Pue Yesus neliu nggalanga nggari nabi Musa
3
Sampesuwu-sampesuwuku, nagasamo katuwumu bo komi nipokio Alatala matuwu mabelo ri suruga. Sabana etu pekirimo mpakabelo-belo Yesus eꞌi. Iꞌa nisuro Alatala najadi Balengga Topanggeni Agama ri agama to nipangakuta.
2 Iꞌa natutu nompowia nuapa to nipakatantu Alatala ka Iꞌa nasimbayu ewa nabi i Musa natutu nantulungi todea to Yahudi to najadi ananjapo nu Alatala.
3 Tapi neliu nibilapa Yesus nggari i Musa nasimbayu ewa topowia sapo neliu nibilapa nggari sapo to nipowiana.
4 Butu-butu sapo, naria topowiana. Tapi topowia mpengele-ngele Iꞌamo Pue Alatala mboto.
5 Ane i Musa, iꞌa natutu nantulungi ananjapo nu Alatala ewa sambaꞌa batua. Iꞌa nantesa ka ira nuapa to rapatolele banepia.
6 Tapi Kristus Ana nu Alatala to natutu nombaurusi pura-pura ananjapo nu Alatala. Pade kita majadi ananjapona ane kita maroo momparasaya bo maroo manjarumaka Iꞌa ante madamba rara sampe ri kaopuna.
Popatora: Neꞌe mompasiala pokainggu to Israel ri karawa baina
7 Jadi epemo tesa nggari jaꞌi Nosa Nagasa nu Alatala to nanguli iweꞌi:
“Ane komi mangepe suara Alatala eo eꞌi,
8-9 neꞌe komi mompakakoꞌo rara
nasimbayu ewa totuꞌamu nggaolu
tempo ira nangewa Aku ri karawa baina.
Naupa ira batena nanggita kabaraka-kabaraka to nipowiaku patampulu mpae kasaena,
ira batena nompesoba bo nombauji Aku.
10 Etu sampe narau mpuꞌu raraku ri jaꞌi ira
pade Aku nanguli, ‘Ira bate-batena nasalanjalamo,
daꞌa nadota mantuki jalaku.’
11 Nabilisi mpuꞌu raraku sampe Aku nojanji iweꞌi:
‘Ira daꞌa ntoto mamala mangosaraka mpasanggani-nggani ante Aku.’” (Mzm. 95:7-11)
12 Jadi sampesuwu-sampesuwuku, komi kana mainga ala neꞌe sampe maria ri tatongo komi tau to najaꞌa pekirina bo daꞌa nomparasaya sampe iꞌa mombasapu Alatala to Natuwuna.
13 Tapi eo-eo komi kana mosipakaroso rara sambaꞌa bo sambaꞌa tempo danaria loga to niuli “eo eꞌi” riara tesa Buku Nagasa. Neꞌe sampe komi majadi makoꞌo rara sabana nibagiu nu silaka.
14 Ane kita batena momparasaya Alatala ante maroo rara sampe ri kaopuna nasimbayu ewa kita naroo nomparasaya ri pamulana, kita kana mombarata bagia nggari pura-pura nuapa to naria ri jaꞌi Kristus.
15 Etumo to nipatuju tesa to niuli ri baꞌana iweꞌi:
“Ane komi mangepe suara Alatala eo eꞌi,
neꞌe komi mompakakoꞌo raramu
nasimbayu ewa totuꞌamu nggaolu
tempo ira nangewa Aku.” (Mzm. 95:7-8)
16 Jadi isema to nangepe suara Alatala? Isema to nompakarau rarana ante nangewa Iꞌa? Etumo pura-pura to Yahudi to nikeni i Musa nesuwu nggari tana Masir.
17 Pade isema to nipokarau rara Alatala patampulu mpae kasaena? Natantumo ira etu woꞌu to nowia silaka ri karawa baina sampe namate ri setu.
18 Isema to nipatuju Alatala tempo Iꞌa nojanji ira daꞌa ntoto mamala mangosaraka mpasanggani-nggani ante Iꞌa? Natantumo ira to daꞌa natundu ri jaꞌina.
19 Jadi nanotomo ka kita ira daꞌa namala nangosaraka mpasanggani-nggani ante Alatala sabana ira daꞌa nomparasaya.