Popatora: Sokomo mpakabelo-belo pepatuduki i Pue Yesus
2
Jadi Yesus neliu nggalanga nggari malaeka-malaeka i Pue. Etu sampe kita kana manjoko mpakabelo-belo pepatuduki to niepeta ala neꞌe kita masalanjala nggari jala to nakonona etu.
2 Tesa to nipapola malaeka-malaeka i Pue ka totuꞌata nggaolu nanoto mpuꞌu kakonona, pade isema-sema daꞌa nantuki tesa etu atau daꞌa natundu riara tesa etu nombarata pesuku to nasipatona.
3 Neꞌepa rauli Kareba Belo to nipatolele i Pue Yesus! Kareba etu neliu nggabelo nggari tesa to nipapola malaeka-malaeka nggaolu. Jadi ane kita daꞌa mompariara kareba etu, iwenumo kita makabasaka nggari pesuku? Kareba etu pamulana nipatolele i Pue Yesus mboto, pade tau-tau to nangepe Iꞌa nompakanoto ka kita kareba etu mpuꞌu-mpuꞌu nakono.
4 Pade Alatala mboto nantakono tesa to nipatolele ira ante nompowia mpengele-ngele kabaraka bo tandai to nipogumaa, pade nompalele pompakule ka ira nggari Nosa Nagasana nantuki dotana mboto.
Pue Yesus najadi manusia ala Iꞌa mamala mantulungi manusia
5 Daꞌa malaeka-malaeka to nipakakuasa Alatala ala moparenta dunia nabou banepia to nitesata ri seꞌi.
6 Tapi manusia to nipakakuasana. Naria tesa riara Buku Nagasa to nompakanoto etu iweꞌi:
“O Pue Alatala, nuapa ntoto kami manusia sampe Pue nantora kami?
Naupa kami aga manusia, Pue nompiara kami.
7 Sampalai lau kami nipowia Pue naede sakedi nggari malaeka.
Kami niwai Pue ka pekatoko to nakuasa bo nibila.
8 Pade kami niwai Pue ka kuasa ala momparenta pura-pura nuapa to naria.” (Mzm. 8:5-7)
Jadi ane niuli, “Kami niwai Alatala ka kuasa ala momparenta pura-pura nuapa to naria,” etu batuana daꞌa ria sangele anu daꞌa niwaina rakuasai manusia. Tapi weꞌi-weꞌi daꞌapa nikitata manusia nomparenta pura-pura nuapa to naria.
9 Tapi to nikitata iweꞌi: Yesus sampalai nipakaede sakedi nggari malaeka ala nggari towe belo nu Alatala Iꞌa mamate manjaliku manusia. Pade weꞌi-weꞌi nikitata Iꞌa niwai ka pekatoko to nakuasa bo nibila sabana Iꞌa nasadia nasusa bo napari sampe namate.
10 Etu najadi sabana etumo to masipato ante dota nu Alatala. Iꞌamo to nompajadi mpengele-ngele, pade etu pura-pura bagiana. Iꞌa nompakamba Yesus mombarasai kasusa bo kapari sampe majadi Topanggeniaka to daꞌa ria kakurana to mompakule mompakasalama manusia. Ante iwetu Iꞌa mamala manggeni nadea tau mombarata bagia riara kuasa bo kagayana to nipogumaa.
11 Yesus nompegasa kita nggari silakata. Pade kita to nipegasa bo Iꞌa to nompegasa kita aga sambaꞌa lau Umata. Etu sampe Yesus daꞌa naeya matana nompangaku kita sampesuwuna.
12 Iꞌa nanguli ka Alatala iweꞌi:
“Aku kana mompatolele karebamu ka sampesuwu-sampesuwuku.
Aku mombatoiya sangamu ri tatongo kasiromu todeamu.” (Mzm. 22:23)
13 Pade niuli Yesus woꞌu iweꞌi:
“Aku manjarumaka Pue Alatala.” (Yes. 18:17)
Pade sangganipa niulina iweꞌi:
“Eꞌimo Aku nosanggani-nggani ante ngana-ngana to niparasaya Alatala ka Aku.” (Yes. 8:18)
14 Kita to niuli Yesus anana, manusia biasa ante koro to mamate. Jadi etu sampe Yesus woꞌu najadi manusia pade nombarasai pura-pura nuapa to nirasaita. Etu nipowiana ala nggari kamatena Iꞌa mamala mompakaropu kuasa Magau nu Seta to nombakuasai kamatea.
15 Ante jala iwetu Iꞌa nombakabasaka tau-tau to nipobatua eka rara ira mamate sanggasae-saena ira natuwu ri dunia eꞌi.
16 Nanotomo daꞌa malaeka to nitulungina, aga muli Abraham.
17 Etu sampe Iꞌa kana najadi nasimbayu pura ante sampesuwu-sampesuwuna. Ante iwetu Iꞌa namala majadi Balengga Topanggeni Agama to naasi matana manggita todeana, pade to natutu nompowia bago to niwai Alatala ka Iꞌa sampe silaka manusia mamala raampungi.
18 Iꞌa mboto nombarasai kasusa bo kapari tempo Iꞌa nipesoba. Etu sampe Iꞌa nompakule mantulungi tau-tau to nipesoba.