SURA PAMULANA NGGARI JAꞌI
PETRUS
Tesa nompakanoto isi sura
Topotulisi sura eꞌi i Petrus, sambaꞌa nggari sampulu rombaꞌa anaguru i Pue Yesus. Petrus nompakatu surana eꞌi ka topomparasaya i Pue Yesus to netoꞌo ri Bagia Asia Nggedi. Ri tempo etu ira nipandasa ntau sabana ira nomparasaya i Pue Yesus. Naria to nipakajaꞌa ntau (2:11-12; 2:25; 3:16; 4:4). Pade naria batua to nipandasa madika ira (2:18-20).
Etu sampe i Petrus nantulisi sura eꞌi ka ira ala mompakaroso pomparasaya ira sampe ira mamala maroo tempo nipandasa. Petrus nanguli nggari kasusa bo kapari to nirasai ira, karoso nu pomparasaya ira rakita (1:6-7; 4:12). Niulina woꞌu ane kita rapandasa sabana nomparasaya i Pue Yesus kita kana mekou ri jaꞌi Alatala bo tunggai mompowia pokainggu to nabelona (4:19). Pade mpengele-ngele pepatuduki i Petrus ntanina nitulisina ala mompakaroso rara ira manjarumaka Alatala, pade mompowia to nabelona bo maroo momparasaya tempo nipandasa.
Isi sura to napokona iweꞌi:
1.Petabe (1:1-2)
2. Alatala kana ratoiya sabana Iꞌa nombawai ka kita panjarumaka to naroso (1:3-12)
3. Pepatuduki ala moinggu mabelo sabana kita ana-ana nu Alatala (1:13-2:10)
4. Pepatuduki ala moinggu mabelo riara dunia to najaꞌa eꞌi (2:11-4:19)
Pepatuduki ala mekou ri jaꞌi pomarenta; pepatuduki ka batua, ka totuꞌa besi bo totuꞌa langgai; bo pepatuduki ka pura-pura topomparasaya (2:11-3:12)
Pepatuduki ala maroo tempo nipandasa (3:13-4:6)
Pepatuduki ka pura-pura topomparasaya ala matuwu mosaongu rara bo mositulungi sambaꞌa bo sambaꞌa (4:7-11)
Pepatuduki ka tau to nipandasa sabana nomparasaya i Pue Yesus (4:12-19)
5. Pepatuduki ka topanggeniaka topomparasaya bo ka todea biasa (5:1-11)
6. Petabe kaopuna (5:12-14)