Pue Yesus nionggotaka najadi Balengga Topanggeni Agama
5
Butu mbaꞌa Balengga Topanggeni Agama nipelisi nggari tatongo todea pade nionggotaka majadi wakele ira ri ngayo Alatala. Bagona etumo manggeni ka Alatala pewai-pewai bo pesomba-pesomba to majadi posompo silaka.
2 Iꞌa namala nantulungi ante nalusu rara tau-tau to nabodo bo nasalanjalamo, sabana iꞌa mboto woꞌu manusia to nadea kalentena.
3 Etu sampe iꞌa kana manggeni pesomba ka Alatala mombasompo silaka, nabeloka silakana mboto, nabeloka silaka ntodea.
4 Daꞌa ria sambaꞌa to nangonggotaka korona mboto majadi Balengga Topanggeni Agama, tapi iꞌa kana nipokio bo nionggotaka Alatala, nasimbayu ewa i Harun nggaolu nipokio bo nionggotaka Alatala najadi Balengga Topanggeni Agama to Yahudi.
5 Iwetu woꞌu Kristus. Iꞌa daꞌa nangonggotaka korona mboto majadi Balengga Topanggeni Agama to nibila. Tapi Iꞌa nipokio bo nionggotaka Alatala mboto. Etu nanoto nggari tesa Alatala to nanguli iweꞌi:
“Ikomo Anaku,
eo eꞌi Aku najadi Umamu.” (Mzm. 2:7)
6 Pade niulina woꞌu ri ayat ntanina iweꞌi:
“Iko Topanggeni Agama sampe ri kasae-saena,
nasimbayu ewa i Melkisedek.” (Mzm. 110:4)
7 Tempo Yesus natuwu ri dunia Iꞌa nosambaya ante ue mata bo nekakai merapi tulungi ka Alatala to namala manggabasaka Iꞌa nggari kamatena. Pade posambayana niepe Alatala sabana Iꞌa tunggai nekou ri jaꞌina.
8 Naupa Yesus Ana nu Alatala, Iꞌa neguru natundu ri jaꞌi Alatala nggari kasusa bo kapari to nirasaina.
9 Sangga naganapa pura-pura etu nirasaina, Iꞌa najadi puꞌu katuwua nabelo sampe ri kasae-saena ka pura-pura tau to natundu ri jaꞌina.
10 Pade Iꞌa nionggotaka Alatala najadi Balengga Topanggeni Agama nasimbayu ewa i Melkisedek, topanggeni agama nggaolu. a
Kita kana mamaju riara pomparasayata, neꞌe aga matetaꞌa ri pepatuduki pamulana
11 Danadea to miki kutesa ka komi ewa kasimbayu Kristus ante i Melkisedek, tapi etu nakaja ratarangga sabana nakumba mpuꞌu pompaha komi.
12 Kakonona temponamo komi majadi guru mompatuduki tau ntanina, sabana nasaemo komi nomparasaya i Pue Yesus. Tapi komi danomparaluu guru mompatuduki ka komi pepatuduki pamulana nggari Tesa nu Alatala. Komi da ewa ngana nggedi, daꞌapa namala nanggoni panggoni to nakoꞌo-koꞌo. Komi danantomi!
13 Isema-sema danantomi batuana danangana. Daꞌapa ninjanina mompoposisala nuapa to nakonona bo to nasalana.
14 Tapi panggoni to nakoꞌo-koꞌo aga nikoni ntau to nabetemo, etumo tau to nabiasamo nombalati korona mompoposisala nuapa to nabelona bo to najaꞌana.