Pasialamo jonjo topomparasaya nggaolu bo i Pue Yesus
12
Toramo, nadea mpuꞌu topomparasaya nantara kita. Sabana etu kamaimo kita mantajiaka pura-pura nuapa to nompakakaduku bo silaka to nagampa mpuꞌu nompule kita. Kamaimo kita mongowa ntutu riara posilumba to nipakatantu Alatala ka kita.
2 Kamaimo kita mowia etu ante tunggai manggita Yesus, puꞌu nu pomparasayata bo to nompakaroso pomparasaya etu sampe ri kaopuna. Iꞌa naroo nantaꞌamaka kasusa bo kapari nipaku ri kayu parika ante daꞌa nompekiri eyana, sabana nitorana kadamba to nipakasadia ka Iꞌa. Pade weꞌi-weꞌi Iꞌa nekatoko ri petoꞌo to nibila ri panggana nu Alatala.
3 Pekirimo Iꞌa to naroo nantaꞌamaka rau rara nggari jaꞌi tau-tau nasilaka to nangewa Iꞌa ala neꞌe komi majadi malente bo maopu rara.
Patuju kasusa bo kapari riara nggatuwuta
4 Sampesuwu-sampesuwu, riara posibali komi mangewa silaka daꞌapa ria komi nandasa sampe nesuwu lei.
5 Bara nikalinga komimo tesa nu Alatala nggari Buku Nagasa to niulina ala mompakaroso rara komi ewa ana-anana mboto iweꞌi:
“Anaku, neꞌe manjapuaka pepatuduki i Pue.
Neꞌe maopu rara ane Iꞌa mangontiaka komi.
6 Sabana i Pue nompatuduki butu mbaꞌa tau to nipotowena.
Iꞌa nombaporo butu mbaꞌa tau to nipangakuna anana.” (Ayb. 5:17, Ams. 3:11-12)
7 Jadi komi kana maroo mantaꞌamaka kasusa bo kapari to nirasai komi. Tarimamo etu ewa pepatuduki nggari jaꞌi Umamu Alatala, sabana Iꞌa nanggita komi ewa anana mboto. Nariamo ngana daꞌa nipatuduki nu umana? Natantumo daꞌa!
8 Tapi ane komi daꞌa nipatuduki nasimbayu ewa pura-pura ngana ntanina, batuana komi daꞌa ana ote, komi aga ana wone.
9 Ntanina nggari etu, umata ri dunia nompatuduki kita pade kita nekou ri jaꞌi ira. Ane iwetu, natantumo kita kana neliupa mekou ri jaꞌi Umata Alatala to nompajadi wayota ala kita matuwu mabelo.
10 Umata ri dunia eꞌi nompatuduki kita sampalai nantuki nuapa to nireke ira nabelo. Tapi Alatala nompatuduki kita ala manggeni belo ka kita. Patujuna ala kita majadi magasa nasimbayu ewa Iꞌa.
11 Tantu tempo kita nipatuduki kita daꞌa nadamba, tapi aga nasusa. Tapi ane kita mantarima pepatuduki etu, kaopuna kana maria aselena riara nggatuwuta, etumo kita matuwu mosinggabelo ante manoa rara.
12 Sabana etu, sampesuwu-sampesuwu, pakaroo rara komi to nalente bo pakaroso pomparasaya komi to nogoya-goya.
13 Tukimo jala to nakonona ala roa-roa komi to nalente pomparasaya ira daꞌa masalanjala, tapi majadi tau to maroso pomparasayana.
Pokainggu to masipato ka tau to niwai Alatala ka pojanji nabou
14 Komi kana tunggai mompasimbuku matuwu mosinggabelo ante pura-pura tau. Pade pasimbuku woꞌu matuwu magasa, sabana tau daꞌa nagasa katuwuna daꞌa ntoto mamala manggita i Pue.
15 Jagaimo koro komi sambaꞌa bo sambaꞌa ala neꞌe sampe maria tau to daꞌa madota mantarima towe belo nu Alatala. Neꞌe sampe maria tau nomboli silaka riara ntaꞌina. Sabana ante iwetu ira majadi ewa kale to napaꞌina ri tatongo komi. Ira aga mompopeumba posinggarau pade mompakatantoru todea.
16 Neꞌe sampe maria to mogau sala ante tau daꞌa rongona mboto, bo neꞌe sampe maria to aga mompekiri kasana korona ri dunia bo daꞌa mompekiri dota nu Alatala nasimbayu ewa to nipowia Esau. Iꞌa nompobalu rasi bo kabelona to majadi bagiana ewa ana ulumbua ante sanjuraya lau panggoni. a
17 Ninjani komi mbotomo tempo iꞌa nerapi rasi etu nggari jaꞌi umana nggapuri iꞌa nipoara naupa iꞌa nerapi-rapi ante nageo. Sabana daꞌa niratana jala mombabali nuapa to nipowiana bopia.
Neliu nggabelo pojanji Alatala to nabou
18 Sampesuwu-sampesuwu, nuapa to nirasaita to nantarima pojanji Alatala to nabou daꞌa nasimbayu ante nuapa to nirasai totuꞌata nggaolu tempo Alatala nombawai pojanjina nggasae. Ira to Israel narata nantingayo sangele to namala raere, etumo Bulu Sinai ante apu to najela-jela. Ira nanggita karumauna to neliu-liu bo bara to neliu nggagai.
19 Ira nangepe wamba kololio to nagai mpuꞌu bo suara notesa. Tempo ira nangepe suara etu naeka mpuꞌumo ira sampe ira nerapi ante mpuꞌu-mpuꞌu ala suara etu mana motesa ka ira. b
20 Sabana daꞌa namala ira nantaꞌamaka mangepe parenta to nitesa suara etu, iweꞌi: “Ane maria komi bara binata komi marata mangere bulu eꞌi, iꞌa kana rarempe ante watu sampe mamate.” c
21 Pura-pura nuapa to nikita ira ri setu mpuꞌu-mpuꞌu nompakawiora rara ira sampe i Musa nanguli, “Aku mpuꞌu-mpuꞌu naeka bo nolalete.” d
22 Tapi neliu nggabelopa to nirasaita to nantarima pojanji Alatala to nabou. Ewa kita narata ri Bulu Sion, ngata nu Alatala to Natuwuna, etumo ngata Yerusalem ri suruga. Kita nanggita njobu-njobu malaeka to nasiromu madamba-damba.
23 Pade kita nanggita todea topomparasaya i Pue Yesus to naria sanga-sanga ira nitulisi riara buku Alatala ri suruga. Kita nanggita Alatala, Topotangara pura-pura manusia. Pade kita nanggita wayo-wayo ntau nanoa to najadi nagasa.
24 Pade kita woꞌu nanggita Yesus, Tau Ntongo to nombaurusi pojanji nabou etu. Pade kita nanggita leina to nipatiti to neliu nggabelo nggari lei i Habel. e
Popatora: Neꞌe mompoara kabelo nu pojanji to nabou
25 Jadi sampesuwu-sampesuwu, pakabelo-belo ala neꞌe sampe komi daꞌa madota mangepe tesa to niuli Alatala ka komi. Sabana ane ira to daꞌa nadota mangepe pepatora Alatala nggari buluna ri dunia daꞌa nakabasaka nggari pesuku Alatala, neliu-liupa kita to nangepe Iꞌa notesa nggari suruga. Ane kita daꞌa madota mangepe Iꞌa, natantumo kita woꞌu daꞌa makabasaka nggari pesukuna to marata.
26 Tempo nggaolu ri Bulu Sinai suara Alatala to nagai nombagagoya dunia. Tapi weꞌi-weꞌi Iꞌa nojanji iweꞌi: “Sangganipa banepia kana kugagoya dunia, pade daꞌa aga dunia tapi langi woꞌu.” f
27 Tesana “sangganipa” etu nompakanoto pura-pura nuapa to nipajadina kana ragagoyana bo rapakalipona ala aga to daꞌa namala ragagoya to naboli.
28 Jadi etu sampe kita masipato manguli tarima kasi ka Alatala, sabana kita niwai loga majadi todea riara Poparentana to daꞌa ntoto namala ragagoya. Kamaimo kita mepue ka Alatala ante inggu to nompakadamba Iꞌa, etumo ante maeka bo mekou ri jaꞌina.
29 Sabana Alatalata kana mombasuku tau-tau to mompoara kabelona nasimbayu ewa apu to napane njuꞌu mompalabu mpakaopu tinalu.