Melkisedek neliu nggalanga nggari topanggeni agama muli Lewi
7
Melkisedek eꞌi Magau ngata Salem bo topanggeni agama nu Alatala to Neliu Nggalanga. Tempo Abraham nanjili nggari posibali nombadagi magau-magau, i Melkisedek nalau nosirata ka Abraham pade nombagane iꞌa.
2 Naopu etu Abraham nombabagi ka i Melkisedek sabagia nggari sampulu bagia mbara-mbara to niagona nggari jaꞌi magau-magau. a
Sanga Melkisedek etu, batuana “Magau to Nanoana,” pade iꞌa woꞌu Magau ngata Salem to naria batuana “Magau to Nanggeni Posinggabelo.”
3 Melkisedek daꞌa ria uma indona atau totuꞌana nggaolu. Katuwuna daꞌa ria pamulana atau kaopuna. Iꞌa nasimbayu ewa Ana nu Alatala, pade iꞌa batena topanggeni agama sampe ri kasae-saena.
4 Jadi pekirimo kabete i Melkisedek eꞌi. Abraham, uma ntotuꞌata nggaolu nombawai ka iꞌa sabagia nggari sampulu bagia nggari mbara-mbara to niagona nggari jaꞌi magau-magau to nidagina.
5 Nantuki Atura-atura agama to nipapola i Musa muli i Lewi to najadi topanggeni agamamo to masipato mombarata sabagia nggari sampulu bagia nggari pombarata nu todea to Yahudi. Naupa ira pura-pura muli Abraham, nantuki Atura-atura agama aga topanggeni agamamo to masipato mangala etu nggari jaꞌi sampesuwu-sampesuwu ira to Yahudi. b
6 Tapi naupa i Melkisedek daꞌa muli i Lewi iꞌa nombarata sabagia nggari sampulu bagia nggari mbara-mbara to niago Abraham nggari jaꞌi magau-magau etu, pade iꞌa nombagane Abraham, tau to niwai ka pojanji nu Alatala.
7 Ninjanita pura-pura tau to nigane neliu nggaede nggari tau to nombagane iꞌa.
8 Ane topanggeni-topanggeni agama Yahudi to nantarima sabagia nggari sampulu bagia, ira manusia biasa to namate. Tapi nantuki Buku Nagasa i Melkisedek, to niwai Abraham ka sabagia nggari sampulu bagia, daꞌa namate tapi batena natuwu.
9 Lewi totuꞌa nu pura-pura topanggeni agama to masipato mantarima sabagia nggari sampulu bagia nggari todea to Yahudi. Tapi naupa iꞌa daꞌapa nesuwu tempo Abraham nombawai sabagia nggari sampulu bagia ka i Melkisedek, namala rauli ewa i Lewi mboto woꞌu nombawai sabagia nggari sampulu bagia tempo etu.
10 Sabana iꞌa nariamo riara koro totuꞌana Abraham tempo i Melkisedek nosirata ka Abraham.
Pue Yesus Balengga Topanggeni Agama sampe ri kasae-saena
11 Ante pekeniaka topanggeni-topanggeni agama muli i Lewi Atura-atura agama niwai ka todea to Yahudi. Tapi ira daꞌa namala nanggeni manusia majadi tau daꞌa ria salana riara mpanggita Alatala. Jadi etu sampe paraluu raonggotaka Balengga Topanggeni Agama ntanina to nasimbayu ewa i Melkisedek, daꞌa ewa i Harun muli i Lewi etu to najadi Balengga Topanggeni Agama Yahudi pamulana.
12 Jadi ane topanggeni-topanggeni agama nisambei, natantumo batuana atura-atura to nipajala ira woꞌu kana rasambei.
13-14 Balengga Topanggeni Agama to nipatuju ri tesa paneꞌa i Pue Yesus. Ninjanita pura-pura Iꞌa daꞌa muli i Lewi tapi Iꞌa muli Yehuda. Pade daꞌa ria muli Yehuda to najadi topanggeni agama. Daꞌa ria sanggani i Musa nanguli muli-muli Yehuda majadi topanggeni agama.
15 Nuapa to niuli kami ri baꞌana neliu ngganoto sabana weꞌi-weꞌi nariamo Balengga Topanggeni Agama ntanina to nasimbayu ewa i Melkisedek.
16 Iꞌa nionggotaka najadi topanggeni agama daꞌa nantuki atura-atura nggasae to nompakatantu muli isema to masipato majadi topanggeni agama. Tapi Iꞌa nionggotaka nantuki katuwuna to nakuasa to daꞌa ria kaopu-opuna.
17 Sabana riara Buku Nagasa naria tesa to nanguli iweꞌi:
“Iko topanggeni agama sampe ri kasae-saena
nasimbayu ewa i Melkisedek.” (Mzm. 110:4)
18 Jadi weꞌi-weꞌi Atura-atura agama nggasae nisambei Alatala sabana daꞌa ria kuasana bo daꞌa ria gunana.
19 Sabana Atura-atura agama daꞌa ntoto namala manggeni kita majadi tau daꞌa ria salana riara mpanggita Alatala. Tapi weꞌi-weꞌi nariamo sangele jala to neliu nggabelo to nisarumakata. Ante manjarumaka jala etu kita mamala mompakamosu Alatala.
20 Daꞌa aga etu, tapi tempo Yesus nionggotaka najadi Balengga Topanggeni Agama etu nipowia Alatala ante nojanji. Tempo ira muli i Lewi nionggotaka najadi topanggeni agama, Alatala daꞌa nojanji.
21 Tapi tempo Yesus nionggotakana Iꞌa nojanji. Niulina ka Yesus iweꞌi:
“Aku nojanji
pade daꞌa ntoto mabali pekiriku,
Iko topanggeni agama sampe ri kasae-saena.” (Mzm. 110:4)
22 Ante iwetu nanotomo Yesus najadi panjokota to nompakatantu pojanji Alatala nabou to neliu nggabelo kana madupa.
23 Pade naria sangelepa. Muli i Lewi to najadi topanggeni agama kana madea, sabana ira kana mamate sambaꞌa bo sambaꞌa sampe daꞌa namala mompapola bago ira.
24 Tapi Yesus batena natuwu. Etu sampe Iꞌa batena nobago ewa topanggeni agama. Bagona daꞌa nolinja ka tau ntanina.
25 Jadi etu sampe Iꞌa namala mompakasalama sampe ri kasae-saena tau to nompakamosu Alatala ante momparasaya Iꞌa, sabana Yesus batena naroo nanjaliku ira ri ngayo Alatala.
26 Jadi Yesus Balengga Topanggeni Agama to masipato ka kita. Iꞌa nagasa, daꞌa ntoto ria salana atau silakana. Iꞌa natepatani nggari jaꞌi tau-tau nasilaka pade neore sampe ri petoꞌo to neliu nggalanga ri suruga.
27 Iꞌa daꞌa nasimbayu ewa Balengga Topanggeni Agama ntanina. Ira eo-eo kana manggeni pesomba mombasompo silaka ira mboto ruru, pade ira mamala manggeni pesomba mombasompo silaka ntodea. Tapi Yesus nanggeni pesomba sanggani lau sampe ri kasae-saena tempo Iꞌa nombawai korona mboto rapatesi manjaliku manusia. c
28 Jadi nikitata, nantuki Atura-atura agama to nipapola i Musa tau to nalente bo nasilaka nionggotaka najadi Balengga Topanggeni Agama. Tapi nggapurina nantuki tesa nu Alatala to niulina ante nojanji, Anana mboto nionggotakana najadi Balengga Topanggeni Agama to daꞌa ntoto ria kakurana nuapa-nuapa sampe ri kasae-saena.