Lei Kristus nompakaropu silakata sampe ri kasae-saena
10
Atura-atura agama to nipapola i Musa aga gambara kabelona to rakeni Kristus ka kita, daꞌa lenjena mpuꞌu. Pesomba-pesomba to nipakatantu riara Atura-atura etu daꞌa ntoto namala manggeni tau majadi manoa riara mpanggita Alatala, naupa ira butu-butu mpae marata manggeni pesomba to nasimbayu rapesomba ka Alatala.
2 Ane rapana pesomba ira etu namala mantapasi silaka, natantumo ira mana manggeni pesomba ka Alatala, sabana mana matomo rara ira mantora silaka ira.
3 Tapi kakonona pesomba to nikeni ntau butu-butu mpae aga nompopatora ka tau ira nasilaka.
4 Sabana lei nggari japi pomawa bo towau tuamana daꞌa ntoto namala mompakaropu silaka.
5 Etu sampe tempo Kristus narata ri dunia eꞌi, Iꞌa nanguli iweꞌi:
“O Alatala, pesomba bo pewai daꞌa nipodotamu,
tapi naria koro to nipakasadiamu ka Aku.
6 Pesomba to nipalabu bo pewai-pewai to niwai ala mombasompo silaka
daꞌa nipokonomu.
7 Pade Aku nanguli, ‘Kita weꞌi, O, Pue Alatala,
naratamo Aku mompowia dotamu
nasimbayu ewa to nitulisi riara Buku Nagasa ewa Aku.’” (Mzm. 40:7-9)
8 Ri baꞌana Iꞌa nanguli, “Pesomba bo pewai daꞌa nipodotamu.” Pade niulina, “Pesomba to nipalabu bo pewai-pewai to niwai ala mombasompo silaka daꞌa nipokonomu.” Etu to niulina naupa etu pura-pura nikeni ka Alatala nantuki Atura-atura agama.
9 Naopu Iꞌa nanguli iwetu, nitambaina iweꞌi: “Kita weꞌi, O, Pue Alatala. Naratamo Aku mompowia dotamu.” Jadi sampesuwu-sampesuwu, pesomba-pesomba to nantuki Atura-atura agama nipakalipo Alatalamo ala Iꞌa mamala manjambei pesomba etu ante pesomba Kristus.
10 Pade nggari dota Alatala etumo, kita nipakagasa tempo Yesus Kristus nombawai korona mboto ewa pesomba sanggani lau sampe ri kasae-saena.
11 Eo-eo topanggeni-topanggeni agama Yahudi nekanggore nantui bago ira. Nompenggani-nggani ira nanggeni pesomba-pesomba to nasimbayu ka Alatala. Tapi pesomba etu daꞌa namala mompakaropu silaka. a
12 Tapi Kristus nanggeni sangele lau pesomba, pade pesombana etu namala mompakaropu silaka sampe ri kasae-saena. Naopu etu Iꞌa neore mpaka ri suruga pade nekatoko ri petoꞌo to nibila ri panggana nu Alatala.
13 Pade weꞌi-weꞌi Iꞌa nompopea sampe Alatala mompowia pura-pura balina mekou ri jaꞌina.
14 Jadi ante sangele lau pesombana Kristus nompegasa kita nggari silakata pade nompajadi kita tau daꞌa ria sala riara mpanggita Alatala sampe ri kasae-saena.
15 Nosa Nagasa nu Alatala woꞌu nompakanoto etu ka kita. Niulina iweꞌi:
16 “Iweꞌimo pojanji to kupowia ante ira
ri tempo to marata etu:
Aku kana mombaboli Atura-aturaku riara pekiri ira,
bo mantulisi etu riara ntaꞌi ira.”
Iwetu panguli i Pue. (Yer. 31:33)
Pade niulina woꞌu,
17 “Silaka-silaka bo kajaꞌa-kajaꞌa ira mana kutora.” (Yer. 31:34)
18 Jadi ane silaka-silaka bo kajaꞌa-kajaꞌa naopu niampungimo, mana paraluu pesomba mombasompo silaka.
POKAINGGU TO MASIPATO KA TAU TO NIPAKASALAMA I PUE YESUS (10:19-13:25)
Kamaimo kita mompakamosu Alatala ante mabia
19-20 Jadi sampesuwu-sampesuwu, weꞌi-weꞌi kita nabia mompakamosu Alatala sabana nggari lei i Pue Yesus. Ante kamatena Iꞌa nombabuka ka kita jala to nabou to nanggeni katuwua nabelo. Ri Tenda Mpepue jala mesua riara Petoꞌo to Neliu Nggagasa nilawa kae powombo. Tapi ante nombawai korona rapatesi Kristus nombabuka jala ala kita mamala mompakamosu Alatala nasimbayu ewa Balengga Topanggeni Agama Yahudi nombaliunaka kae powombo mpaka ri jaꞌi Alatala ri Petoꞌo to Neliu Nggagasa.
21 Pade Kristus najadi Balengga Topanggeni Agama to nanggeniaka ananjapo Alatala.
22 Jadi kamaimo kita mompakamosu Alatala ante rara to nalusu bo pomparasaya to naroo, sabana rara ntaꞌita to nompakasala kita bopia naopu nipakagasa ante lei Kristus, pade korota naopu nidiu ante ue to nagasa.
23 Kamaimo kita maroo manjarumaka nuapa to nipangakuta ante daꞌa molenga-lenga, sabana ninjanita Alatala namala raparasaya mompakadupa pojanjina.
24 Pade kamaimo kita mompekiri roata sambaꞌa bo sambaꞌa ala kita mamala mosipakaroso rara sampe kita pura-pura mosipotowe bo manggawia powia to nabelona.
25 Neꞌe kita metikoꞌo rara masiromu modade ewa kabiasa bara sakuya mbaꞌa tau, tapi kamaimo kita mosipopatora sambaꞌa bo sambaꞌa, neliu-liupa weꞌi-weꞌi sabana ninjanita namosumo karata i Pue Yesus bali ri dunia.
Pepatora: Neꞌe mombasapu Ana nu Alatala
26 Ane ratunggaita mowia silaka naopu kita nantarima pepatuduki to nakono, mana ria pesomba to namala mompakaropu silaka etu.
27 Tapi to naria aga pesuku to mompakawiora rara to rapopeata, bo apu to napane mpuꞌu to mompalabu mpakaopu tau-tau to nangewa Alatala.
28 Tau to nanjapuaka Atura-atura agama to nipapola i Musa nipatesi ante daꞌa ria ampu ane naria tolumbaꞌa sabi nompakanoto kasalana. b
29 Tapi neliu nggatomo mpuꞌu pesuku to masipato rapawela ka tau to nombalonggo-longgo Ana nu Alatala. Tau etu nompekiri lei i Pue Yesus daꞌa ria gunana, tanu lei etu mboto nantapasi silakana nantuki pojanji Alatala. Pade tau etu nanjalai Nosa Nagasa to nanggeni towe belo nu Alatala ka todeana.
30 Ninjanitamo isema to nanguli iweꞌi: “Akumo to mombabalasi. Aku mombasuku ira.” Pade niulina woꞌu, “Pue kana mombatangara todeana.” c
31 Natantumo nawiora mpuꞌu rara ntau to nawela pesuku nggari jaꞌi Alatala to Natuwuna!
Kita kana maroo momparasaya
32 Tapi sampesuwu-sampesuwu, toramo katuwumu tempo bopia. Tempo komi lako nantarima reme nggari jaꞌi Pue nadea kasusa bo kapari to nirasai komi, tapi komi batena naroo nomparasaya.
33 Sanggani-sanggani komi nisalai bo nipakajaꞌa ntau ri ngayo ntodea. Pade sanggani-sanggani komi nosimporoa ante tau-tau to nipowia ntau iwetu.
34 Komi woꞌu naasi mata nomporoa bo nantulungi tau-tau to nitarunggu, pade tempo mbara-mbara komi nikaliaka ntau komi batena nadamba-damba, sabana ninjani komi naria kakalumana komi to neliu nggabelo ri suruga to naroo sampe ri kasae-saena.
35 Jadi sampesuwu-sampesuwu, neꞌe komi maeka momparasaya, sabana ane komi maroo momparasaya, mabete mpuꞌu tambo komi banepia.
36 Komi kana maroo rara ala komi mamala mompowia dota Alatala pade naopu etu mantarima nuapa to nijanjina.
37 Sabana riara Buku Nagasa naria nitulisi iweꞌi:
“Damo sampalai Iꞌa to marata etu kana masalisa marata.
Iꞌa daꞌa mombasoro-soro karatana.
38 Pade todeaku to najadi nanoa riara mpanggitaku ante nomparasaya,
iramo to matuwu mabelo sampe ri kasae-saena.
Tapi ane ira mokanggaura,
ira mana rakonoa raraku.” (Hab. 2:3-4)
39 Tapi sampesuwu-sampesuwuku, kita eꞌi daꞌa tau-tau to nokanggaura pade rasuku sampe ri kasae-saena. Tapi kita tau-tau to nomparasaya Alatala pade mombarata katuwua mabelo sampe ri kasae-saena.