SURA PAULUS KA
FILEMON
Petabe
1
Sura eꞌi nggari jaꞌiku i Paulus to nitarunggu sabana nomparasaya Yesus Kristus, bo nggari jaꞌi sampesuwuta i Timotius, ka i Filemon roa kami sampokarajaa to nipotowe kami,
2 pade ka topomparasaya-topomparasaya i Pue Yesus to nodade ri sapomu, pade ka Apfia sampesuwuta besi, bo Arkhipus, roata sampokarajaa.
3 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.
Paulus nosukuru ka Alatala sabana pomparasaya bo pepotowe Filemon
4 Butu nggani aku nanggeni komi riara posambaya aku nosukuru ri jaꞌi Pue Alatalaku,
5 sabana niepeku komi nomparasaya i Pue Yesus pade nompotowe pura-pura topomparasaya.
6 Aku nosambaya ala kasintuwu komi topomparasaya manggeni komi mantambai mangginjani mpengele-ngele rasi to naria ri jaꞌita sabana nosaongu rara ante Kristus.
Paulus nerapi ala Filemon mantarima Onesimus bali ante mabelo
7 Sampesuwuku, towemu ri jaꞌi ntopomparasaya i Pue Yesus mpuꞌu-mpuꞌu nompakadamba pade nompakaroso raraku, sabana komi mpuꞌu-mpuꞌu nompakasana rara todea topomparasaya.
8 Etu sampe naria pomperapiku ri jaꞌimu. Kakonona aku namala momparenta komi mowia to masipatona sabana aku suro Kristus.
9 Tapi nantora towemu etu agina aku merapi ala etu rapowia komi. Aku eꞌi, i Paulus sambaꞌa totuꞌa to nitarunggu weꞌi-weꞌi sabana nomparasaya Yesus Kristus.
10 Jadi naria pomperapiku ka komi to nosinggawela ante Onesimus. Iꞌa najadi ewa anaku mboto sabana aku nanggeni iꞌa nomparasaya i Pue Yesus tempo aku riara tarunggu ri seꞌi.
11 Tempo bopia iꞌa daꞌa noguna ka komi, tapi weꞌi-weꞌi iꞌa mpuꞌu-mpuꞌu nogunamo ka komi bo ka aku woꞌu. a
12 Weꞌi-weꞌi Onesimus to nipotoweku etu kupakau manjili bali mpaka ri jaꞌimu.
13 Kakonona aku madota mantaꞌamaka iꞌa ri jaꞌiku ri seꞌi ala iꞌa mamala manjaliku komi mantulungi aku to nitarunggu sabana nompatolele Kareba Belo.
14 Tapi aku daꞌa madota mowia iwetu ane daꞌapa nikasituju komi. To nipodotaku ala to nabelona etu neꞌe mupowia sabana nipasuꞌu tapi nggari dota raramu mboto.
15 Nipekiriku bara Onesimus nipopogaꞌa nggari jaꞌimu sampalai ala komi mamala mantarima iꞌa bali sampe ri kasae-saena.
16 Weꞌi-weꞌi iꞌa daꞌa mana aga sambaꞌa batua, tapi neliu nggari etu iꞌa sambaꞌa topomparasaya to nipotowe. Iꞌa nipotoweku, pade natantumo iꞌa woꞌu nipotowemu, nabeloka ewa sambaꞌa batuamu, nabeloka ewa sampesuwumu riara i Pue.
17 Jadi ane aku nireke roamu topomparasaya, kuperapi tarimamo Onesimus bali nasimbayu ewa komi nantarima aku.
18 Pade ane iꞌa nompakarugi komi atau noinda ri jaꞌimu damo aku mombatangguna.
19 Aku, Paulus, nantulisi tesa eꞌi ante paleku mboto. Aku kana mombabayari etu pura-pura ka komi. Kakonona daꞌa paraluu aku mompopatora ka komi iwenu komi mboto noinda ri jaꞌiku, sabana nggari aku sampe komi nombarata katuwua nabelo ewa topomparasaya i Pue Yesus.
20 Jadi sampesuwuku, kuperapi ala komi mowia to noguna ka aku, sampesuwumu riara i Pue. Pakasanamo raraku ewa sampesuwumu riara Kristus ante mantarima Onesimus bali.
21 Aku nantulisi sura eꞌi ka komi ante nomparasaya komi kana mowia nuapa to niperapiku etu. Pade daꞌa aga etu, ninjaniku komi kana mowia meliu nggari pomperapiku etu.
22 Pade nariapa sangele pomperapiku iweꞌi: Tulungi pakasadia ka aku petoꞌo kupoturu ri sapomu, sabana nisarumakaku nggari posambaya komi pura-pura aku kana rakabasaka nggariara tarunggu eꞌi sampe mamala manjili ri jaꞌi komi.
Petabe kaopuna
23 Tabe nggari jaꞌi Epafras to nosanggani-nggani ante aku riara tarunggu sabana iꞌa nomparasaya Yesus Kristus.
24 Tarima woꞌu tabe nggari jaꞌi roa-roaku sampokarajaa, etumo i Markus, Aristarkhus, i Demas bo i Lukas.
25 Perapi towe belo nggari jaꞌi Pue Yesus Kristus mosanggani-nggani ante komi pura-pura.
Tabe nggari jaꞌiku,
Paulus