komi rapandasa sabana komi topomparasaya neꞌe maeya matamu. Ulimo tarima kasi ka Alatala sabana komi nipandasa ewa sambaꞌa topomparasaya Kristus.
17 Naratamo tempona Alatala nompamula mombatangara pura-pura manusia. Pade kita todeana mboto to mokolu ratangarana. Tapi ane kita todeana to mokolu ratangarana, natantumo meliu nggatomo pesukuna ka tau-tau to daꞌa madota momparasaya Kareba Belo nggari jaꞌina!
18 Ewa to nitulisi riara Buku Nagasa iweꞌi:
“Ane tau to nanoa rapakasalama aga ante mombarasai mpengele-ngele kasusana,
iwenumo ante tau nasilaka to daꞌa nantuki dota Alatala?
Natantumo ira daꞌa ntoto namala rapakasalama!” (Ams. 11:31)
19 Jadi sampesuwu-sampesuwu, ane maria komi to rapandasa nantuki dota Alatala, jujumo katuwumu ka Alatala to nompajadi langi bo dunia, pade neꞌe komi menonto mowia to nabelona. Sabana Iꞌa namala raparasaya mompakadupa pojanjina ka komi.