Pokainggu to nompakadamba Alatala
13
Neꞌe komi menonto mosipotowe sambaꞌa bo sambaꞌa ewa topomparasaya i Pue Yesus to nosampesuwu.
2 Neꞌe malinga rara mantarima torata anu daꞌa ninjani komi riara njapo komi, sabana ante nowia iwetu nariamo bara sakuya mbaꞌa tau nantarima malaeka-malaeka i Pue riara njapo ira ante daꞌa ninjani-njani.
3 Toramo tau-tau to nitarunggu nasimbayu ewa komi mboto woꞌu nitarunggu mpasanggani-nggani ante ira. Pade toramo tau-tau to nipakasusa ntau, sabana ninjani komi mboto kasusa to nirasai ira.
4 Porongo kana rabila ri tatongo komi pura-pura. Neꞌe mompakatantoru porongomu ante mogau sala ante tau daꞌa rongomu mboto, sabana Alatala kana mombasuku tau to nogau sala ante tau daꞌa rongona mboto bo topebualo.
5 Neꞌe komi rapobatua nu doi, tapi komi kana madamba-damba ante nuapa-nuapa to naria ri jaꞌimu. Sabana Alatala nanguli iweꞌi: “Aku daꞌa ntoto mompalamba komi atau mompalasi komi.” a
6 Etu sampe kita mabia manguli iweꞌi:
“Pue topantulungi aku, jadi aku daꞌa maeka.
Nuapa to mamala rapowia ntau ka aku?” (Mzm. 118:6)
Pasialamo katuwu topanggeniaka komi bo pekoumo ri jaꞌi ira
7 Pekirimo katuwu topanggeniaka-topanggeniaka agama komi to nanggeni Tesa nu Alatala ka komi bopia. Pariara ntaꞌimo jonjo katuwu ira bo kamate ira, pade pasialamo pomparasaya ira.
8 Toramo! Yesus Kristus batena nasimbayu, nabeloka tempo bopia, nabeloka weꞌi-weꞌi pade sampe ri kasae-saena.
9 Neꞌe komi rapakasalanjala ntau ante mantuki mpengele-ngele pepatuduki to nontani nggari pepatuduki to nakonona. Agina pomparasayata rapakaroso nggari towe belo nu Alatala, daꞌa nggari atura-atura ewa panggoni to masipato rakonita. Atura-atura etu daꞌa ntoto namala mantulungi kita.
10 Naria meja mpesombata. b Tapi topanggeni agama to nanggeni pesomba ri Tenda Mpepue nantuki Atura-atura agama daꞌa namala ratulungi ri meja mpesomba etu.
11 Nantuki Atura-atura agama lei nggari binata to nisambale ewa pesomba kana nikeni Balengga Topanggeni Agama rapesomba riara Petoꞌo to Neliu Nggagasa riara Sapo Mpepue ala mombasompo silaka ntodea. Tapi watabaku nu binata etu kana nipalabu ri sawaliku ngata. c
12 Etu nombagambara ka kita nuapa to najadi ante Yesus. Iꞌa woꞌu nikeni nipatesi ri sawaliku bobaa ngata Yerusalem ala Iꞌa mamala mompakagasa topomparasaya Iꞌa ante leina mboto.
13 Sabana etu kamaimo kita maroo ri jaꞌi Yesus. Kamaimo kita woꞌu rasalai nasimbayu ewa Iꞌa nisalai.
14 Sabana ri dunia eꞌi daꞌa ria petoꞌota to naroo, tapi kita manjarumaka petoꞌo ntanina to neliu nggabelo ri suruga.
15 Jadi sabana etu pura-pura, ante petulungi Yesus kamaimo kita tunggai manggeni pesombata ka Alatala, etumo tesata mombatoiya bo mombabila sangana.
16 Tapi neꞌe rakalingata mompowia to nabelona bo mositulungi, sabana etumo pesomba to nompakadamba rara nu Alatala.
17 Tukimo parenta-parenta ntopanggeniaka-topanggeniaka komi pade pekoumo ri jaꞌi ira. Sabana iramo to nanggeniaka katuwu komi. Kana marata tempo banepia ira motarangga mpakanoto ri jaꞌi Alatala iwenu ira nanggeniaka komi. Jadi pekoumo komi ri jaꞌi ira ala ira mamala mantui bago etu ante madamba rara. Ane komi daꞌa mekou ri jaꞌi ira, ira aga masusa rara pade etu daꞌa manggeni kabelona ka komi.
Tesa kaopuna
18 Sampesuwu-sampesuwu, posambayamo ka kami. Niparasaya kami rara ntaꞌi kami nagasa. Riara mpengele-ngele kami batena madota mompowia nuapa to nanoana.
19 Kuperapi ka komi, posambayamo ala aku mamala masasinta rakeni Alatala manjili ri jaꞌi komi.
20-21 Alatala nompakatuwu bali Pueta Yesus nggari kamatena. Iꞌamo Topoewu to nakuasa to nompoewu kita bimba-bimbana. Leina nipatiti nompakaasa pojanji Alatala ante kita to nalaku sampe ri kasae-saena. Perapi Alatala, puꞌu katuwua nabelo mompakagana ka komi nuapa pura to nabelona ala komi mompakule mowia dotana. Perapi Iꞌa manggeni komi mompowia to nikonoana ante petulungi nggari jaꞌi Yesus Kristus. Iꞌamo to masipato ratoiyata bo rabilata sampe ri kasae-saena. Amin!
22 Sampesuwu-sampesuwu, aku merapi ka komi, epemo ante mosabara tesa to nitulisiku eꞌi, sabana suraku eꞌi daꞌa woꞌu nandateka.
23 Kana ranjani komi sampesuwuta i Timotius nikabasakamo nggari tarunggu. Ane iꞌa masasinta marata ri jaꞌiku, aku manggeni iꞌa mpasanggani-nggani momai manggita komi.
24 Pakasampe tabe kami ka pura-pura topanggeniaka komi pade ka pura-pura topomparasaya ri setu. Pade tarimamo tabe nggari jaꞌi topomparasaya-topomparasaya ri Propinsi Italia.
25 Perapi Pue mombagane komi pura-pura.