2
Jadi sampesuwu-sampesuwu, nirata komimo katuwua to nabou. Sabana etu kabasakamo pura-pura pokainggu to najaꞌa bo nebagiu. Neꞌe mana aga mabelo ri lenje, neꞌe mana majuꞌa rara bo neꞌe mana mompakajaꞌa tau ntanina.
2 Nasimbayu ewa ngana nggedi to dako nesuwu tunggai naino rarana nantomi ue njusu indona, iwetu woꞌu komi kana maino rara mangepe Tesa nu Alatala to najadi ewa panggoni wayomu to nagasa. Ane iwetu pomparasaya komi kana mantambai maroso sampe komi mantarima pura-pura nuapa to nipakasadia Alatala ka tau to nipakasalamana.
3 Kawiamo etu sabana nirasai komi mamimo kabelo nu rara i Pue.
Pue Yesus nirapaka ewa watu to natuwuna
4 Pue Yesus nirapaka ewa saongu watu to natuwuna. Watu etu nipoara manusia tapi nipelisi Alatala ewa watu to neliu nggasuli olina. Jadi kamaimo mompakamosu i Pue
5 ala komi woꞌu rapajadina ewa watu-watu to natuwuna to nipake mowia saongu sapo Alatala. Pade riara sapo etu komi majadi ewa topanggeni agama to nipakatantu mantulungi Alatala. Sabana komi mombatoiya Alatala bo mombajuju koro komi mboto ewa pesomba ka Iꞌa. Pade pesombamu etu kana rakonoa rara Alatala sabana Yesus Kristus mantulungi komi.
6 Nanotomo etu sabana naria tesa to nitulisi riara Buku Nagasa iweꞌi:
“Epemo! Aku nompelisi saongu watu to nasulina
pade watu etu nituꞌuku ri Bulu Sion
majadi palo mpondasi to neliu nggaroso.
Isema-sema momparasaya watu etu
daꞌa ntoto rapakaeya.” (Yes. 28:16)
7 Yesus, to nirapaka ewa watu etu, mpuꞌu-mpuꞌu nanggeni belo ka komi topomparasaya. Tapi ane tau daꞌa nomparasaya, kana majadi ri jaꞌi ira ewa to nitulisi riara Buku Nagasa iweꞌi:
“Watu to nitajiaka ntopowia sapo,
watu etumo to najadi palo mpondasi to neliu nggaroso.” (Mzm. 118:22)
8 Pade,
“Watu etu nompakatepasunu tau.
Watu etu nompakadungga ira.” (Yes. 8:14-15)
Ira natepasunu sabana daꞌa madota momparasaya Tesa nu Alatala, pade etumo to nipakatantu Alatala ka ira.
9 Tapi sampesuwu-sampesuwu, komi daꞌa ewa ira etu. Komimo tau-tau to nipelisi Alatala. Komimo to nipelisi najadi ewa topanggeni agama to mantulungi magau. Komimo todeana to nipakatantu mantulungi Alatala, komimo to najadi bagiana. Komi nipelisi ala mompatolele kareba ewa powia Alatala to nipogumaa. Iꞌamo to nompokio komi mesuwu nggariara karumauna ala mesua matuwu riara karemena to nipogumaa.
10 Tempo bopia komi daꞌa todeana, tapi weꞌi-weꞌi komi najadi todeana. Bopia komi daꞌa nipoasi matana, tapi weꞌi-weꞌi komi nipoasi matanamo.
Pokainggu to masipato ka tau to nipoasi mata Alatala
11 Sampesuwu-sampesuwu to nipotoweku, katuwuta ri dunia eꞌi ewa tau topesowo bo torata to netoꞌo sampalai lau. Etu sampe aku merapi ante mpuꞌu-mpuꞌu ka komi, neꞌe mantuki dota rara to najaꞌa to nangewa pomparasaya komi ka i Pue.
12 Komi kana matuwu ante pokainggu to nanoa mpuꞌu ri tatongo tau-tau daꞌa nomparasaya i Pue. Ane iwetu naupa ira manjalaraka komi ante manguli komi tau najaꞌa, kaopuna ira kana manggita pokainggu komi to nabelona pade mantoiya Alatala tempo Iꞌa marata ri dunia banepia.
Pekoumo ri jaꞌi pomarenta
13 Pekoumo ri jaꞌi pura-pura topoparenta to nipakatantu manusia, sabana etumo to nipodota i Pue. Pekoumo ri jaꞌi magau sabana iꞌamo to neliu nggabete kuasana.
14 Pade pekoumo ri jaꞌi gubernur-gubernur sabana iramo to nipakakuasa magau ala mombasuku tau-tau to najaꞌa bo mombatoiya tau-tau to nabelo pokaingguna.
15 Sabana to nipodota Alatala ala nggari pokainggumu to nabelo komi mompakalino tau-tau nadoyo to notesa-tesa nantuki pekiri ira to nabodo.
16 Komi kana matuwu ewa tau daꞌa nipobatua manusia. Tapi neꞌe sampe etu majadi tanje ka komi mowia kajaꞌana. Nabelopa komi matuwu ewa batua to natundu ri jaꞌi Alatala.
17 Bilamo pura-pura tau, potowemo sampesuwumu topomparasaya, pekoumo ri jaꞌi Alatala bo bilamo magau.
Batua kana mekou ri jaꞌi madikana nantuki jonjo Kristus
18 Komi to najadi batua kana mpuꞌu-mpuꞌu mekou ri jaꞌi madikamu bo mombabila ira, nabeloka ira to nanondo bo nalusu rara, nabeloka ira to nasoana.
19 Ane komi rapandasa madikamu naupa komi daꞌa nowia kasalana pade komi maroo riara kasusa etu sabana nantora dota Alatala, komi kana ragane Alatala.
20 Natantumo daꞌa masipato komi ratoiya ane komi maroo tempo niboba madikamu sabana nowia kajaꞌana! Tapi ane komi rapandasa sabana pokainggumu nabelo pade komi maroo riara kasusa etu, komi mpuꞌu-mpuꞌu ragane Alatala,
21 sabana etumo patuju Alatala nompokio komi. Toramo! Kristus woꞌu nipandasa ala manggeni belo ka komi. Iꞌa nombawai jonjo ka komi ala komi mompasiala pokaingguna etu.
22 Iꞌa daꞌa sanggani nowia silaka. Daꞌa ria sanggani Iꞌa nodawa.
23 Tempo Iꞌa niuli sinjaꞌi ntau Iꞌa daꞌa nebalasi. Tempo Iꞌa nipandasa Iꞌa daꞌa nesawa. Tapi Iꞌa aga nombajuju korona ka Alatala, Topotangara to nanoana.
24 Kristus mbotomo nanggolo silaka-silakata ri korona mboto tempo Iꞌa nipaku ri kayu parika, ala kita rakabasaka nggari kuasa silaka bo matuwu mantuki dota Alatala. Pade nggari bela-belana tempo niporo juꞌa-juꞌa komi nipakabelomo.
25 Tempo bopia komi ewa bimba-bimba to nasalanjalamo. Tapi weꞌi-weꞌi komi nanjilimo ri jaꞌi Ntopoewu to nanggeniaka katuwumu.