Pomparasaya
11
Nomparasaya batuana ninjanitamo nuapa to nisarumakata kana raratata, nariamo katantuna riara ntaꞌita ewa nuapa anu daꞌapa nikitata.
2 Nggari pomparasaya ira totuꞌata nggaolu nikonoa Alatala.
3 Nggari pomparasayata ninjanita langi bo dunia nipajadi Alatala ante Tesana sampe nuapa to natekita najadi nggari anu daꞌa natekita.
Jonjo pomparasaya Habel, Henokh bo Nuh
4 Nggari pomparasayana i Habel nanggeni ka Alatala pesomba to neliu nggabelo nggari pesomba tuakana i Kain. Nggari pomparasayana etu i Habel nitarima Alatala ewa tau nanoa sabana nanotomo pesombana nikonoa Alatala. a Pade naupa iꞌa namatemo, kita batena nipatuduki nggari jonjo pomparasayana.
5 Nggari pomparasayana i Henokh daꞌa namate tapi niore Alatala nggari dunia eꞌi. Iꞌa nielo-elo tapi daꞌa ria nirata ntau, sabana iꞌa niore Alatala nggari dunia eꞌi. Naria tesa ri Buku Nagasa to nompakanoto daꞌapa i Henokh niore, katuwuna nikonoa Alatala. b
6 Toramo! Daꞌa ria kamba sambaꞌa to namala nikonoa Alatala ane daꞌa ria pomparasayana. Sabana isema-sema to madota mompakamosu Alatala kana momparasaya naria Alatala, pade momparasaya woꞌu Iꞌa mombawai rasi ka tau-tau to nangelo Iꞌa ante mpuꞌu-mpuꞌu rarana.
7 Nggari pomparasayana tempo i Nuh nipopanjani Alatala ewa kajadia to majadi anu daꞌapa sanggani nikita ntau, iꞌa natundu ri jaꞌina bo nompowia sakaya bete ala mompakasalama ira saongu njapo. Ante iwetu pura-pura manusia ri dunia nipakasala tapi i Nuh mboto nireke Alatala nanoa sabana pomparasayana. c
Jonjo pomparasaya Abraham
8 Nggari pomparasayana Abraham nantuki parenta Alatala tempo iꞌa nipokio Alatala malau mpaka ri tana to nijanji Alatala majadi bagiana. Nanggaliwomo iꞌa nggari ngatana mboto naupa daꞌapa ninjanina ri umba tana to rakalauna etu. d
9 Nggari pomparasayana iꞌa netoꞌo ri tana to nijanji Alatala etu ewa topesowo sabana tana etu daꞌapa najadi bagiana. Ri setu iꞌa danetoꞌo ri tenda, pade waꞌa woꞌu Ishak bo Yakub, mulina to niwai Alatala ka janji to nasimbayu.
10 Abraham nosabara netoꞌo iwetu sabana nisarumakana iꞌa kana metoꞌo ri ngata to naroo ri suruga banepia to niponia bo nipowia Alatala ante pondasi to daꞌa magero-gero.
11 Nggari pomparasayana Abraham bo rongona i Sara woꞌu nombarata karoso ala momuli, naupa Abraham natuꞌamo bo i Sara nagampa. Etu najadi sabana ninjanina Alatala namala raparasaya mompakadupa pojanjina.
12 Naupa Abraham neliu nggatuꞌamo iꞌa nomuli ka muli to nadea anu daꞌa namala rabila kadeana, nasimbayu ewa betuꞌe ri langi bo bone ri wiwi ntasi.
13 Pura-pura tau to nitesaku ri baꞌana batena nomparasaya sampe namate. Daꞌapa nitarima ira nuapa to nijanji Alatala, tapi niparasaya ira etu kana ratarima muli ira banepia. Ira nompangaku dunia eꞌi daꞌa petoꞌo ira to nakonona, ira aga topesowo bo topenjayo ri dunia eꞌi.
14 Tau to nanguli iwetu nompakanoto ira danangelo petoꞌo to majadi bagia ira mboto.
15 Daꞌa tana to nipalasi ira bopia to nipolentora ira, sabana ane iwetu, nariamo loga ka ira manjili gu saꞌa.
16 Tapi kakonona ira nalentora ka ngata to neliu nggabelo, etumo ngata to naria ri suruga. Etu sampe Alatala daꞌa naeya matana ane niuli Alatala ira, sabana naria mami ngata to nipakasadiana ka ira.
17-18 Nggari pomparasayana tempo Abraham niuji Alatala, iꞌa nasadia nombawai anana Ishak rasambale ewa pesomba ka Alatala. Bopia Alatala nojanji ka Abraham iweꞌi: “Nggari Ishakmo pade komi mombarata muli to nijanjiku ka komi.” e Tapi naupa iwetu Abraham nasadia nombawai Ishak, anana sambaꞌa lau, rasambale ewa pesomba ka Alatala.
19 Nipekirina Alatala nompakule mompakatuwu bali Ishak nggari kamatena. Jadi namala rauli ewa Abraham nantarima bali anana to nipakatuwu Alatala bali nggari kamatena.
Jonjo pomparasaya Ishak, Yakub bo Yusuf
20 Nggari pomparasayana Ishak etu nombajanji ka anana Yakub bo Esau rasi to rawai ka ira tempo marata. f
21 Pade nggari pomparasayana tempo Yakub mana masaeka mamate, iꞌa nombajanji rasi etu ka rombaꞌa ana Yusuf. Pade iꞌa nompatuko ri lembauna nombatoiya bo nombabila Alatala. g
22 Nggari pomparasayana tempo Yusuf mana masaeka mamate, iꞌa nombaboto iwenu todea Israel kana mesuwu nggari tana Masir banepia. Pade iꞌa nombaboli tewai ewa nuapa rapowia ka watabakuna tempo ira mesuwu malai. h
Jonjo pomparasaya Musa
23 Nggari pomparasaya indo uma i Musa tempo ana ira etu niote, iꞌa nitabuniaka ira tolumbula kasaena sabana nikita ira iꞌa sambaꞌa ngana to nagayana. Daꞌa naeka ira nangewa parenta Magau Masir to nanguli butu mbaꞌa ngana langgai to Israel kana rapatesi. i
24 Nggari pomparasayana tempo i Musa nabetemo, iꞌa daꞌa nadota rauli ana nu ana besi Magau Masir. j
25 Nipokononapa mombarasai kasusa bo kapari mpasanggani-nggani ante todea nu Alatala pade mombarasai kasana aga sampalai nggari katuwu nasilaka.
26 Nipekirina nabelopa iꞌa rasalai nasimbayu ewa Kristus to marata banepia pade mombarata pura-pura kakalumana ri tana Masir, sabana iꞌa bate nanjarumaka rasi to rawai Alatala ka iꞌa banepia.
27 Nggari pomparasayana i Musa daꞌa naeka nalai nggari tana Masir naupa narau mpuꞌu rara Magau Masir. Musa naroo nantuki dota i Pue nasimbayu ewa iꞌa nanggita Alatala to daꞌa natekita. k
28 Nggari pomparasayana iꞌa nompowia ada Paska, pade niparentana ala lei nggari ana bimba to nisambale ragese ka pewobo sapo nto Yahudi, ala neꞌe ana ira mawela rapatesi tempo malaeka Alatala marata mompatesi ngana-ngana ulumbua ri tana Masir. l
Jonjo pomparasaya tau-tau ntanina
29 Nggari pomparasaya ira, tau-tau to Israel namala nombawote Tasi Lei nasimbayu ewa nolumako ri kabatana. Tapi tempo to Masir nompasimbuku mewote, ira aga niome ntasi. m
30 Nggari pomparasaya tau-tau to Israel tembo ngata Yerikho nadungga naopu nitalili ira pitueo kasaena. n
31 Pade nggari pomparasayana i Rahab, besi bajinga, daꞌa namate mpasanggani-nggani ante to Yerikho to daꞌa natundu ri jaꞌi Alatala, sabana iꞌa nantarima mata-mata to Israel ante nabelo. o
32 Sampesuwu-sampesuwuku, danadeapa jonjo ntanina to mamala kutesa tapi daꞌa nagana logaku mantesa mpakanoto ewa pomparasaya ira i Gidion, i Barak, i Simson, Yefta, i Daud, nabi i Samuel ante nabi-nabi ntanina. p
33 Nggari pomparasaya ira, naria ira nombadagi magau-magau. Naria ira nomparenta todeana ante nanoa, pade naria ira nantarima nuapa to nijanji Alatala ka ira. Naria ira nombalamu nganga nu singa.
34 Naria ira nompopaya apu to narega njuꞌu, pade naria ira nakabasaka nggari topetimbe. Tempo nalente naria ira nipakaroso bali. Naria ira najadi naroso riara posibali sampe ira nompakule nombadagi tantara-tantara to sangatana.
35 Pade naria besi-besi nanggita bali ana-ana ira to namate nipakatuwu bali.
Tapi naria tau-tau ntanina to nompakamba koro ira niboba sampe namate. Ira daꞌa nadota rakabasaka nggari kasusa etu ala ira mamala rapakatuwu bali ante katuwua to neliu nggabelo.
36 Naria woꞌu to nipongei-ngei bo niporo mpakandasa, pade naria to nibalanggu bo nisuaraka riara tarunggu.
37 Naria woꞌu to nirempe watu sampe namate bo naria to nigaragaji mpakaputu, pade naria to nipatesi ante guma. Ira nalai-lai nangelo katuwua pade pakea ira aga kulimba nu bimba bo towau. Ira mpuꞌu-mpuꞌu nakabu, ira nipakasusa bo nipakasesa.
38 Ira nalai-lai ri karawa baina bo ri buluna. Ira aga netoꞌo ri bololia bo ri bolo-bolo ntana. Kakonona ewa dunia to najaꞌa eꞌi daꞌa masipato rapetoꞌo ira.
39 Ira pura-pura nikonoa Alatala sabana nomparasaya, naupa ira daꞌapa nantarima pura-pura nuapa to nijanji Alatala.
40 Sabana naria to neliu nggabelo to nipakasadia Alatala ka kita. Pade patujuna ala ira mompopea sampe kita pura-pura rapakagasa mpasanggani-nggani ante daꞌa ria pokainggu to nasalana.