SURA KA TOPOMPARASAYA
TO IBRANI
Tesa nompakanoto isi sura
Sura eꞌi nitulisi ka tau-tau to Yahudi to nomparasaya i Pue Yesus. Ira nabiasa woꞌu niuli to Ibrani. Ira mpuꞌu-mpuꞌu nipandasa ntau sabana nomparasaya i Pue Yesus sampe naria ira to nasadia mokanggaura momparasaya pade mesua bali agama Yahudi. Jadi topotulisi sura eꞌi nantulisi ka ira ala mompakaroso pomparasaya ira ala neꞌe ira mokanggaura momparasaya i Pue Yesus.
Topotulisi sura eꞌi daꞌa ninjanita sangana. Naria tau nompekiri Apolos topotulisi sura eꞌi, pade naria tau ntanina nompekiri i Barnabas to nantulisina. Tapi daꞌa ninjanita ante nanoto isema kakonona topotulisina.
Akala topotulisi mompakaroso pomparasaya tau-tau to Yahudi to nomparasaya i Pue Yesus iweꞌi: Iꞌa nompakanoto ka ira neliu nggabelo pojanji nabou to niwai Alatala ante karata i Pue Yesus ri dunia pade pojanji nggasae to nituki agama Yahudi. Iꞌa woꞌu nompopatora ka ira ala neꞌe mokanggaura momparasaya sampe mawela pesuku to masipato ante powia to najaꞌa iwetu.
Riara surana eꞌi iꞌa nompakanoto Yesus Ana nu Alatala to neliu nggalanga nggari nabi-nabi nggaolu, malaeka-malaeka i Pue, nabi i Musa bo topanggeni agama Yahudi nggaolu. Pue Yesusmo to neliu nggalanga nggari pura-pura nuapa to naria ri langi bo dunia. Pade Iꞌa nionggotaka najadi Balengga Topanggeni Agama to neliu nggabelo nggari pura-pura topanggeni agama Yahudi. Iꞌamo to nanggeni pesomba mombasompo silaka to namala nompakaropu silaka manusia, etumo korona mboto.
Topotulisi sura woꞌu nompakanoto topomparasaya masipato maroo momparasaya ala mompakadamba rara Alatala. Iꞌa nantesa jonjo-jonjo pomparasaya totuꞌa nto Yahudi nggaolu ala mompakaroso pomparasaya tau-tau nipakatu ka sura eꞌi. Pade iꞌa woꞌu nompakanoto pokainggu to masipato ka tau-tau nipakasalama i Pue Yesus.
Isi sura to napokona iweꞌi:
1. BAGIA PAMULANA: Pue Yesus neliu nggalanga nggari topanggeni pojanji Alatala nggasae (1:1-7:28)
Ana nu Alatala mboto niposumba manggeni Tesa Alatala ka manusia (1:1-3)
Pue Yesus neliu nggalanga nggari malaeka-malaeka Alatala (1:4-2:18)
Pue Yesus neliu nggalanga nggari i Musa bo Yosua (3:1-4:13)
Pue Yesus Balengga Topanggeni Agamata sampe ri kasae-saena (4:14-7:28)
2. BAGIA KARONGUNA: Pue Yesus Balengga Topanggeni Agama to nombaurusi pojanji Alatala to nabou (8:1-10:18)
Pojanji Alatala nggasae nisambei pojanjina nabou to neliu nggabelo (8:1-9:10)
Bago i Pue Yesus ewa Balengga Topanggeni Agama neliu nggabelo nggari bago topanggeni agama Yahudi nggaolu (9:11-10:18)
3. BAGIA KATOLUONGUNA: Pokainggu to masipato ka tau to nipakasalama i Pue Yesus (10:19-13:25)
Kita kana maroo momparasaya, neꞌe mokanggaura (10:19-39)
Jonjo-jonjo tau to nomparasaya sampe nikonoa rara Alatala (11:1-40)
Kita kana maroo momparasaya tempo nipandasa, bo neꞌe mompoara kabelo nu pojanji Alatala to nabou (12:1-29)
Pokainggu to mompakadamba Alatala bo tesa kaopuna (13:1-25)