Tesa ewa Tenda Mpepue bo pesomba ka Alatala
9
Riara pojanji Alatala nggasae naria atura-atura to nompakatantu akala mepue ka Alatala, pade naria woꞌu petoꞌo mpepue to nipowia manusia.
2 Saongu tenda nipataka, riarana naria rontombi. Ri tombi sawalikuna naria petoꞌo mpoindo bo meja ante roti to nipesomba ka Alatala. Tombi etu niuli Petoꞌo to Nagasa. a
3 Pade riara kae powombo karobalana naria tombi to niuli Petoꞌo to Neliu Nggagasa. b
4 Ri tombi etu naria meja mpotunju wongi to nipowia nggari bulawa bo naria woꞌu Peti Pojanji to nilapi pura ante bulawa. Riara Peti etu naria kura nikawia nggari bulawa pomboli panggoni “manna,” bo lembau i Harun to nosulu, bo rongu watu to nabemba nitulisi parenta-parenta Alatala. c
5 Pade ri bunggu nu Peti Pojanji etu naria to nipowia mpolenje rombaꞌa malaeka to niuli Kerub to nombagambara karia nu Alatala ri setu. Kapi ira nompakaulu tutu nu Peti etu to niuli petoꞌo pantolo silaka. Tapi etu pura-pura daꞌa namala ratesa mpakanoto weꞌi-weꞌi. d
6 Iwetumo akala nompakasadia tombi riara Tenda Mpepue. Eo-eo topanggeni-topanggeni agama nesua ri tombi sawalikuna ala mantui bago ira. e
7 Tapi aga Balengga Topanggeni Agama njambaꞌana to namala mesua ri tombi karontombina to niuli Petoꞌo to Neliu Nggagasa, pade etu aga sanggani sampae. Tempo mesua iꞌa kana manggeni lei to rapesombana mombasompo silakana mboto bo silaka to nipowia todea ante daꞌa nitunggai. f
8 Nggari atura etu Nosa Nagasa nu Alatala nompakanoto ka kita iweꞌi: ane danaria Tenda Mpepue pamulana etu, batuana daꞌapa nibuka jala mesua sampe ri ngayo Alatala ri Petoꞌo to Neliu Nggagasa.
9 Etu nombagambara tempo weꞌi-weꞌi. Pewai-pewai bo pesomba-pesomba to nipesomba ntau nantuki atura-atura pojanji nggasae daꞌa namala mompakagasa rara ntaꞌi topesomba etu sampe ira masipato mesua mantingayo Alatala.
10 Pura-pura etu aga nosinggawela ante panggoni, panginu bo mpengele-ngele ada mompegasa koro. Etu atura-atura to nosinggawela ante korota, daꞌa rara ntaꞌita, pade aga nalaku sampe marata tempona Alatala mompowia pojanji nabou.
Akala mepue ka Alatala to nikeni Kristus neliu nggabelo nggari akala to nipakatantu riara pojanji nggasae
11-12 Tapi Kristus narata ewa Balengga Topanggeni Agama to nanggeni kabelona to nirasaita mamimo. Iꞌa noliu riara Tenda Mpepue to neliu nggabete bo neliu nggabelo nggari tenda mpepue ri dunia eꞌi, pade nesua ri Petoꞌo to Neliu Nggagasa ri suruga. Tenda Mpepue etu daꞌa nipowia mpale manusia, etu daꞌa nopuꞌu nggari dunia eꞌi. Tempo Kristus nesua ri setu sanggani lau sampe ri kasae-saena, Iꞌa daꞌa nanggeni lei ntowau tuamana atau lei ana japi ewa pesombana, tapi Iꞌa nanggeni leina mboto. Ante iwetu Iꞌa nanggabasaka kita nggari silakata sampe ri kasae-saena.
13 Nantuki pojanji nggasae lei nggari towau bo japi pomawa pade sowu nggari ana japi to nipalabu ewa pesomba ka Alatala nikamburoi ka tau to najadi natantoru ala ira majadi magasa. g Jadi ane lei bo sowu etu namala mompakagasa koro ntau to natantoru iwetu,
14 natantumo neliu nggamonjo lei Kristus! Sabana ante petulungi Nosa Nagasa to naria sampe ri kasae-saena, Kristus nombawai korona mboto ka Alatala ewa pesomba to daꞌa ria kakurana. Leina nompakagasa rara ntaꞌita nggari powia to daꞌa ria gunana ala kita mamala mepue ka Alatala to Natuwuna.
15 Etu sampe Kristus najadi tau ntongo to nombaurusi pojanji Alatala to nabou, ala tau-tau to nipokio Alatala mamala mantarima rasi-rasi to nijanjina sampe ri kasae-saena. Etu pura-pura majadi sabana Kristus namate ala manggabasaka ira nggari sala-sala to nipowia ira tempo pojanji nggasae danalaku.
16 Ane maria sura pojanji mombabagi kakalumana, kana manoto topowia sura etu namatemo daꞌapa kakalumana rabagi.
17 Sabana sura etu daꞌapa namala ratuki ane danatuwu topowia sura. Etu aga nalaku ane namatemo topowiana.
18 Iwetu woꞌu pojanji Alatala pamulana daꞌapa nalaku ane daꞌapa nipatiti nu lei binata to nisambale.
19 Pamulana, i Musa nompatolele ka todea to Yahudi pura-pura parenta to naria riara Atura-atura agama. Naopu etu nialana lei ana japi bo towau tuamana to nisambale pade nigalona ante ue. Naopu etu nikamburoina ri Buku Parenta-Parenta bo todea ante raꞌa-raꞌa kawoko hisop to nipoꞌu ante lui wulu bimba to nalei.
20 Niulina ka ira, “Eꞌimo lei to nompakaasa pojanji to nipakatantu Alatala ka komi.” h
21 Pade iwetu woꞌu i Musa nanggamburoi ante lei Tenda Mpepue bo pura-pura parewa to rapake mepue ka Alatala. i
22 Kakonona, nantuki Atura-atura agama to nipapola i Musa ntora pura-pura to naria nipakagasa ante lei. Pade ane daꞌa ria katiti nu lei silaka daꞌa namala raampungi. j
23 Jadi Tenda Mpepue bo pura-pura parewana etu to nombagambara nuapa to naria ri suruga kana nipakagasa iwetu. Tapi to naria ri suruga etu paraluu nipakagasa ante pesomba to neliu nggabelo.
24 Sabana Kristus daꞌa nesua ri Petoꞌo Nagasa to nipowia mpale manusia to nombagambara Petoꞌo Nagasa to nakonona ri suruga. Tapi Iꞌa nesua ri suruga pade ri setu Iꞌa batena mantingayo Alatala ala mantulungi kita.
25 Butu-butu mpae Balengga Topanggeni Agama Yahudi nesua ri Petoꞌo to Neliu Nggagasa ante nanggeni lei nggari saongu binata. Tapi Kristus daꞌa nesua mpanggani-nggani iwetu manggeni korona mboto ewa pesomba.
26 Sabana ane iwetu batuana Iꞌa kana mombarasai kasusa bo kapari mpanggani-nggani nompamula nggari lamba pamulana. Tapi kakonona, ri tempo eꞌi to namosu kaopu nu dunia Iꞌa narata sanggani lau ala mompakaropu silakata ante nombawai korona mboto rapatesi.
27 Alatala nompakatantu manusia mamate aga sanggani lau, pade naopu etu ira ratangara.
28 Jadi iwetu woꞌu Kristus namate aga sanggani lau ewa pesomba mompakaropu silaka ntodea. Naopu etu Iꞌa kana marata sangganipa, daꞌa ala mompakaropu silaka, tapi ala mompakasalama tau-tau to nalentora mompopea karatana.