6
Jadi sampesuwu-sampesuwu, neꞌe mana kita aga mompekiri pepatuduki pamulana ewa Kristus. Tapi kamaimo kita meguru kapola nu pepatuduki Kristus sampe kita mantambai manoto riara pomparasayata. Neꞌe mana kita mombasili pepatuduki pamulana ewa majea nggari pokainggu najaꞌa to daꞌa ria gunana pade momparasaya Alatala.
2 Neꞌe mana kita mombasili pepatuduki ewa ada mpediu, atau pepatuduki ewa mombadika pale ri balengga ntau ala ira rapesua Nosa Nagasa nu Alatala. Neꞌe mana kita mombasili pepatuduki ewa tau namate matuwu bali atau pepatuduki ewa pesuku sampe ri kasae-saena.
3 Tapi kamaimo kita meguru kapola nu pepatuduki Kristus. Pade ane i Pue mompaloga, etumo to rapowiata!
Popatora: Neꞌe mokanggaura momparasaya
4 Toramo, sampesuwu-sampesuwu, daꞌa ria jala manggeni tau majea bali ane ratunggai ira mokanggaura momparasaya. Sabana bopia ira natuwu riara reme nu Alatala. Nitarima iramo rasi nggari suruga, pade ira woꞌu nipesua Nosa Nagasa nu Alatala.
5 Nirasai iramo kabelona Tesa nu Alatala pade nikita ira baraka to nabete to nasimbayu ewa baraka to manaꞌu ri dunia banepia.
6 Ane ira mokanggaura momparasaya naupa etu pura-pura nirasai ira, daꞌa ria jala manggeni ira majea bali nggari silaka ira. Sabana ante powia ira etu ewa ira mombapaku bali Ana nu Alatala ri kayu parika, pade ira manjalai Iꞌa ri ngayo ntau dea.
7 Tau ewa etu nasimbayu ka porapa eꞌi: Tana to nadea nggani nawela uja pade nombawai asele to noguna ka topokarajaa riarana, tana etu kana ragane Alatala.
8 Tapi ane tana etu aga nikatuwu nu jono bo karui, daꞌa ntoto ria gunana. Tana etu mana masaeka rajanjiaka Alatala. Pade kaopuna tana etu kana rapalabu mpakaopu.
9 Tapi sampesuwu-sampesuwu to nipotoweku, naupa kami notesa iwetu, niparasaya kami komi daꞌa noinggu iwetu. Niparasaya kami naria pokainggu to neliu nggabelo ri jaꞌi komi, etumo pokainggu to masipato ka tau to nipakasalama.
10 Alatala daꞌa nadenggo rarana, Iꞌa daꞌa manggalinga powia bo pepotowe komi to nipopokita komi ka Iꞌa ante mantulungi topomparasaya i Pue Yesus, nompamula nggari tempo bopia sampe weꞌi-weꞌi.
11 To nipodota kami ala komi sambaꞌa bo sambaꞌa batena mabati mowia etu sampe ri kaopuna ala komi mamala mantarima pura-pura nuapa to nisarumaka komi.
12 Neꞌe sampe komi masondo rara, tapi pasialamo jonjo ntau to nomparasaya ante nosabara sampe ira nombarata nuapa to nijanji Alatala.
Nuapa to nijanji Alatala natantumo kana madupa
13 Tempo Alatala nombawai pojanji ka Abraham, Iꞌa nojanji ante nanguli sangana mboto, sabana daꞌa ria to neliu nggalanga nggari Iꞌa.
14 Niulina, “Natantumo Aku kana mombagane iko, bo mompakadea mulimu.” a
15 Jadi sangga Abraham nompopea ante nosabara, nitarimanamo nuapa to nijanji Alatala ka iꞌa.
16 Ane manusia nojanji ira nanguli sanga to neliu nggalanga nggari koro ira mboto, pade etu nompakaroso tesa ira bo nompopenonto pura-pura tesa ntau to nombasapuaka tesa etu.
17 Iwetu woꞌu ante Alatala. Iꞌa madota mompopokita ka tau to masipato mantarima nuapa to nijanjina, pojanjina etu natantumo, daꞌa ntoto mabali. Jadi nipakarosona pojanjina ante nojanji.
18 Rongele etu daꞌa namala mabali. Alatala daꞌa ntoto nodawa ewa pojanjina etu to nipowiana ante nojanji. Patujuna nojanji iwetu ala kita to nekalendu ri jaꞌina mamala rapakaroso rara sampe kita maroo manjarumaka nuapa to nijanjina etu.
19 Panjarumakata to natantuna etu nasimbayu ewa balango sakaya to naroso bo naroo. Pade nggari panjarumakata etu kita mamala mompakamosu Alatala nasimbayu ewa Balengga Topanggeni Agama namala mombaliunaka kae powombo mesua riara Petoꞌo to Neliu Nggagasa riara Sapo Mpepue. Daꞌa nabali panjarumakata sabana to nisarumakata Alatala mboto. Iꞌa naria ri petoꞌo to neliu nggagasa ri suruga, pade
20 Yesus nokolu nesua ri setu ala mompakasadia jala ka kita. Iꞌa nionggotaka najadi Balengga Topanggeni Agama nasimbayu ewa i Melkisedek sampe ri kasae-saena.