PUE YESUS BALENGGA TOPANGGENI AGAMA TO NOMBAURUSI POJANJI ALATALA TO NABOUNA (8:1-10:18)
Pojanji Alatala nggasae nisambei pojanjina nabou
8
Patuju to napokona riara tesaku etu iweꞌi: Naria mamimo Balengga Topanggeni Agama ewa etu ri jaꞌita. Iꞌa nekatoko ri petoꞌo to nibila ri panggana nu Alatala to Neliu Nggakuasa ri suruga.
2 Iꞌa nantui bago ewa Balengga Topanggeni Agama ri Petoꞌo to Neliu Nggagasa, etumo ri Tenda Mpepue to nakonona ri suruga to nipowia Alatala daꞌa manusia.
3 Butu mbaꞌa Balengga Topanggeni Agama nionggotaka ala manggeni pewai bo pesomba ka Alatala. Jadi Yesus woꞌu kana manggeni pesomba ka Alatala.
4 Ane rapana Iꞌa ri dunia eꞌi, Iꞌa daꞌa ntoto majadi topanggeni agama, sabana nariamo topanggeni agama to nanggeni pesomba ka Alatala nantuki Atura-atura agama to nipapola i Musa.
5 Bago to nipowia ira kakonona aga gambara bo wayo nggari akala mepue ka Alatala ri suruga. Etu sampe tempo nabi i Musa nggaolu nasadia nompowia Tenda Mpepue ri karawa baina, Alatala nompopatora ka iꞌa iweꞌi: “Toramo! Iko kana mompowia pura-pura etu nantuki jonjo to nipopokita ka iko ri bunggu nu buluna.” a
6 Tapi Yesus nombarata bago ewa topanggeni agama to neliu nggabelo nggari bago topanggeni agama ri dunia eꞌi to nantuki pojanji nggasae. Pade iwetu woꞌu pojanji nabou to niurusina ri olo Alatala bo manusia neliu nggabelo nggari pojanji nggasae, sabana pojanji nabou nikawia nantuki janji-janji to neliu nggabelo.
7 Ane rapana pojanji pamulana etu daꞌa ria kakurana, tantu etu daꞌa paraluu rasambei ante pojanji karongelena.
8 Tapi Alatala mboto nanggita todea to Yahudi daꞌa nompakule nantuki pojanji nggasae. Etu sampe niulina iweꞌi:
“Toramo! Kana marata tempo banepia
Aku mompowia pojanji nabou
ante todea Israel bo Yehuda.
9 Pojanji etu daꞌa masimbayu ewa pojanji nggasae
to nipowiaku ante totuꞌa ira nggaolu
tempo Aku nombanini ira nesuwu nggari tana Masir.
Ira daꞌa naroo nantuki pojanji etu.
Jadi etu sampe Aku mana nompeili ira.
10 Tapi iweꞌimo pojanji to kupowia ante todea Israel
ri tempo marata etu:
Aku kana mombaboli Atura-aturaku riara pekiri ira,
bo mantulisi etu riara ntaꞌi ira.
Aku majadi Alatala ira
pade ira majadi todeaku.
11 Pade ira mana paraluu mompatuduki roa-roa
bo sampesuwu-sampesuwu ira mosinjani ante Alatala,
sabana ira pura-pura, nabeloka totuꞌa, nabeloka ngana,
kana mosinjani ante Aku.
12 Aku kana mombaampungi sala ira,
pade silaka-silaka ira mana kutora.”
Iwetumo panguli i Pue. (Yer. 31:31-34)
13 Ante notesa ewa pojanji to nabou, Alatala nompakanoto pojanji nggasae mana nalaku. Pade nuapa to natuꞌa bo mana nalaku natantumo mana masaeka malipo.