SURA PAMULANA NGGARI JAꞌI
PETRUS
Petabe
1
Sura eꞌi nggari jaꞌiku i Petrus, suro Yesus Kristus, ka komi to nipelisi najadi todea nu Alatala to netoꞌo nombasowo tau ntanina nosimpotatare ri umba-umba ri Propinsi Pontus, Galatia, Kapadokia, Asia bo Bitinia.
2 Komi nipelisi Umata Alatala nantuki niana mboto nggari lamba pamulana. Pade nggari pokarajaa Nosa Nagasa nu Alatala komi nipajadi todeana sampe komi natundu ri jaꞌi Yesus Kristus bo nipakagasa nggari leina mboto.
Perapi towe belo Alatala bo katuwua mabelo mantambai kadeana ri jaꞌi komi.
Topomparasaya naria panjarumaka to naroso
3 Ratoiyata Alatala, Uma nu Pueta Yesus Kristus! Nggari kabete nu asi matana Iꞌa nombawai ka kita katuwua to nabou ante nompakatuwu bali Yesus Kristus nggari kamatena. Jadi weꞌi-weꞌi nariamo panjarumakata to naroso.
4 Kita nanjarumaka mombarata rasi-rasi to nipakasadia Alatala ka pura-pura anana, etumo rasi-rasi to nibolina ri suruga ka kita. Rasi-rasi etu daꞌa namala maropu, daꞌa namala magero, daꞌa namala mabali.
5 Sampesuwu-sampesuwu, komi masipato mantarima rasi-rasi etu, sabana komi nomparasaya Alatala. Pade komi batena nijagaina ante kuasana ala komi mamala mantarima kabelona to nasadia rawai ka komi ri kaopu nu dunia.
6 Sabana etu komi kana madamba-damba naupa weꞌi-weꞌi komi nombarasai kasusa sampalai ante nawela mpengele-ngele pesoba.
7 Patuju nu pesoba-pesoba etu ala mombauji pomparasaya komi ala manggita kaliongu nu pomparasaya komi etu. Bulawa niuji ante apu ala manggita ane maria galona bara daꞌa. Tapi pomparasayamu neliu nggadea olina nggari bulawa. Jadi ane bulawa to namala maropu niuji ante apu, neliu-liupa pomparasaya komi! Etu kana rauji woꞌu ante pesoba-pesoba ala manoto kaliongu nu pomparasaya komi ka i Pue Yesus. Ane maliongu pomparasaya komi, komi kana ratoiya bo rabila bo rapakalanga tempo Yesus Kristus marata bali ri dunia.
8 Naupa komi daꞌa nanggita Iꞌa nggaolu komi nompotowe Iꞌa. Pade naupa komi daꞌa nanggita Iꞌa weꞌi-weꞌi komi batena nomparasaya Iꞌa. Etu sampe nadamba mpuꞌumo rara komi ante kadamba nu rara to neliu-liuna to daꞌa namala rasowadaka.
9 Nadamba mpuꞌumo rara komi sabana nitarima komimo asele nggari pomparasayamu, etumo komi nipakasalama nggari pesuku sampe ri kasae-saena.
10-11 Nabi-nabi Alatala nggaolu nombaboto kabelona to nitarima komi etu. Ira nombaboto ewa towe belo to nirasai komi weꞌi-weꞌi. Ante pekeniaka Nosa Nagasa Kristus riara ntaꞌi ira Alatala nompopanjani ka ira ewa kasusa bo kapari to mawela Kristus pade kuasa bo kalanga katuwu to raratana maliu kasusa bo kapari etu. Tapi daꞌapa ninjani nabi-nabi iwenu kadupa nu tesa-tesa to niboto ira. Etu sampe ira nomparesa mpakabelo-belo ala mangginjani tempo nuapa bo iwenu kadupana pura-pura nuapa to niboto ira etu.
12 Pade Alatala nompakanoto ka ira nuapa-nuapa to niboto ira daꞌa nosinggawela ante ira mboto tapi etu nosinggawela ante komi. Weꞌi-weꞌi kajadia-kajadia to niboto ira etu nipatolele ka komi nggari tau-tau to nanggeni Kareba Belo ka komi ante petulungi Nosa Nagasa nu Alatala to nipopanaꞌu nggari suruga. Kakonona malaeka-malaeka i Pue mboto nadota mangginjani kareba to nipatolele ka komi etu.
Kita kana matuwu ante pokainggu to magasa
13 Sampesuwu-sampesuwu, naria mamimo panjarumakata to natantuna. Sabana etu komi kana mainga pade maroo manjarumaka rasi-rasi to rawai ka komi tempo Yesus Kristus marata bali ri dunia.
14 Komi kana matuwu ewa ana-ana nu Alatala to natundu ri jaꞌina. Neꞌe mana mantuki dota raramu to najaꞌa to nitukimu tempo komi danatuwu riara karumauna.
15 Tapi komi kana matuwu ante pokainggu to magasa pura, sabana Alatala to nompokio komi majadi todeana woꞌu nagasa.
16 Niuliku iwetu sabana naria tesa nu Alatala riara Buku Nagasa to nanguli, “Komi kana moinggu magasa, sabana Aku nagasa.” a
17 Sampesuwu-sampesuwu, komi nanggasangai Pue Alatala Umamu tempo komi nosambaya. Pade Iꞌamo to mombatangara pura-pura tau nantuki powia ira mboto ante daꞌa manggita lenje. Jadi etumo sabana komi kana matuwu ante mekou ri jaꞌina tempo komi danetoꞌo ri dunia eꞌi ewa torata.
18 Pekoumo ri jaꞌina, sabana ninjani komi mbotomo nuapa to nipake Alatala manggabasaka komi nggari katuwu komi to daꞌa ria gunana to nipasumuli totuꞌa komi nggaolu. To nipake Alatala daꞌa sangele to namala maropu ewa bulawa atau salaka,
19 tapi sangele to neliu nggasuli olina, etumo lei Kristus mboto. Iꞌa nireke ewa saongu ana bimba nadoli to nisambale manjaliku komi.
20 Daꞌapa dunia nipajadi Iꞌa nipakatantu Alatala mami majadi topantolo silaka manusia. Pade ri tempo weꞌi-weꞌi namosu kaopu nu dunia Iꞌa narata ri dunia eꞌi ala mamate manjaliku komi.
21 Nggari Iꞌamo sampe komi nomparasaya Alatala. Iꞌa nipakatuwu Alatala bali nggari kamatena pade niwaina ka kuasa bo kagayana to nipogumaa. Jadi etu sampe komi nomparasaya bo nanjarumaka Alatala.
22 Sampesuwu-sampesuwu, ante nantuki pepatuduki to nakonona, katuwu komi nipakagasa sampe komi namala nompotowe sampesuwumu topomparasaya i Pue Yesus ante kamomi nu rara. Sabana etu posipotowemo sambaꞌa bo sambaꞌa ante mpuꞌu-mpuꞌu rara.
23 Sabana komi nipajadi Alatala manusia nabou pade katuwumu to nabou etu daꞌa nopuꞌu nggari jaꞌi manusia to mamate. Katuwumu nopuꞌu nggari jaꞌi Alatala to daꞌa mamate-matena. Komi nombarata katuwua nabou etu sabana komi nomparasaya Tesa nu Alatala to natuwu bo naroo sampe ri kasae-saena.
24 Ewa to nitulisi riara Buku Nagasa iweꞌi:
“Katuwu pura-pura manusia ewa kawoko,
pade pura-pura kuasa bo kagayana ewa sese nggawoko.
Kawoko etu nalele pade sesena naronto.
25 Tapi Tesa nu Alatala naroo sampe ri kasae-saena.” (Yes. 40:6-8)
Tesa nu Alatala etumo Kareba Belo to nipatolele ka komi.