Kamaimo kita mangosaraka mpasanggani-nggani ante Alatala
4
Sampesuwu-sampesuwu, pojanji Alatala etu danalaku pade kita danamala mangosaraka mpasanggani-nggani ante Iꞌa. Etu sampe kita kana mainga ala neꞌe maria nggari tatongo komi to nireke naboli.
2 Sabana kita woꞌu nangepe Kareba Belo nu Alatala nasimbayu ewa ira totuꞌata nggaolu. Tapi kareba to niepe ira daꞌa ria gunana ka ira, sabana ira aga nangepe bayangi, daꞌa niparasaya ira kareba etu.
3 Tapi kita to nomparasayamo to namala mangosaraka mpasanggani-nggani ante Alatala, daꞌa ira. Sabana naria to niulina iweꞌi:
“Nabilisi mpuꞌu raraku sampe Aku nojanji iweꞌi:
‘Ira daꞌa ntoto mamala mangosaraka mpasanggani-nggani ante Aku.’” (Mzm. 95:11)
Ira daꞌa nombarasai kabelo nu pangosaraka Alatala naupa etu nasadiamo nggari lamba pamulana naopu Alatala nompajadi langi bo dunia.
4 Nanotomo pangosaraka etu nasadia, sabana naria tesa ri Buku Nagasa to nanguli ewa eo kapapituna iweꞌi: “Ri eo kapapituna Alatala nangosaraka nggari pura-pura bagona.” a
5 Ri tesa to naria ri baꞌana Alatala nanguli, “Ira daꞌa ntoto mamala mangosaraka mpasanggani-nggani ante Aku.”
6 Jadi nggari tesa etu nanotomo danaria loga ka tau ntanina mangosaraka mpasanggani-nggani ante Alatala. Sabana tau-tau pamulana to nangepe Kareba Belo etu daꞌa nombarasai kabelo nu pangosaraka Alatala etu, sabana ira daꞌa nomparasaya.
7 Jadi etu sampe Alatala nompakatantu loga ntanina to niulina “eo eꞌi” ala manusia mamala mangosaraka mpasanggani-nggani ante Iꞌa. Sangga naliu bara sakuya atu mpae Alatala notesa ewa etu nggari sumba i Daud riara tesa to nitulisiku ri baꞌana iweꞌi:
“Ane komi mangepe suara Alatala eo eꞌi,
neꞌe komi mompakakoꞌo rara.” (Mzm. 95:7-8)
8 Tempo nokolu Yosua nanggeni totuꞌata nesua ri tana Kanaan to nijanji Alatala. Ane rapana etu nireke nesua mangosaraka mpasanggani-nggani ante Alatala, natantumo Alatala daꞌa notesa nggapurina ewa loga ntanina mangosaraka mpasanggani-nggani ante Iꞌa.
9 Jadi danaria loga ka kita todea nu Alatala mangosaraka mpasanggani-nggani ante Iꞌa nasimbayu ewa Iꞌa nangosaraka ri eo kapapituna.
10 Nanotomo etu sabana isema-sema to nangosaraka mpasanggani-nggani ante Alatala nenontomo nggari bagona nasimbayu ewa Alatala woꞌu nenonto nggari pura-pura bagona.
11 Sabana etu kamaimo kita mompasimbuku ante mpuꞌu-mpuꞌu rarata mangosaraka mpasanggani-nggani ante Alatala. Neꞌe sampe maria nau aga sambaꞌa to daꞌa mamala mombarasai kabelona etu sabana daꞌa nomparasaya nasimbayu ewa totuꞌata nggaolu.
12 Tesa nu Alatala tesa to natuwu bo nakuasa. Tesa etu neliu nggataja nggari guma to nomata ntimali. Nasimbayu ewa guma to nataja namala mantosu sampe riara mpuꞌu, Tesa nu Alatala mesua riara ntaꞌita sampe ri pantaꞌa nosa bo wayo pade posidumpa nu wuku bo unto nu wuku. Tesa etu namala mombabuka bo momparesa pekiri bo patuju rara ntaꞌita.
13 Daꞌa ria kamba sangele to nipajadi Alatala to natetabuniaka nggari panggitana, tapi etu pura-pura natebuka bo nanoto ka Iꞌa. Pade ri ngayona banepia kita kana mompangaku pura-pura pokaingguta.
Pue Yesus Balengga Topanggeni Agama to nantulungi kita
14 Jadi kita kana maroo manjoko pomparasaya to nipangakuta, sabana naria Balengga Topanggeni Agama to nalanga katuwuna to nesua sampe ri ngayo Alatala ri suruga ala mantulungi kita, etumo Yesus, Ana nu Alatala.
15 Iꞌa Balengga Topanggeni Agama to nangginjani kalenteta, sabana Iꞌa woꞌu nombarasai pesoba-pesoba nasimbayu ewa kita. Aga Iꞌa daꞌa sanggani nidagi pesoba sampe nasilaka.
16 Sabana etu, kamaimo kita ante mabia mompakamosu Alatala to noparenta ante towe belona, ala kita mamala rapoasi matana bo mombarata towe belona mantulungi kita tempona raparaluuta.