SURA KA TOPOMPARASAYA
TO IBRANI
PUE YESUS NELIU NGGALANGA NGGARI TOPANGGENI POJANJI ALATALA NGGASAE (1:1-7:28)
Ana nu Alatala mboto niposumba manggeni Tesa Alatala ka manusia
1
Tempo nggaolu nadea ngganimo Alatala nompasimbayu tesana ka nabi-nabi to nompapola etu ka totuꞌata nggaolu ante mpengele-ngele akala.
2 Tapi ri tempo namosu kaopu nu dunia eꞌi Anana mbotomo to nompasimbayu tesana ka kita. Nosanggani-nggani ante Anana etu Alatala nompajadi langi bo dunia, pade nipakatantuna ala pura-pura nuapa to nariana majadi bagia nu Anana.
3 Anana etu nompopokita kuasa bo kagaya nu Alatala, pade Iꞌa nasimbayu ntoto ewa Alatala. Iꞌamo to nombatande mpengele-ngele ri langi bo dunia ante tesana to nakuasa. Naopu Iꞌa nompegasa manusia nggari silaka, Iꞌa neore mpaka ri suruga pade nekatoko ri petoꞌo to nibila ri panggana nu Alatala to Neliu Nggakuasa.
Ana nu Alatala neliu nggalanga nggari malaeka-malaeka Alatala
4 Ana nu Alatala neliu nggalanga nggari malaeka-malaeka Alatala, pade sanga to niwai Alatala ka Iꞌa neliu nibila nggari sanga malaeka-malaeka.
5 Nanotomo kalangana etu sabana daꞌa ria sanggani Alatala notesa ka malaekana iweꞌi:
“Ikomo Anaku,
eo eꞌi Aku najadi Umamu.” (Mzm. 2:7)
Tapi etu to niulina ka Anana mboto. Pade daꞌa ria sanggani Alatala notesa ewa malaekana iweꞌi:
“Aku Umana,
pade Iꞌa Anaku.” (2Sam. 7:14)
6 Pade tempo Alatala nompakau Anana ulumbua marata ri dunia eꞌi, Iꞌa woꞌu nanguli iweꞌi:
“Pura-pura malaeka kana mombasomba Anaku etu.” (Ul. 32:43)
7 Tapi to niuli Alatala ewa malaeka-malaekana iweꞌi:
“Alatala nompajadi malaeka-malaekana ewa poiri.
Ira nasimbayu ewa apu to najela.” (Mzm. 104:4)
8 Tapi to niulina ka Anana iweꞌi:
“O Alatala, poparentamu maroo sampe ri kasae-saena,
Komi noparenta todeamu ante nanoa rara.
9 Komi nompotowe pokainggu to nanoa
bo nomporau rara pokainggu to nadenggona.
Sabana etu Aku, Alatalamu, nangonggotaka Komi majadi Magau to neliu nggalanga panggana nggari roamu
bo nombawai ka Komi kadamba nu rara to neliu-liuna.” (Mzm. 45:7-8)
10 Pade niuli Alatala woꞌu ka Anana iweꞌi:
“Pue, ri lamba pamulana Komi nompajadi dunia,
Pade langi woꞌu powia mpalemu.
11 Etu pura-pura kana maropu banepia, tapi Komi bate-batena maria.
Etu pura-pura kana maranta ewa pakea,
12 pade ratika Komi nasimbayu ewa buya.
Etu kana rasambei nasimbayu ewa baju to narantana.
Tapi Komi daꞌa ntoto mabali,
Katuwumu daꞌa ria kaopu-opuna.” (Mzm. 102:25-27)
13 Pade daꞌa ntoto ria sanggani Alatala nanguli ka malaekana ewa to niulina ka Anana iweꞌi:
“Kamai pekatokomo ri sabingga ngganaku
sampe Aku mompowia pura-pura balimu mekou ri jaꞌimu.” (Mzm. 110:1)
14 Jadi ane iwetu, nuapa kakonona malaeka-malaeka i Pue? Ira pura-pura topantulungi Alatala to nisurona mantulungi tau-tau to rapakasalamana.