Pepatuduki ka toporongo
3
Iwetu woꞌu komi totuꞌa-totuꞌa besi. Komi kana mekou ri jaꞌi rongomu langgai ala ane maria rongomu to daꞌa nomparasaya Tesa nu Alatala, pokainggumu etu manggeni ira momparasaya. Daꞌa paraluu komi motesa nuapa-nuapa ka ira.
2 Sabana ane ira manggita komi mekou ri jaꞌi Alatala ante pokainggu to nagasa ira kana rakeni momparasaya.
3 Neꞌe sampe kagayamu aga ri sawalikuna, ewa nokalapenda woꞌomu bara nompake ramba-ramba bulawa bara pakea to nasuli-sulina.
4 Tapi kagayamu kana mopuꞌu nggariara ntaꞌimu, etumo nggari inggumu to nalusu bo nasana. Etumo kagayana to daꞌa ntoto malipo bo to neliu nggasuli olina riara mpanggita Alatala.
5 Sabana iwetu woꞌu pokainggu besi-besi to nagasa to nomparasaya Alatala tempo nggaolu. Besi-besi etu nompakagaya koro ira ante nekou ri jaꞌi rongona langgai.
6 Jonjona, i Sara natundu ri jaꞌi Abraham pade nompangaku iꞌa madikana. Pade komi nireke ewa ana-ana i Sara ane komi batena mowia mabelo bo daꞌa maeka mantingayo nuapa-nuapa.
7 Iwetu woꞌu komi totuꞌa-totuꞌa langgai. Komi kana matuwu mosanggani-nggani ante rongomu ante pokainggu to nanoto. Toramo, ira daꞌa nasimbayu karosona ante langgai. Bilamo ira sabana ira woꞌu niwai Alatala ka katuwua nabelo sampe ri kasae-saena nasimbayu ewa komi langgai. Kawiamo etu ala daꞌa maria nuapa-nuapa mombalawa posambayamu.
Kita kana matuwu mosaongu rara bo tunggai mompowia to nabelona
8 Jadi sampesuwu-sampesuwu, komi pura-pura kana mosaongu pekiri bo mosaongu rara. Posipotowemo sambaꞌa bo sambaꞌa ewa tau nosampesuwu. Komi kana mosipoasi mata sambaꞌa bo sambaꞌa bo moinggu maede rara.
9 Ane maria tau mowia kajaꞌana ri jaꞌimu neꞌe mombabalasi ira ante kajaꞌana. Ane ira manguli sinjaꞌi komi neꞌe rapesawa. Agina komi merapi rasi nggari jaꞌi Alatala ka ira. Sabana komi nipokio Alatala moinggu mabelo ewa etu ala komi mombarata rasi bo belo nggari jaꞌina.
10 Riara Buku Nagasa nitulisi iweꞌi:
“Isema-sema madota matuwu madamba
bo mombarasai katuwu to mabelo,
iꞌa kana mombajagai jilana ala neꞌe motesa to najaꞌana
bo neꞌe mebagiu.
11 Iꞌa kana manggabasaka pokaingguna to najaꞌa
bo mompowia to nabelona.
Iꞌa kana mangelo posinggabelo
ante mompasimbuku matuwu mosinggabelo ante tau-tau ntanina.
12 Sabana i Pue batena nompariara tau to nanoa,
pade Iꞌa nangepe posambaya ira.
Tapi Iꞌa nangewa tau to nompowia kajaꞌana.” (Mzm. 34:13-17)
Pokainggu to masipato ane rapandasa
13 Ane komi tunggai mowia pokainggu to nabelo, isema madota mompowia kajaꞌana ka komi? Natantumo daꞌa ria!
14 Tapi ane rapana komi rapandasa sabana pokainggumu to nanoana, masana mpuꞌumo komi. Ane maria tau mompandasa komi neꞌe maeka ri jaꞌi ira, bo neꞌe makini rara.
15 Tapi jujumo katuwumu ka Kristus, pade mompangaku Iꞌamo Puemu to nagasa. Pade komi kana masadia mombasono mpakanoto butu-butu tau to mekutana ewa panjarumaka ri jaꞌi Pue to naria riara ntaꞌimu. Tapi komi kana mombasono ira ante malusu bo maede rara.
16 Pade komi kana matuwu ante rara ntaꞌi to nagasa ala ane maria tau manjalai pokainggumu to nabelo ewa topomparasaya Kristus, ira kana maeya mboto.
17 Toramo! Nabelopa rapandasa sabana mompowia to nabelona ane etu dota Alatala pade rapandasa sabana mompowia kajaꞌana.
18 Sabana Kristus woꞌu nipandasa nau daꞌa nowia kajaꞌana. Iꞌa namate sanggani lau sampe ri kasae-saena nombasompo silaka manusia. Iꞌa to nanoa rarana namate nanjaliku kita to nadenggo rara ala manggeni kita mosinjani belo ante Alatala. Korona nipatesi tapi Iꞌa nipakatuwu bali ante kuasa Nosa Nagasa nu Alatala.
19 Tempo Kristus namate Iꞌa nikeniaka Nosa Nagasa nalau nompatolele Tesa nggari jaꞌi Alatala ka wayo-wayo ntau to nitarunggu ri petoꞌo ntomate,
20 etumo ira to daꞌa natundu ri jaꞌi Alatala tempo nabi i Nuh nggaolu. Tempo nabi i Nuh danompowia sakaya betena, nandate mpuꞌu posabara Alatala nompopea manusia majea nggari silaka-silaka ira. Tapi tempo ue nanggabuntu nompakalodo dunia aga sakedi lau tau nesua riara sakaya etu sampe nipakasalama, etumo aga walumbaꞌa lau. a
21 Kajadia etu nombagambara ka kita iwenu kita nipakasalama ante nantuki ada mpediu ewa tandaina kita topomparasaya i Pue Yesus. Ada etu daꞌa nompegasa gege nggari korota, tapi ante nantuki ada etu kita nerapi ala Alatala mombawai ka kita rara ntaꞌi to nagasa. Ada mpediu etu nompakasalama kita sabana Yesus Kristus natuwu bali nggari kamatena.
22 Iꞌa neore mpaka ri suruga pade nekatoko ri petoꞌo to nibila ri panggana nu Alatala. Pade ri setu pura-pura malaeka bo topoparenta bo karampua-karampua to nakuasa ri laerawa natundu ri jaꞌina.