Yakobus i

SURA NGGARI JAꞌI

YAKOBUS

Tesa nompakanoto isi sura

Topotulisi sura eꞌi Yakobus. Nantuki tesa to Karistee nggaolu Yakobus eꞌi sambaꞌa tuaꞌi Pue Yesus mboto. (Kitamo Mat. 13:55, Gal 1:19.) Pamulana iꞌa daꞌa nomparasaya Yesus, tapi naliu Yesus namate natuwu bali iꞌa nomparasaya Yesus Magau to Mompakasalama to nijanji Alatala. Iꞌa najadi topanggeniaka topomparasaya ri ngata Yerusalem. (Kitamo Suro 21:18; Gal. 2:9.) Sura eꞌi nitulisina ka “pura-pura topomparasaya to nosimpotatare ri njumaongu dunia.”

Patuju Yakobus nantulisi sura eꞌi ala mompatuduki bo mompakaroso rara topomparasaya. Iꞌa nompakanoto ka ira pokainggu to masipato ka sambaꞌa topomparasaya i Pue Yesus to nakonona.

Isi sura to napokona iweꞌi:

1. Parasayamo Alatala tempo nipandasa (1:1-18)

2. Mangepe bo mantuki Tesa nu Alatala (1:19-27)

3. Neꞌe manggita lenje (2:1-13)

4. Popokitamo pomparasaya ante powia to nabelona (2:14-26)

5. Jagaimo jila (3:1-12)

6. Noto nggari jaꞌi Alatala (3:13-18)

7. Pokainggu topomparasaya riara dunia (4:1-17)

8. Popatora ka tau-tau nakalumana (5:1-6)

9. Pepatuduki kaopuna (5:7-20)